होलिया छुं रंग

थौं होलिपुन्हि । रङ्ग व उमंगया नखः । छम्ह च्वमिं होलियात नेवाःतय्गु भ्यालेन्टाइन डे धकाः च्वःगु दु, होलि मतिना अभिव्यक्त यायेगु नखः खः धकाः ।

होलि नेपाःन्यंक व भारतय् नं हनेगु याः तर नेवाःतय्सं हनीगु होलिइ मौलिकता दु । नेवाःतय्सं छन्हु जक मखु म्होतिं छवाः होलि हनी । अझ ला श्रीपंचिमंनिसें होलिपुन्हि थ्यंक हे गुथिइ गुथिइ म्ये व संगीतलिसें ह्याउँगु अवीर इलाः होलि हनी नेवाःतय्सं । थुकिइ दथुइ नं येँया बसन्तपुली चीर स्वासांनिसें चीर क्वःमथःतले अविर व रङ्ग इलाः विशेष कथं हनीगु पर्व खः होलि ।

होलिया प्राचीनता गोपालराज वंशावलीं नं पुष्टि याः । चीर स्वाइगु धार्मिक ज्या स्वयां अप्वः छगू तत्कालिन राजनीतिक ज्या जक खः धैगु इतिहासं पुष्टि याः । खास यानाः उब्लेयापिं जुजुपिनि थःगु शक्ति प्रदर्शन यायेत ध्वाँय् ब्वयेके थें ब्वयेकीगु हे लिपा वनाः चीर जूवंगु खः । अथे ला थ्वयात कृष्णं गोपिनीतय्गु वसः सिमाय् यंकाः खायाब्यूगुया प्रतीक नं मधाइगु मखु ।

होलिपुन्हिकुन्हु जलय् हरिसिद्धि भवानीया जात्रा जुइ, जलप्याखं क्यनी । थुकुन्हु थैवया फूच्वमाजुया थाय् नं मेला जुइसा थैवय् नं जात्रा जुइ । होलिपुन्हिया कन्हय्कुन्हु अर्थात् चिल्लाथ्व पारुकुन्हु थँबहिली चकंद्यःया जात्रा जुइ ।

होलिपुन्हि बहनी साइत स्वयाः गुरुजुया पल्टनं तोप तयाः चीर क्वःथयेवं होलि सिधइ । चीर दाह याये यंकेगु झ्वलय् वसन्त ऋतु सिधल धइगु छुमां कथं लँ दुच्छि हे घातु म्ये हालावनी । चीर क्वथसांनिसें पाहांचःह्रे तक नेवाःतय् घातु म्ये हालेगु चलन दु ।

More Stories Like this