सुकिलामुकिला मखुसा थौं कुहां वयेमाः

हर्ष वज्राचार्य

थौं जेठ १८ हाकुगु न्हि
नेवाः लगायत नेपाःया सकलें जनजातितय्सं थौं हाकुगु न्हि हनाच्वंगु दु। नेवाःतय्पाखें नेवाः स्वायत्त राज्य मंकाः संघर्ष समितिं थौंया न्हि न्यायेकाच्वंगु दु। थुगु न्हि लुमंके कथं संघर्ष समितिं थौं येँया बसन्तपुली छगू विशेष सभा यायेत्यंगु दु। संघर्ष समितिं थ्व सभायात विशेष सभा छाय् धाःगु धायेबलय् व सभाय् ब्वति काः वइपिं सकलें सहभागीतय्सं ल्हातय् छपु छपु हाकुगु ध्वाँय् नं ज्वना वःगु दइ। हाकुगु न्हिया प्रतिक कथं सकस्यां हाकुगु हे ध्वाँय् ज्वनेगु ग्वसाः थुकी दयेकूगु खः ।

येँ महानगरपालिकाया तत्कालिन मेयर केशव स्थापितं नेवाः भाय्यात नं महानगरपालिकाया प्रयोगया भाय् धइगु मान्यता बीवं छम्ह निम्ह ब्रम्हूतय्सं उकिया विरोधय् सर्वोच्च अदालतय् मुद्दा तया बिल। व, सर्वोच्च अदालतं नं उमिगु हे खँयात सही माने यानाः येँ मनपाय् बिउगु भाषाया मान्यता खारेज याना बिल। वहे खारेज याना बिउगु न्हियात झी नेवाःतय्सं हाकुगु न्हि धकाः हनेगु यानाच्वनागु खः ।

थ्व न्हि हनेगु धइगु झी नेवाःतय्सं तनेधुंकूगु थःपिनि अधिकार हानं प्राप्त यायेगु लागिं आन्दोलन यायेगु सरह खः। नेवाःतय्गु लागिं अधिकार कायेगु आन्दोलन जूगु कारणं थ्व सकलें नेवाःतय्गु हे आन्दोलन खः। अय् जूगुलिं थुकी सकलें नेवाःतय्सं ब्वति कायेगु धइगु उमिगु कर्तव्य जू वइ ।

माओवादीतय्सं उकुन्हु न्यान्हु तक आम हडताल यानाः देश ठप्प याःबलय् येँ व यलया मनूत सतकय् कुहां वयाः शान्ति र्‍याली याःगु खः। खय् भाय्या पत्रपत्रिकातय्सं उगु र्‍यालीयात स्वनिगःया नेवाःतय्सं याःगु विरोध धकाः तसकं बय्बय् यात। ख ला उकी स्वनिगःया आपालं नेवाःतय्सं ब्वति काःगु नं खः। अय् जूगुलिं व र्‍यालीयात नेवाःतय्गु र्‍याली नं धाल।
नेवाःतय्गु लागाय् न्यान्हु न्यान्हु मछि बन्द यासेंलि मनूत कुहां वइगु स्वाभाविक नं खः। तर आः नेवाःतय्गु हे मागयात कयाः आन्दोलन जुयाच्वंगु दु। थथे थःगु हे लागिं जुयाच्वंगु आन्दोलनयात साथ बीत चाहिं नेवाःत कुहां वयेमाःगु खः लाकि मखु? व र्‍यालीइ कुहां वःपिंत माओवादीया अध्यक्ष प्रचण्डं सुकिलामुकिला धाल धकाः तसकं बय्बय् जुल। तर झी नेवाःत धइपिं धाथें 'सुकिलामुकिला' खः लाकि मखु धइगु खँ आः सी दइ। यदि नेवाःत प्रचण्डं धाः थेंज्याःपिं 'सुकिलामुकिला' मखु धइगु जूसा थौं जुयाच्वंगु हाकुगु न्हिया सभाय् नं उकुन्हु मनू मुं थें हे मुनेमाः। उकुन्हु ला आमहडतालया विरोधय् जक खः। तर थौं ला थःगु हे अधिकारया लागिं खः। ब्यापारीतय्सं सःतूगु सभाय् वनेगु, अले थःगु लागिं थः हे नेवाः दाजुकिजा तःकेहेँपिंसं सःतूगु सभाय् चाहिं मवनेगु जुल धाःसा थ्व ला प्रचण्डं 'सुकिलामुकिला' धाःगु ठीक हे जुइ। नेवाःत धाथें पिहां वयेमाःगु ई ला थौं धकाःसा खः। यदि नेवाःतय्सं थौं न्हूगु संविधान दयेकाच्वंगु इलय् नं थःपिनि अधिकार सुरक्षित याये मफुत धाःसा कन्हय् नेवाःतय्त पिनें वःपिं मनूतय्सं नं हेपे याइ। माओवादीं चन्दा काः वल धकाः नेवाः साहुत दिक्क जुयाच्वनी। यदि नेवाःत शक्तिशाली मजुल धाःसा थौं माओवादीं चन्दा काः वः थें कन्हय् खाओवादीं चन्दा कयाः दुःख बी। अय् जूगुलिं नं थ्व इलय् झीपिं शक्तिशाली जुइमाःगु दु। शक्तिशाली जुइगु धइगु झीत माःगु अधिकार कायेगु खः। अधिकार धइगु छक्वः निक्वः हाकुगु चश्मा तयाः तुयुगु लं फिनाः मर्निङ्ग वाक्य् पिहां वयां प्राप्त जुइ मखु। उकिया लागिं निरन्तर संघर्ष याना च्वनेमाः। थौं हाकुगु न्हि हनेगु नं वहे संघर्षया छगू रुप खः। उकिं थ्व संघर्षय् नेवाःत कुहां वयेमाः। अले थःगु अधिकारया लागिं जुइगु संघर्षय् ब्वति कयाः नेवाःत 'सुकिला मुकिला' मखु धकाः प्रचण्डयात लिसः नं बी माःगु दु ।

थःगु लागिं जुयाच्वंगु संघर्षय् ब्वति मकायेगु खःसा झी थेंज्याःपिंत सुनां नं सुकिलामुकिला धकाः ब्वः हे बिउसां झीसं छुं हे याये फइ मखु ।

More Stories Like this