राजनीतिं प्रभावित शेयर बजाः
ताः ई न्ह्यवंनिसें कुहां वनाच्वंगु नेपाःया शेयर बजाः उकुन्हु सोमवाः छक्वः ह्वात्त हे थहां वन। कारोवार अप्रत्याशित ढंगं थहां वंगुलिं नेप्सेय् हस्तक्षेप यानाः छझाः कारोवार हे बन्द यायेमाःगु तकं अवस्था वल। शेयर बजारय् वःगु थ्व हिउपालं लगानीकर्ता व शेयरधनीतय्त उत्साहित याना बिल। शेयर बजाःया विश्लेषकतय्सं थुकियात कयाः धया हल कि देशय् स्वंगू तःधंगु दलतय् दथुइ सहमति जुयाः राजनीतिक स्थिरता वइगु जुइवं उकिया हे लिच्वः कथं शेयर बजाः थहां वंगु खः ।
तर दुःखया खँ, शेयर बजाःया थ्व उत्साह छन्हु तक हे टिके जुइ मफुत। स्वंगु दल दथुइ जूगु सहमतियात कयाः हानं विवाद ब्वलन व प्रधानमन्त्रीया राजीनामा अनिश्चित जुल धइगु खबर वयेसातकि थहां वनेधुंकूगु शेयर बजाः हानं न्हासं चू वन। राजनीतिक अन्यौलता पुनः शुरु जुल धइगु खबरया नापनापं हे शेयर बजाः नं हानं चातु वाः वंगु दु ।
शेयर बजाः वास्तवय् नेपाःया राजनीतिक थहां कुहांयात खने दयेक क्यनीगु आर्थिक सुचक खः। थ्व बाहेक राजनीतिया कारणं यानाः लिच्वः लानाच्वंगु आर्थिक ख्यः देशय् अनेक दु। राजनीतिक पार्टीतय्सं थ्व खँयात नं आः गम्भीर रुपं बिचाः यायेमाःगु दु ।
राजनीतिक अन्यौलया लिच्वः आः देय्या अर्थ ख्यलय् फये मफयेक हे लानाच्वंगु दु। कन्हय् राजनीतिक सहमति जुयाः चांचां खँ मिले जूसां नं अर्थतन्त्रय् लाःगु लिच्वः धाःसा चांचां मिले याये फइ मखु। उकिं राजनीतिक पार्टीतय्सं छुं नं पलाः ल्ह्वनेबलय् थ्व खँयात नं मनन यानाः जक पलाः न्ह्यःने तयेमाः थें च्वं ।
More Stories Like this
छाय् जुइ थपाय्जिगु अपराध? जनतायात सास्ती जुइगु विरोध मजिल उपप्रमपाखें भारतय् याःवंगु ब्रिफिंग अपराध व राजनीति आः नापनापं हे माओवादी सहमतिया थीथी पक्ष
