'न्यान्हुया दुने राजीनामा बीगु सहमति जिं मसिउ'
येँ (सन्ध्या टाइम्स)/प्रधानमन्त्री माधव नेपालं थम्हं न्यान्हुया दुने राजीनामा बीगु धकाः सहमति जूगु बारे थम्हं छुं नं मसिउ धयादीगु दु। थौं सुथय् च्वंगु सत्तारुढ झिगू पार्टीया बैठकय् न्ववासें वय्कलं थ्व खँ धयादीगु खः।
बैठकय् दुथ्याःम्ह छम्ह नेतां कनादी कथं प्रधानमन्त्री नेपालं थम्हं राजीनामा बीगु बारे थःलिसे छुं नं खँ मजूगु व माओवादीलिसे सुनां छु सहमति यात व नं थम्हं मसिउ धकाः धयादीगु खः ।
लिसें उगु बैठकय् झिगू दलया नेतातय्सं नं प्रमयात राजीनामा बीमाःगु छुं हे आवश्यकता मदु धकाः सुझाव बिउगु खः। माओवादीलिसे प्याकेजया रुपय् छु छु सहमति यायेगु धकाः खँ जूगु खः, थ्व फुक्कं ज्याखँ क्वमचाःतले प्रधानमन्त्रीं राजीनामा बीम्वाः धकाः नं बैठकं निर्णय याःगु खः ।
संविधानसभाया म्याद दछि थपे जुइधुंकाः आः सरकारं छु याये माली धइगु बारे सहलह यायेत थौं सुथय् सरकारय् दुथ्याःगु झिगू दलया बैठक च्वंगु खः। बैठकय् प्रधानमन्त्रीं राजीनामा बीगु धइगु प्रशंग वयेवं छखे प्रधानमन्त्रीपाखें थम्हं न्यान्हुया दुने राजीनामा बीमाः धकाः जूगु सहमति पालना यायेत थः बाध्यकारी मजुइगु संकेत बियादीगु खःसा लिसें झिगू दलं नं वय्कःयात प्याकेजय् समाधान यायेमाःगु ज्याखँत क्वमचाःतले राजीनामा बीमाःगु आवश्यकता मदु धकाः सुझाव बिउगु खः। प्रमयात झिगू दलं पूर्ण रुपं समर्थन यायेगु खँ नं बैठकय् जूगु जानकारी सूत्रं बिउगु दु ।
संविधानसभाया म्याद दछि थपे यायेगु लागिं प्रधानमन्त्रीया राजीनामा वयेमाः धकाः माओवादीं शर्त तयेवं एमालेया शक्तिशाली नेता खड्ग ओलीं प्रधानमन्त्रीया राजीनामा न्यान्हुया दुने (आः स्वन्हु जक ल्यं दनि) वइ धकाः माओवादी अध्यक्ष प्रचण्डयात आश्वासन बियादीगु खःसा उकिया हे लिधंसाय् 'प्रमं अविलम्ब राजीनामा बी' धकाः स्वंगू दल दथुइ सहलह जूगु खः ।
