असफल मयाये थौंया ऐतिहासिक न्हियात

न्हूगु नेपाःया न्हूगु संविधान जारी यायेगु तिथि धकाः घोषणा याना तःगु २०६७ सालया जेष्ठ १४ गते थौं खः। यदि राजनीतिक पार्टीतय् दथुइ समझदारी कायम जूगु जूसा, पार्टीत सकलें जनतायात बिया वयागु बचं प्रति प्रतिवद्ध जूगु जूसा, पार्टीया नेतात धाथें इमान्दार जूगु जूसा, जनता प्रति उत्तरदायी जूगु जूसा थौंया थ्व घडी नेपाःया इतिहासय् हे दकलय् सुखद ई जुइगु खः। तर नेपाःया वर्तमान जटिल राजनीतिक अवस्थायात नेतृत्व बीगु जिम्मेवारी कयाच्वंपिं सुं हे नेतायाके थुपिं मध्ये छुं हे गुण मदया बिउगु कारणं नेपाली जनताया लागिं थौंया थ्व घडी अझ नं निराशा व संशयपूर्ण जुयाच्वंगु दनि। थनिं निदँ न्ह्यः तक कायम जुयाच्वंगु राजनीतिक अन्यौल अन्त्य यायेगु लागिं गुगु सहमति दयेकूगु खः, उगु सहमतिं थौंया न्हि तक जक कल्पना यानातःगु दु। वयां लिपाया न्हि राजनीतिक अन्यौल अन्त्य जुयाः देय् छगू निश्चित दिशापाखे न्ह्याइ धकाः कल्पना यानातःगु खः। थौंया न्हि कुन्हु नं यदि संविधान तयार मजुल धाःसा छु यायेगु, अथवा संविधानसभा हे भंग जुइगु तकया अवस्था थ्यन धाःसा छु यायेगु धइगु बारे छुं हे कल्पना यानातःगु मदु। जनतां तसकं हे धैर्य जुयाः पियाच्वंगु न्हि जूगु कारणं राजनीतिक पार्टीतय्सं थःपिनि सम्पूर्ण अहम् त्वःताः जूसां संविधानसभा रक्षा यायेगुपाखे पलाः न्ह्याकेमाःगु अतिकं आवश्यकता दु। संविधान मवःगु जक मखु संविधानसभा हे भंग जुल धाःसा वयां लिपा झीगु न्ह्यःने छपु खिउँगु गल्लि सिबाय् मेगु छुं हे दइ मखु। थौंया न्हियात गुगुं नं कथं असफल मयाकेया लागिं अन्तिम सेकेण्ड तकं नं नेतात लगे जुयादी धकाः झीसं कामना याये ।

More Stories Like this