कंस राजीनामा बी: प्रम

फ्लोर क्रस जुइगु सम्भावना / मधेशीया न्हूगु प्रस्ताव /
संसद पिने घाँय् सहित धर्ना

येँ (सन्ध्या टाइम्स)/संविधानसभाया थौं अन्तिम न्हि नं थुकिया म्याद थपे यायेगु लागिं कुतः जारी हे जुयाच्वंगु दुसां लिच्वः धाःसा न्हिनय् १ बजे तक नं प्राप्त जूगु मदुनि।
थ्वहे झ्वलय् प्राप्त जानकारी कथं प्रधानमन्त्री माधव नेपालं थौं सदनय् बीगु थःगु संवोधनय् यदि माओवादीं संविधानसभाया म्याद थपे यात धाःसा थम्हं निन्हुया दुने राजीनामा बी धइगु खँ उल्लेख यानातःगु दु। सुथय् ८ बजे च्वनेगु धयातःगु संसद न्हिनय् १ बजे तकं च्वने मफुगुलिं प्रम नेपालं उगु संवोधन नं याये फयाच्वंगु मदुनि। संवोधनय् थौं जेठ १४ गते कुन्हु संविधान जारी याये मफुगु खँय् वय्कलं क्षमा नं फ्वनादीगु खँ धाःगु दु ।

तर उखे माओवादीं धाःसा प्रधानमन्त्रीं निन्हु लिपा मखु थौं हे राजीनामा बिउसा जक थःपिंसं म्याद थपे याये फइ धइगु प्रतिक्रिया बिउगु दु। 'निन्हु लिपा राजीनामा बी फुसा थौं छाय् बी मफु?' माओवादी प्रवक्ता दिनानाथ शर्मां न्ह्यसः तयादीगु दु।
थ्वहे झ्वलय् उखे थीथी पार्टीया मधेशवादी सभासदतय्सं माओवादीं यदि थौं संविधानसभाया म्याद थपे यात धाःसा थःपिंसं कंस हे सरकार विरुद्ध अविश्वास प्रस्ताव तयाः प्रम नेपालया राजीनामा कया बी धइगु न्हूगु प्रस्ताव न्ह्यःने यंकूगु दु। थौं सुथय् पिहां वःगु थ्व प्रस्तावयात न्हिनय् तक फुक्क पार्टीया नेतातय्थाय् थ्यंकेधुंकूगु खँ सीदुगु दु। तर माओवादी व सरकारया स्वापू बांमलाक हे स्यनेधुंकूगु कारणं मधेशवादी नेतातय् थ्व प्रस्तावया बांलाक सुनुवाई तकं मजुयाच्वंगु खँ नं सूत्रं धाःगु दु ।

अथे हे थीथी पार्टीइ संलग्न छुं नेतातय्सं यदि थौं न्हिनय् तक नं सहमति मजुल धाःसा थःपिंसं फ्लोर क्रस यानाः जूसां सरकारयात अल्पमतय् लाकेगु जुइ धकाः हस्ताक्षर संकलन यानाच्वंगु खँ सीदुगु दु। उकी नेपाली कांग्रेसया नरहरि आचार्य, एमालेया रविन्द्र अधिकारी लगायत ७० म्ह सभासद्, मधेशी जनअधिकार फोरम व तमलोपाया रामचन्द्र कुशवाह लगायतया सभासदत दुथ्याःगु खँ धाःगु दु। उमिसं पार्टीं बीगु ह्वीपयात माने मयासे सरकार क्वःथलेगुपाखे थःगु मत बीगु जुइ धाःगु दु ।

माओवादीं धाःसा यदि सदनय् थःपिंसं तयागु सरकारया प्रस्ताव विरोधी सुचं असफल जुल धाःसा सदन दुने हे हंगामा यायेगु नीति दयेकूगु दु। उमिसं थौं सदनय् प्रम माधव नेपालयात संवोधन तकं मयाकेगु रणनीति तयार याःगु खँ नं सीदुगु दु। प्रमयात राजीनामाया संवोधन जक याके बीगु खँ माओवादीं धाःगु दु ।

थ्वहे झ्वलय् थौं न्ह्याथे यानाः नं संविधानसभाया म्याद थपे यायेमाः धकाः न्हू वानेश्वरया संसद भवन पिने नागरिक समाज, आदिवासी जनजाति व अपांग समुदायं धर्ना बियाच्वंगु दु। उमिसं म्याद थपे मयाःसा सभासदतय्त नकेगु धकाः घाँय् नं हयातःगु दु ।