थौं २५५४ क्वःगु बुद्ध जयन्ती

थौं स्वांयाः पुन्हि । थौंया हे दिंस भगवान गौतम बुद्ध बूगु, बोधिज्ञां चूलागु व निर्वाण जूगु खः । उकीं थौंया दिंयात बुद्ध जयन्ती कथं हनेगु यानावयाच्वंगु ख: । २५५४क्वःगु बुद्ध जयन्तीया लसताय् थौं देय्न्यंक थीथी ज्याझ्वः यानाः हनेत्यंगु दु ।

बुद्ध जयन्ती व लुम्बिनी दिवसया लसताय् बुद्ध बूगु लुम्बिनीलय् लुम्बिनी विकास कोषं छगू ज्याझ्वः यायेत्यंगु दु । अथेहे बुद्ध जयन्ती समारोह समितिं मू ज्याझ्वः येँया स्वयम्भुइ च्वंगु आनन्दकुटी विहारय् यायेत्यंगु दु । नापं आपालं थासय् बुद्धया मूर्ति सहित पदयात्रा नं यायेत्यंगु दु ।

बुद्ध जयन्तीया हे लसताय् बौद्ध धर्मालम्बीतय् थ:थ:गु छेँय् न्याता रंगया बौद्ध ध्वाँय् ब्वयेकूगु दु । न्याता रंगया अर्थ थ्व संसार ब्वलनेत माःगु पञ्च तत्वया प्रतीक खः । पञ्चतत्व धकाः आकास, फय्, लः, पृथ्वी व मियात कयाः वचुगु, तुयुगु, म्हासुगु, गेरु व ह्याउँगु रंग दुगु ध्वाँय् ब्वयेकीगु चलन दु ।

बुद्ध जयन्तीया लसताय् राष्ट्रपति डा. रामवरण यादव, उपराष्ट्रपति परमानन्द झा, नेकपा (एमाले) अध्यक्ष झलनाथ खनाल लगायत नेतातय्सं छगू विज्ञप्ति पिथनादिसें दक्वं बुद्ध धर्मालम्बीतय्त सुख, शान्ति व सम्वृद्धिया कामना यानादीगु दु ।

More Stories Like this