गिरिजाया प्रतिष्ठा क्वकायेगु ज्या मयाये

पुलांम्ह प्रधानमन्त्री व नेपाली कांग्रेसया सभापति गिरिजाप्रसाद कोइरालायात नेपाल सरकारं बिउगु पदवीयात कयाः वय्कःया म्ह्याय् सुजाता कोइरालां आपत्ति प्वंकाच्वंगु समाचार वयाच्वंगु दु। वास्तवय् कोइराला देशया दकलय् उच्चस्तरयाम्ह नेता खः, उकिं वय्कःयात नं उच्चस्तरयागु हे पदवी बीमाः धकाः म्ह्याय् सुजातां यानाच्वंगु थ्व दावीं मदये धुंकूम्ह कोइरालाया मानयात च्वय् छ्वयेगु मखु बरु अझ क्वकायेगु ज्या यानाच्वंगु दु। गिरिजाप्रसाद कोइरालां देशया लागिं गुलि योगदान यात धकाः मूल्यांकन याइम्ह व्यक्ति वय्कःया म्ह्याय् मखु। कोइराला वय्कःया म्ह्याय्या अबु जक मखु समग्र देय्या नेता खः। उकिं वय्कःया मूल्यांकन देशं हे याइ। समग्र देशं यायेमाःगु मूल्यांकन छम्ह म्ह्याय्नं यानाः छुं नं कथंया दावी यायेगुया अर्थ कोइरालाया महानतायात अझ क्वपालेगु खः। उकिं नेता कोइरालाया प्रतिष्ठा ल्यंका तयेत जूसां वय्कःया म्ह्याय्या थ्व प्रलापयात पनेमाःगु दु ।

गन तक कोइरालाया तुलना नेता गणेशमान सिंहलिसे यायेगु खँ दु, थ्व सुजाताया मूर्खताया पराकाष्ठा खः। गथे वीपी कोइरालालिसे गणेशमानया तुलना याये फइ मखु अथे हे गणेशमानलिसे नं गिरिजाप्रसादया तुलना याये फइ मखु। थौं गणेशमान मदयेधुंकल, मदयेधुंकूम्ह गणेशमानं स्वयां गिरिजां यक्व ज्या यायेधुंकल धकाः मूल्यांकन यायेगु उचित मखु। आप्पा शेर्पां २० क्वः हे सगरमाथा गःसां न्हापां गःम्ह तेन्जिङलिसे वयागु तुलना याये फइ मखु। थःगु इलय् गणेशमानं गुगु योगदान बियादिल, व कोइरालाया योगदान स्वयां आपालं महान खः। महान मनूतय् महानेतायात म्हसीकेगु बुद्धि सुजातायाके वयेमा ।

More Stories Like this