आः बरु ई सितिकं छ्वये मजिल

झण्डै झण्डै मदयेत्यंगु संविधानसभायात म्हीग चान्हय् राजनीतिक पार्टीतय् दथुइ जूगु सहमतिं बल्लबल्ल बचे यात। संविधानसभा बचे यायेत राजनीतिक पार्टीतय्सं चांचां च्वनाः ज्या याःसां उमिगु थ्व पहलं जनता लय्तायाच्वंगु धाःसा मदु। संविधानसभा धइगु संविधान दयेकेगु थाय् जक खः। राजनीतिक पार्टीतय्सं संविधान जक बियातःगु ई दुने सिमधयेकूगु मखु, संविधान दयेकेगु थाय् तकं मदयेका छ्वयेगु कुतः याःगुलिं नेतात प्रति जनताया विश्वास गाक्कं कुहां वनेधुंकूगु दु। अथे खःसां नेतातय्सं संविधान दयेके मफुसां संविधानसभा छगू बचे यायेगु ज्या यात, उकिया लागिं वय्कःपिंत सुभाय् हे बी माली ।

तर संविधानसभा बचे जुइवं तुं संविधान वइगु हे जुल धइगु ग्यारेन्टी धाःसा अझ नं मदुनि। छाय्धाःसां संविधानसभाया म्याद छगू थपे यायेत हे नेतातय्सं तसकं तःधंगु कसरत याःगु खः। ल्यं दुगु ज्या यायेत अझ नं कसरत यायेमानि। संविधान च्वयेगु ज्या ७५ प्रतिशत पूवन धाःसां व पूवंगुया छुं अर्थ मदु। संविधानया महत्वपूर्ण बुँदाय् सहलह यायेगु ल्यं हे दनि। सेना समायोजन, राज्य पुनर्संरचना, शासकीय स्वरुप आदि थेंज्याःगु महत्वपूर्ण विषयय् खुल्ला छलफल तकं मजूनि। अझ व स्वयां नं प्रधानमन्त्री माधव नेपालं राजीनामा बी धाःगु बचं गबलय् पूवनीगु खः अन नं खा ल्यं दनि। छुं जुयाः राजीनामा मबिल धाःसा स्थिति अझ स्यनी तिनि। बरु आः राजनीतिक पार्टीतय्सं थःत प्राप्त जूगु थ्व ईयात लुँचुं थें मूल्य बियाः संविधान दयेकेगु ज्याय् छ्यले माल। आः नं संविधान दयेके मफुत धाःसा स्थिति भयावह जुइगु खँयात लुमंके माल ।

More Stories Like this