विश्वकप व टिभीया व्यापार

मधु श्रेष्ठ

'न्हापा न्हापा विश्वकप वल कि टि.भी. मीपिंत मोहनि हे वःगु थें जुइगु तर थुगुसी धाःसा टेलिभिजन सेटया ब्यापार शुन्य हे धाःसां जिउ ।'

प्यदँय् छक्वः वइगु विश्वकप फुटबल थुगुसी नं न्ह्यःने हे थ्यंकः वयेधुंकल। थुगुसीया विश्वकप दक्षिण अफ्रिकाय् जुइत्यंगु दु। नेपाः थेंज्याःगु देय्या जनतां थ्व विश्वकप फुटबल स्वयेगु धइगु टेलिभिजनय् जक खः। अय् जूगुलिं विश्वकप न्ह्यःने वल कि हे नेपाःया फुटबल प्रेमितय् न्हून्हूगु टेलिभिजन सेट न्यानाः ठिक्क याना तयेगु पुलांगु हे बानी खः। अय् जूगुलिं विश्वकप धइगु टेलिभिजन व्यापारीतय् लागिं नं छगू बांलाःगु व्यापारया सिजन धाःसां जिउ ।

वंगु विश्वकप तक थःथःपिनिगु व्यापार वृद्धि यायेगु ल्याखं थीथी कथंया उपहार वा सिरपाः बीगु नं व्यवस्था याःगु खः। थुकिं यानाः थगुने तक विश्वकप फुटबल न्ह्यइपुकेया निंतिं जक मखुसं उत्पादन कम्पनीतय्त थःपिनि व्यापार वृद्धि यायेगु अवसर नं जुयाच्वंगु खः। तर थुगुसी धाःसा विश्वकपं नेपालय् टेलिभिजनया खास हे ब्यापार मयाःगु खँ व्यवसायीतय्सं धाःगु दु ।

थौंकन्हय् बजारय् एल.जी., फिलिप्स, सामसुङ्ग, भिडियोकन टि.भी. न्यायेगु दु। तर थुगुसी विश्वकप न्ह्यः टेलिभिजनया व्यापार न्हापा थें मजूगु खँ येँ न्हूसतक स्थित मिडिया इलेक्ट्रेनिक्सया थुवाः संजीव अग्रवालं कनादी। वय्कलं धयादी, 'व्यापार ला न्हापा लिपा थें हे जक खः। छाय्धाःसां थुगुसी विश्वकपया निंतिं धकाः आः तक छगः हे टिभी मियागु मदुनि ।'

बरु थन इहिपाया सिजनय् अप्वः थें क्वसः बीपिंसं टिभी सेट न्याना यंकूगु खनेदु। विश्वकपया लागिं धकाः आः तक छम्हेस्यां हे टिभी न्याः वःगु मदुनि। 'थुकिया छता कारण लोड शेडिङ्ग नं जुइफु' वय्कःया बिचाः दु। मत मदयाः छेँय् दुगु टिभी ला मनूतय् स्वये मखं धाःसा न्हूगु न्यानाः स्वइगु सुनां?

महाबूया कुमारी इलेक्ट्रोनिक्सया सुशिल राजभण्डारीं धयादी, 'न्हापा न्हापा विश्वकप वल कि टिभी मीपिंत मोहनि हे वःगु थें जुइगु तर थुगुसी न्हापा स्वयां ख्वीगू प्रतिशतं व्यापार म्हो जूगु दु ।'

अय्नं वय्कःया धापू कथं मेथाय् स्वयां थन विश्वकपया निंतिं धकाः पीगू प्रतिशत ति व्यापार धाःसा अप्वःगु दु ।

व्यापार म्हो जूगु खँय् वय्कलं धयादी, 'थौंकन्हय् टिभी मदुगु छेँ ला त्वःता हे दिसँ, बालं च्वनीपिनिगु क्वथा तकं माले थाकुइ धुंकल। न्हापा स्वयां मेमेगु सामानत फुक्कं थिके जूगु खःसां टिभी, डेक धाःसा झन् दंकं वयाच्वंगु दु। शायद थ्वहे कारणं यानाः नं जुइफु तःमि चीमि सकसिनं टिभी न्यानाः हे स्वयाच्वंगु दु।' थौंकन्हय् न्हापा थें टिभी छगः न्यायेत विश्वकप थेंज्याःगु विशेष अवसर हे वइ धकाः पियाच्वनेमाःगु मदये धुंकल ।

थौंकन्हय् टिभी व्यवसाय स्वनिगलय् जक मखु देय्या न्हय्न्यागुलिं हे जिल्लाय् थ्यनेधुंकल। तप्यंक कम्पनीं हे अन सामान थ्यंका बीगु जूगुलिं आः न्हापा थें मेमेगु जिल्लायात स्वनिगलं हे सामान यंकेमाः धइगु मंत धासें वय्कलं धयादी, 'अथे जुयाः थनया हे भावं पिने टिभी न्याये दुगुलिं नं स्वनिगःया व्यापार म्हो जूगु खः ।'

'लोकंह्वाःगु विश्वकप फुटबल थेंज्याःगु कासा शुरु जुइत्यंगु इलय् नं टिभीया व्यापार बढे मजूगु कारण लोड शेडिङ्ग नं खः। टिभी दुपिनि ला कासाया इलय् मत वइगु खः कि मखु धइगु चिन्ता दुसा टिभी मदुपिंसं न्हूगु न्याना यंकीगु खँ हे मंत।' वय्कलं धयादी। वय्कःया पसलय् न्हय्द्वः निसें झिंस्वद्वः तका तक वंगु टिभी न्यायेगु दु। उकी दछि निसें न्यादँ तकया वारेन्टी दु ।

उखे कालिमाटीस्थित टीभी हाउसया बालकृष्ण महर्जनया धापू नं वय्कःपिंलिसे ज्वःलाः। विश्वकपया इलय् न्हापा स्वयां थुगुसी गाक्क व्यापार कुहां वःगु वय्कःया अनुभव दु। थुगुसी विश्वकपया निंतिं हे धकाः आः तक सुनां टिभी न्याः मवःनिगु खँ वय्कलं कनादिल। थन चाइनिज, जापानी, इण्डियन आदि ब्राण्डया टिभी न्यायेगु दु। वय्कःया पसलय् अप्वः थें कलंकी, कुलेश्वर, थानकोट व धादिङ्गयापिं मनूत टिभी न्याः वइगु जुयाच्वन। वय्कःयाथाय् पुलांगु बियाः न्हूगु टिभी हिला कायेगु नं व्यवस्था दुगु जुयाच्वन ।

न्हापा लिपा थें विश्वकप न्ह्यःने अपाय्सकं टिभी व्यापारमजूसां मोहनि, स्वन्ति व न्हूदँया इलय् धाःसा छुं भचा अप्वः जुइगु वय्कःया अनुभव दु। वय्कःया बिचाः कथं नं विश्वकपया इलय् व्यापार कुहां वःगुया मुख्य कारण लोड शेडिङ्ग हे जुइमाः ।

वय्कःपिनि बिचाः न्यनेबलय् देशय् कायम जुयाच्वंगु लोड शेडिङ्गया लिच्वः गुलि ब्यापक दु दु धकाः अथें अनुमान यायेफु। थुकिं टिभी जक मखु फुक्क हे कथंया विद्युतीय सामानया व्यापार ध्वस्त याना बिउगु दु। लोड शेडिङ्गं थुगुसी फुटबलप्रेमितय्त नं गाक्कं हे लिच्वः लाकूगु जुयाच्वन ।

More Stories Like this