हानं बजेट थाइगु सम्भावना
सेनाय् न्हूगु भर्नां माओवादी सशंकित
येँ (सन्ध्या टाइम्स)/सत्तारुढ दलत एमाले-कांग्रेस व प्रतिपक्षी माओवादी दथुइ जूगु ३ बुँदे सहमतिया कार्यान्वयन यायेगु ज्याय् यदि सरकारपाखें याकनं पहल मजुल धाःसा आः संसदया ताल्लाया अधिवेशन च्वनेत थाकुइगु व थुकिं यानाः हानं छक्वः बजेट निकास यायेत समस्या वइगु खँ संविधानसभाया अध्यक्ष सुभाष नेम्वाङं कनादीगु दु ।
थौं सुथय् वालुवाटार वनाः प्रधानमन्त्री माधव नेपालयात नापलासें सभामुख नेम्वाङं थ्व खँ धयादीगु खः। स्वंगू बुँदे सहमति कार्यान्वयन यायेगु ज्याय् ढिलाई जूगुलिं देशय् हानं राजनीतिक अन्यौल ब्वलंगु व थुकिं यानाः जनता तसकं निराश जूगुलिं उगु सहमतियात तुरुन्त कार्यान्वयन यायेगुपाखे पलाः न्ह्याकेमाल धकाः इनाप यानादीगु खः ।
लिसें वय्कलं प्रधानमन्त्री नेपाल सत्तापक्ष जूगुलिं उगु सहमतियात कार्यान्वयन यायेगु न्हापांगु दायित्व वय्कःयागु हे जूगुलिं वय्कलं हे थुकिया बारे याकनं निकास पिकायेमाः धकाः नं इनाप यानादीगु खः ।
उकुन्हु संसदया चिकुया अधिवेशन माओवादीया विरोधया वावजुद नं क्वचायेका छ्वयागु खःसा आः माओवादीं ताल्लाया अधिवेशन शुरु याकेत व्यवधान पिकाइगु जूगुलिं संसद सःते न्ह्यः हे उपिंलिसे संवाद यायेमाःगु खँ नं सभामुख नेम्वाङं कनादीगु खः ।
स्वंगू बुँदे सहमति कार्यान्वयन मजूगु कारणं यानाः थौंकन्हय् विपक्षी व सरकार संवादविहिन जुयाच्वंगु दु।
थ्वहे झ्वलय् उखे नेपाली सेनां सैन्य भर्ती यायेत न्ह्याकूगु प्रक्रियां माओवादीयात अझ सशंकित याना बिउगु खँ सीदुगु दु। नेपाली सेनां आः गुद्वःम्ह सेना भर्ना कायेगु लागिं प्रक्रिया न्ह्याकाच्वंगु दु। छखे माओवादी लडाकुयात सेनाय् समायोजन याये मखु धकाः धायेगु व मेखे सेनायात माःपिं जवानत धाःसा पिनें कायेगु धकाः तयारी यानाच्वंगु खँयात कयाः थःपिनि धारणा पित बीगु लागिं थौं माओवादीया विशेष बैठक च्वंगु दु। थौंया बैठकय् डा. भक्तमान श्रेष्ठया अपहरणय् थःगु पार्टीया नां वयाच्वंगु बारे नं सहलह जुइ धाःगु दु ।
