बुद्ध जयन्तीया थीथी ज्याझ्वः

२५५४ क्वःगु बुद्ध जयन्तीया लसताय् देय्न्यंकं थीथी ज्याझ्वः जुल। थ्व झ्वलय् बुद्ध जयन्ती कुन्हु हे स्वयम्भुया आनन्दकुटी विहारय् जूगु छगू ज्याझ्वलय् प्रधानमन्त्री मू पाहां कथं झाःगु खः। बुद्ध जयन्ती समारोह समितिया ग्वसालय् जूगु उगु ज्याझ्वलय् आपालं वक्तातय्सं नं न्ववानादीगु खः। उगु इलय् अन बुद्धया अस्थि नं ब्वयेगु ज्या जूगु खः ।

थ्वहे लसताय् श्रीघः ज्ञानमाला भजन खलःपाखें छवाःयंकंया भजन ज्याझ्वः यात। भजन खलःपाखें भजन ज्याझ्वःया नापं धर्मदेशन, बुद्ध पुजाया नापं बाजं सहित बुद्धया मूर्ति गाडीइ तयाः देय्चाःहीकेगु ज्या नं जूगु खः। लिसें वकुन्हु बहनी हानं भजन व दिपावली नं याःगु खः ।

उखे रत्नकुसुम परिवार, कुसुम जुनियर क्लब व नेपाल रेडक्रस सोसाइटी महाबौद्धया मंकाः ग्वसालय् छगू हिदान ज्याझ्वः जुल। कुसुमबियालाछि त्वालय् जूगु उगु ज्याझ्वलय् ६० म्हेस्यां हिदान याःगु खः ।

थुकिया नापनापं रत्नकुसुम परिवारपाखें ज्याथजिथिपिं मनूतय्त हनेगु ज्या नं यात। ज्याझ्वलय् नेपालभाषा परिषद्या नायः फणिन्द्र रत्न वज्राचार्य, गायक भृगुराम श्रेष्ठ लगायत पीम्ह ज्याथजिथिपिंत हनेगु ज्या जूगु खः। वय्कःयात खादागा क्वखायेकाः बुद्धया मूर्ति लःल्हासें हनेज्या याःगु खः। त्वाःबाहाःया विकासय् वय्कःपिनि योगदानयात लुमंकुसें ज्याथजिथिपिंत हनेज्या यानागु खँ ग्वसाः खलकं धाःगु दु ।

उकथं हे २५५४ क्वःगु बुद्ध जयन्ती मूल समारोह समितिया ग्वसालय् नं थन छगू हिदान ज्याझ्वः यात। ज्याझ्वलय् स्वनिगः बाहेक रसुवा, दोल्खा व वीरगंजयापिं नापं यानाः ११५ म्ह हिदातातय्सं हिदान याःगु खः ।

अथेहे थ्वहे लसताय् युवक बौद्ध मण्डल, नेपाल विपश्यना ध्यान उपसमितिया ग्वसालय् छन्हुया विपश्यना ध्यान शिविर च्वन। केन्द्रीय उपप्रचार सचिव व ध्यान उपसमितिया संयोजक भाइराजा शाक्यया संयोजकत्वय् जूगु उगु शिविरय् ४९ म्ह साधकतय्सं ब्वति काःगु खः। ध्यान शिविर वरिष्ठ सहायक आचार्य राजरत्न धाख्वां सञ्चालन यानादीगु खः। उकथं हे युवक बौद्ध मण्डल, क्लब २५ या ग्वसालय् मण्डलया लागाय् दीपावली नं यात। उगु इलय् सहभागीपिनि दथुइ सद्भाव, सहकार्य स्वरुप उपहार कालबिल नं जूगु खः। ज्याझ्वः क्लब २५ या अध्यक्ष विनिशा शाक्यया संयोजकत्वय् जूगु खः ।

नापं युवक बौद्ध मण्डल, शनिवारीय बुद्ध पुजा तथा धर्म देशना ज्याझ्वः नं शनिबार सुथय् धम्म हलय् जुल। शनिवाःपतिकं जुया वयाच्वंगु उगु ज्याझ्वलय् भिक्षु संघरक्षित स्थविर "सद्धम्म कोविद" पाखें बौद्ध चारधामया महत्व विषयय् धर्म देशना जूगु खः। संस्थाया नायः हेरारत्न शाक्यया सभापतित्वय् जूगु उगु ज्याझ्वलय् पंचशील व बुद्ध पुजा नं जूगु खः ।

उखे नेवाः जागरण मञ्चं स्वांया:पुन्हिया लसताय् स्वयम्भु महाचैत्य लागाय् निःशुल्क स्वास्थ्य शिविर यात। मञ्चया दुजःलिसें वरिष्ठ स्वास्थ्यकर्मीत सरोज बज्राचार्य, सत्या श्रेष्ठ, राज्यलक्ष्मी महर्जन, मजिता बज्राचार्य व स्वास्थ्य सेवक यज्ञबहादुर नकर्मीपिंसं न्यय्निम्हेसित स्वास्थ्य सेवा बियादीगु खः। अथेहे थीथी वासः नं इनेज्या याःगु खः। उगु शिविरयात जोनसोन एण्ड जोनसन, हिमालय हर्वलपाखें माःकथंया वासः बियाः ग्वाहालि याःगु खः। शिविरय् न्यासलं अप्वः मनूतय्सं ब्लडप्रेशर चेक याकूगु खः ।

नेवाः जागरण मञ्चं स्वदँ न्ह्यवंनिसें स्वांयाः पुन्हिया लसताय् थुकथं स्वास्थ्यसेवा शिविर तया वयाच्वंगु खः। थुगु स्वास्थ्य शिविर जागरण मञ्चया दुजः मुकेश मास्केया संयोजकत्वय् जूगु खः ।

More Stories Like this