'धोका माओवादीं हे बिउगु खः'
माओवादीयात एमाले व कांग्रेसया द्वपं
येँ (सन्ध्या टाइम्स)/वंगु जेठ १४ गते स्वंगू तःधंगु दल दथुइ जूगु स्वंगू बुँदे सहमतियात एमाले व कांग्रेसं पालना मयासे थःपिंत धोका बिल धकाः माओवादीं द्वपं बिउगुया कन्हय् कुन्हु हे एमाले व कांग्रेसं उगु सहमति थःपिंसं मखु बरु माओवादीं हे पालना मयासे धोका बिउग द्वपं बिउगु दु।
थौं सुथय् वालुवाटारय् च्वंगु एमाले व कांग्रेस नेतातय् बैठकं माओवादीयात थ्व द्वपं बिउगु खः। सहमति कथं माओवादीं शान्ति प्रक्रियाया लिखित खाका पेश यायेगु धाःगु खःसां अज्याःगु खाका पेश मयासे सम्झौताया उल्लंघन याःगु द्वपं एमाले-कांग्रेसं बिउगु खः ।
थ्वहे झ्वलय् म्हिगः बीबीसी नेपाली सेवालिसे खँ ल्हासें सरकारया प्रवक्ता शंकर पोखरेलं माओवादीं निन्हुया दुने अज्याःगु खाका बीगु व वयां लिपा न्यान्हुया दुने प्रधानमन्त्रीं राजीनामा बीगु सहमति जूगु खः धकाः अबलय् जूगु गोप्य सहमतिया खुलासा यानादीगु दु। तर माओवादीं थःपिंसं यायेमाःगु ज्या मयासे खाली प्रधानमन्त्रीं राजीनामा मबिउ धकाः जक पिने हाला जूगु पाय्छि मखु धकाः नं धयादिल।
उखे प्रधानमन्त्रीं न्यान्हुया दुने राजीनामा बी धयां नं मबिउ धासें माओवादीं आः थःपिंसं हानं आन्दोलन हे यायेगु धकाः निर्णय याःगु दु। म्हिगः माओवादी अध्यक्ष प्रचण्डं जारी याःगु विज्ञप्तिइ सरकारं थःपिंत धोका बिउगु धासें थःपिंसं न्ह्याकाच्वनागु आन्दोलन जारी हे दनि धाःगु दु। विज्ञप्तिइ एमाले व कांग्रेसं सहमतिया राजनीति त्वाःथःगु द्वपं नं बियातःगु दु ।
माओवादीं आः हानं आन्दोलन यायेगु धाःसां गज्याःगु आन्दोलन यायेगु व उकिया स्वरुप गज्याःगु जुइ धइगु खँ धाःसा स्पष्ट मयाःनि। उकिया बारे हानं बैठक च्वनाः निर्णय यायेगु खँ माओवादीया उपाध्यक्ष नारायणकाजी श्रेष्ठं कनादीगु दु ।
थ्वहे झ्वलय् तःधंगु दलतय्सं संविधानसभा व संविधान दयेकेगु ज्या अवरुद्ध याःगु खँयात कयाः चीधंगु पार्टीतय् बैठक थौं नं च्वनीगु जूगु दु। तःधंगु दलतय्सं संविधान सिबें नं सरकारयात अप्वः ध्यान बिउगुलिं आः थपे जूगु संविधानसभाया म्याद निरर्थक जुइ फुगु बारे नं चीधंगु दलतय्सं चिउताः प्वंकूगु खः ।
