माधवं थौं छन्हुया ई फ्वन
प्यम्ह शीर्ष नेताया बैठक १५ मिनेटं क्वचाल
येँ (सन्ध्या टाइम्स)/संविधानसभाया म्याद थपे यायेगु कि वयां न्ह्यः प्रधानमन्त्री माधव नेपालं निं राजीनामा बीगु धकाः स्वंगू तःधंगु दलतय् दथुइ जुयाच्वंगु विवाद थौं गम्भीर मोडय् थ्यंगु अनुमान सूत्रं याःगु दु। थौं सुथय् स्वंगुलिं तःधंगु दलया शीर्ष नेतातय् दथुइ जुइ धाःगु वार्ताय् प्रधानमन्त्री माधव नेपाल नं उपस्थित जुयादीगु खः। वय्कलं बैठक आरम्भ जुइवं हे थःगु राजीनामा बारे थौं न्हिनय् थीथी पार्टी व थःगु हे पार्टीया नं थीथी नेतातलिसे छक्वः सहलह ब्याके, वयां लिपा थःगु निर्णय बी धकाः ई फ्वनादीगुलिं बैठक तुरुन्त हे क्वचाःगु खः। थौंया बैठक १५ मिनेट जक च्वंगु खः ।
सूत्रया कथं प्रम नेपालं उगु बैठकय् थः राजीनामा बीत तयार दु धकाः कनादीगु खः। वय्कलं थः धुंकाः प्रधानमन्त्री जुइम्ह सु खः, विकल्प तयार या, थम्हं तुरुन्त हे राजीनामा बिया बी धकाः प्रस्ताव तयादीगु खः ।
वयां लिपा थुकिया बारे थःथः दथुइ नं छक्वः सहलह याये धासें बैठक स्थगित याःगु खः। मेगु बैठक थौं हे सनिलया ५ बजे हानं च्वनीगु जूगु दु ।
बैठकया बारे पत्रकारतलिसे खँ ल्हासें माओवादीया उपाध्यक्ष नारायणकाजी श्रेष्ठं थ्व वार्ताया झ्वलय् थःपिं तसकं हे लचक जुइ धुनागु व आः थ्वयां अप्वः लचक जुइगु ला थाय् हे मदयेधुंकूगु खँ कनादीगु दु। थौं प्रमं हे ई माग याःगुलिं वार्ता गम्भीर जूगु अनुमान सूत्रं याःगु दु ।
राकेश सुदं छुं धया थकल लाकि?
थौं सुथय् प्रधानमन्त्री समेत स्वंगू दलया शीर्ष नेतातय् बैठक च्वने स्वयां न्ह्यः हे नेपाःया निंतिं भारतीय राजदूत राकेश सुदं वालुवाटार वनाः प्रधानमन्त्री माधव नेपालयात नापलानादीगु खः। वय्कःपिनि दथुइ जूगु खँल्हाबल्हाया विवरण पिहां मवःनिसां वार्ताय् राजदूत सुदं आः समस्या समाधानया लागिं प्रधानमन्त्रीं हे पहल याना बी माली धकाः इनाप याःगु खँ सूत्रं धाःगु दु। लिसें वय्कलं छुं जुयाः माधव नेपालं राजीनामा बिल धाःसा वयां लिपा सु वइ धकाः न्हूम्ह प्रधानमन्त्रीया बारे नं चिउताः प्वंकूगु खँ सीदुगु दु ।
