थारू आन्दोलनयात समर्थन

नेपाः राष्ट्रिय पार्टी व संघीय लोकतान्त्रिक राष्ट्रिय मञ्चं नेपाःया तराई लागाय् थारूलगायत अनया आदिवासीतय्सं यानाच्वंगु आन्दोलनयात समर्थन यासें इमिगु मागयात नेपाल सरकारं तत्काल सम्बोधन यानाः माग पूरा मयात धाःसा राजधानी केन्द्रित आन्दोलन यायेगु ख्याच्वः बिउगु दु ।

नेपाः पार्टी व संघीय मञ्चं शुक्रबार छगू मंकाः पत्रकार सम्मेलन यानाः थथे ख्याच्वः बिउगु खः । सम्मेलनय् मंकाःकथं जारी याःगु प्रेस वक्तव्यय् अन्तरिम संविधानय् तराईयात मधेस नामाकरण यानातःगुयात निरन्तरता बीकथं हालय् नेपाः सरकारं समावेशीकरण अध्यादेशय् तराईया थीथी आदिवासी जनजातितय्त मधेसी धकाः सूचिकृत याःगु खँय् थःपिनिगु ध्यानाकर्षण जूगु धयातःगु दु । ‘सरकारया थ्व ज्याप्रति घोर भर्त्सना यासें आदिवासी जनजातिया जातीय राजनीतिक मुद्दायात वेवास्ता यानाः मूल आदिवासी थारूलगायत आदिवासी जनजातितय्गु अधिकार, पहिचान व अस्तित्त्व हे समाप्त जुइकथं सरकारं हःगु कुठाराघाती अध्यादेश तुरून्त लित कायेत जोडदार माग यानाच्वना’, वक्तव्यय् धयातःगु दु ।

अथे हे आन्दोलनरत थारूलगायत मेमेपिं आदिवासी, जनजाति, मिसा, मुस्मां, दलित फुक्क समुदायया अधिकार सुनिश्चित जुइकथं राज्यया हरेक संरचना व तहय् जातीय जनसंख्याया लिधंसाय् पूर्ण समानुपातिक प्रतिनिधित्त्वया संवैधानिक सुनिश्चितता यायेत व आन्दोलनरत थरूहट संघर्ष समितिया प्रतिनिधितय् दथुइ वार्ताया माध्यमं समस्याया समाधान यायेत नं वक्तव्यय् माग यानातःगु दु । अथे मयात धाःसा मुक्कं राष्ट्रिय आन्दोलनयात सशक्त यायेत आःयागु आन्दोलनया समर्थनय् लिम्बुवान, खम्बुवान, तामाङ्गसालिङ्ग, नेवाः, मगरात, तमुवान, खसान लगायतयात ऐक्यबद्ध यानाः मंकाः कथं राजधानी केन्द्रित आन्दोलन यायेत थःपिं बाध्य जुइगु ख्याच्वः नं वक्तव्यय् बियातःगु दु । सम्मेलनय् उगु पार्टीतय् नेतातय्सं राजधानी केन्द्रित आन्दोलन थानकोट नाका बन्द यानाः सुरू यायेगु जानकारी बिउगु खः ।