जि गम्भीर जुइ

नर्मदेश्वर प्रधान

खँयाखँय्

थौंकन्हय्। छगू ल्वचं जि ग्रस्त। व ल्वय् खः मखु जिं मसिउ। तर जितः उकिं दुःख बी। सास्ती याइ। उकिया कारणं जिं थःगु मानसिक चैन तंके। जिगु शान्ति भङ्ग जुइ। जि तनाव, छटपटीइ लाइ। जि पीडित जुइ ।

तःन्हु दत। थ्व ल्वचं कःगु। न्हिछि थःगु ज्या याये। त्यानुइ। बहनी छ्यं फुंगाय् दिके। इच्छा जुइ। याउँक न्ह्यः वयेके। न्ह्याइपुक म्हगसय् तने। विज्ञतसें धाइ मनूया स्वस्थताया निंतिं न्ह्यः माः। द्यने माः। गबलें इलय् न्ह्यः वया बी मखु। मिखा तिसी। न्ह्यः वइ मखु। चा छ्वये थाकुइ। कचि मिखा। ई गय् छ्यायेगु। समस्या जुया बी। तर थौंकन्हय् अथे मखु। न्ह्यः समस्या मखु। समस्या मेगु हे जुइ। न्ह्यः वइ। तर द्यने ग्याः। आनाहां छु न्ह्यः वइ। दुस्वप्नं जितः घेरे यायेधुंकी। त्यःगु। मत्यःगु। जिउगु। मजिउगु म्हगसं जि आक्रान्त जुइ। प्यखेरं अन्धकार। दैत्य, राक्षसया दथुइ जि थ्यनी। जि इमि पञ्जाय् लाइ। इमिसं जितः अनसं इतिश्री यायेत स्वइ। जि सने। जि बलि बीत्यंम्ह दुगुचा थें। मृत्युया मू लुखाय्। छटपटे जुइ। छटपटी तीव्र जुइ। छटपटी हे जिगु संघर्ष जुइ। व त्रासद घडिइ। जिगु उग्र छटपटीं जि न्ह्यलं चाइ। पलख जि अन्योलय् लाइ। थ्व फुक्क म्हगस जक खः ला? वा धात्थें। बुलुहुँ चेतना थासय् वइ। विश्वस्त जुइ। थ्व म्हगस जक खः। तर जितः चैन दइ मखु। छाय् जि उज्वःगु स्वप्नया शिकार जुयाच्वना। छाय् जिगु म्हगस लोक राक्षस, दैत्य, हिंस्रक प्राणीतय् भूमि जुया बी। छाय् जि याउँक द्यने मखन ।

गुलिस्यां धाइ म्हगसया नं अर्थ दइ। म्हगसं भविष्यवाणी याइ। भिंगु, बांलाःगु म्हगसं मनूतय् जय जुइ। बांमलाःगु, मत्यःगु म्हगसं मनूतय् विनाश जुइ। "थौं बांमलाःगु म्हगस म्हनाच्वन।" ख्वाः खिउँकाः मांपिंसं उबलय् धाइगु लुमं। म्हगसय् विश्वास याइपिंसं अशुभ म्हगसं मन स्यंका बी। नुगः क्वतुंकी। जिं म्हगसय् खनागु घटना, खनीपिं प्राणीत लुमंके। जिगु म्हगस अशुभ, कुलक्षण प्रतीक जुया बी। अन जः भ्याः हे दइ मखु ।

म्हगसया शुभ, अशुभ प्रति जिं विश्वास मयाना। भलसा मकया। तर जितः ब्यवधान मेगु हे जुइ। जि द्यनेमाः। याउँक न्ह्यः वयेके। जिगु इच्छा जुइ। तर जब स्वप्न लोकय् जि दुहां वने। जिगु निंतिं व खतरापूर्ण जुइ। ध्वंसात्मक। घातक। मभिंगु म्हगसं जितः क्वत्यली। थौंकन्हय्। प्रत्येक चा। जितः तिक्त, कटु न्ह्यसलं दुःख बी। जि गय् द्यने। त्रास जुइ। न्ह्यः वइ। तर न्ह्यः सुखमय जुया बी मखु। जि दुःखया ग्वःफसय् लाइ। ग्यानापुगु म्हगसं जितः लिना हइ ।

उकुन्हु चान्हय्। न्ह्यलं जितः त्वपुना तइ। जिगु म्हगस लोक कम्पित जुइ। सनी। प्यखेरं पहाड, पर्वत ग्वतुली। तासया छेँ दुनी। सर्गतय् च्वंगु सुर्द्यः विस्फोट जुइ। सुर्द्यः कुचा कुचा जुइ। प्यखेरं छ्यालब्याल जुइ। प्यखेरं मि च्याइ। जि अग्नी कुण्डय् लाइ। छ्वइ। जि छटपट जुइ। जिगु तीव्र छटपतिं जितः न्ह्यलं थनी। दने। म्ह छम्हं मिं पू थें जुयाच्वनी ।

जिगिजिगिं क्वाःगु अनुभव जुइ। छु जूगु? जितः छाय् थय् जुयाच्वंगु? याउँक छकः छाय् द्यने मदुगु? म्हगसय् छाय् जितः थ्व विभत्स भोग? छाय् प्रलय? छाय् थ्व विघटन, विध्वंसया सामना? तःन्हु दत थ्व दुस्वप्नं दः लिनाच्वंगु। मानौं योजनावद्ध आक्रमण जुइ। जिगु खिलाफय् थुपिं ।

गुलिस्यां धाइ म्हगस अपूर्ण इच्छापूर्ति यायेगु थाय् खः। ज्वलय् नये मखंम्हेस्यां म्हगसय् प्वाः फुदंक नये खनी। ज्वलय् तंकाच्वनेमाःम्ह मय्जु। म्हगसय् लिक्क तये फइ। म्हगसया सकारात्मक भूमिका दइ। मनूया मानसिक अस्वस्थतायात थ्वं भिंका बी। मनोवैज्ञानिकतय्सं धाइ। तर थ्व सिद्धान्त जिगु खँय् छाय् अःखः जुइ? छाय् असत्य जुइ? ज्वलय् जिं शान्ति ययेके। मानव जातिया विकास, प्रगति, कल्याण जुइमाः। जिगु आकांक्षा जुइ। विध्वंसया कामना जिं गुबलें मयाना। तर जिगु म्हगस। विपनाया इच्छा पूर्ति यायेगु थाय् छाय् मजुल? छाय् जिगु सचेत इच्छातय् अःखः जिगु म्हगस जिगु निंतिं मृत्युकुण्ड जुइ। ज्वलय् शितलता इच्छा याये। म्हगसय् जिं अग्निज्वाला खनी। ज्वलय् जिं हरियाली ययेके। म्हगसय् जिं मरुभूमि खनी। जिगु इच्छा, कामनाया अःखः म्हगसय् छाय् जि विध्वंश, भूकम्प, प्रलय, सुनामी, मि, फय्, ग्वःफय्या शिकार जुया बी? थौंकन्हय्। जि छचा नं द्यने मफु। याउँक। जिं खनीगु म्हगसं जितः क्षतविक्षत याइ। त्वाकलय् तयाः त्यात्या याइ। मकलय् तयाः छुइ। स्वप्न जिगु निंतिं सराः जुइ। शंका जुइ। देशया थ्व विकराल स्थिति। प्रत्येक क्षण थन जि दुनाच्वनी। जिं हे मचायेक, मसीक विध्वंस, आत्मघात, विनाशया मनोकामना थ्व। जिगु मनं म्हयाच्वंगु खः ला? जिगु म्हगसया विभत्सता। उकिया हे साकार रुप खः ला? पूर्ति खः ला? जि गम्भीर जुइ ।

More Stories Like this