हाकनं सक्रिय जुया वःम्ह पुलांम्ह जुजु

देशय् राजनीतिक लकस गन्जागोल जुयाच्वंगु इलय् उकिया लबः कयाः जनतायात प्रभाव लाकेगु मनसाय ज्वनाः पुलांम्ह जुजु ज्ञानेन्द्र शाह हानं छक्वः 'देश दौडाहा' लय् ब्वाँय् जूगु दु। जेठया कडा निभाःयात वास्ता मयासे वय्कलं नेपालगंजया पदयात्रा सम्पन्न यानादीगु दुसा उगु इलय् अन थीथी राजनीतिक मनूतय्त नापलानाः देशया अवस्थायात कयाः सहलह नं यानादीगु दु। छम्ह सामान्य नागरिकया हैसियतं देशया अवस्था प्रति चिउताः तयेगु पूर्ण अधिकार वय्कःयाके दु तर उकियात देशय् हानं राजतन्त्र लित हयेगु अवसरय् हिलेगु हक धाःसा वय्कःयात देय्या कानून, संविधान व राजनीतिक लकसं नं बियातःगु मदु। उकिं वय्कलं 'राजा आउ, देश बचाउ' धइगु नारा थ्वयेकाः गुगु देश भ्रमण यानाच्वन, व पूर्ण रुपं असंवैधानिक खः। वय्कःया थज्याःगु ज्याय् राज्यं तुरुन्त हस्तक्षेप यानाः पनेगु कुतः यायेमाःगु खः तर नेपाःया राज्ययन्त्रया विडम्बना थ्व जुयाच्वन कि छम्ह गैर संवैधानिक ज्या याः वयाच्वंम्ह मनूयात ज्वनेगु पलेसा प्रशस्त सुरक्षा बियाः 'राजकीय सम्मान' प्रदान यायेगु ज्या जकं यानाच्वन ।

वास्तवय् पुलांम्ह जुजु ज्ञानेन्द्रया थथे मनोबल थहां वःगु स्वय्म थःगु हे कारणं मखु। राजतन्त्र मदयेधुंकाः सत्ताय् वःपिं राजनीतिक पार्टीतय् ज्या, पहः व आचरण खनाः वय्कःया मनोबल थहां वःगु जुइमाः। नेतातय् पहःया कारणं हानं जुजुप्रति हे आस्था तइपिं मनूत थ्व इलय् छुं भचा पक्का हे अप्वःगु दयेमाः। उकिं पुलांम्ह जुजुयात लोकप्रिय जुइगुपाखें पनेगु खःसा नेतातय्सं थःपिंत सुधार यायेमाल। व्यक्ति व पार्टी स्वयां देशयात च्वय् तयाः बिचाः यायेमाल ।

More Stories Like this