सहमति हानं विवादय् लात
माओवादीपाखें २२ दलयात गुहार / प्रमया राजीनामा कयाबीत इनाप / चीधंगु दलतय्त प्रयोग याःगु द्वपं
येँ (सन्ध्या टाइम्स)/स्वंगू तःधंगु दल दथुइ संविधानसभाया म्याद दछि थपे यायेगु लागिं जूगु स्वंगू बुँदाया सहमति हे आः वयाः विवादय् लाःगु दु। माओवादीं न्यान्हुया दुने प्रधानमन्त्रीं राजीनामा बीगु धकाः उगु सहमति जूगु खः धकाः उकिया ब्याख्या याःगु दुसा एमाले व कांग्रेसं याकनं प्याकेजया सहमति कायम यानाः याकनं राजीनामा बीगु धाःगु खः धकाः उकियात मेकथं व्याख्या याना हःगु दु। थुकिं यानाः संविधान निर्माणया मेगु ज्या हानं विवादय् लाः वंगु दु ।
थ्वहे झ्वलय् थौं माओवादीं संविधानसभाय् दुथ्याःगु २२ दलया बैठक सःताः सहमति बारे जानकारी बिल। उगु सहमति गय् यानाः जूगु व उकिया आशय वास्तवय् छु धकाः माओवादी नेतातय्सं मेगु पार्टीयात जानकारी बिउगु खः। लिसें माओवादीं उगु सहमति कथं प्रधानमन्त्रीं राजीनामा बीमाः धकाः दवाव सिर्जना यायेत नं दलतय्त इनाप याःगु खः ।
बैठकय् दलतय्सं धाःसा तःधंगु दलतय्सं चीधंगु दलयात सत्ता परिवर्तनया गोटी जक दयेकल धकाः सरकार व विपक्षीया आलोचना याःगु खः। गुलिसिनं धाःसा दुने दुने मेमेगु हे सहमति यानाः पिने भ्वं जक च्वयाः क्यनीगु जूगुलिं थ्व सहमति हे अतिकं अपरिपक्व खः, उकिं आः थुकी वनेगु स्वयां नं संविधान दयेकेगुपाखे हे ध्यान बीमाली धकाः नं माओवादीयात सुझाव बिउगु खः ।
थ्वहे झ्वलय् सरकार व विपक्षी पार्टीयात भारतया लाइन हइम्ह धकाः नांजाःम्ह कांग्रेस नेता अमरेशकुमार सिंहं कांग्रेस, एमाले व माओवादी स्वंगुलिं हे पार्टीया नियत बांलाः मजूगु कारणं अज्याःगु सहमति कायम जूवंगु खः धकाः बिचाः प्वंकूगु दु ।
छगू रेडियोयात अन्तर्वार्ता बिसें कांग्रेसया प्रमुख सचेतक लक्ष्मण घिमिरें न्यान्हुया दुने प्रमया राजीनामा जक मखु सहमति नं यायेगु धइगु खँ जूगुलिं न्यान्हुया दुने सहमति कायम यायेमाः धयादिल। तर न्यान्हुया दुने सहमति कायम याये फइ ला धइगु न्ह्यसलय् वय्कलं धयादिल, 'प्रचण्डजुं छक्वः ला थःपिंसं चाहे जुल धाःसा छन्हुं हे सहमति यायेफु धयादीगु खः, यानादिसँ, न्यान्हु ला वय्कःयात अप्वः हे दु।'
सहमति कार्यान्वयन वःगु थ्व विवादं यानाः संविधानसभाया सक्रिय यायेगु ज्या हानं दिउ वंगु दु ।
