राष्ट्रपति व प्रधानमन्त्री तकं व्यस्त

कन्हय् २५५४ क्वःगु बुद्ध जयन्ती

२५५४ क्वःगु बुद्ध जयन्ती दँय्दसं थें थुगुसी नं तःजिक न्यायेकेगु तयारी जुयाच्वंगु दु। थुगुसीया बुद्ध जयन्तीइ राष्ट्र प्रमुख डा. रामवरण यादवंनिसें कयाः प्रधानमन्त्री माधव नेपाल व मेपिं नं आपालं मन्त्रीत सहभागी जुयादीगु ग्वसाः दु ।

यलय् राष्ट्रपति:
यलया गुजि बहालय् जुइगु बुद्ध जयन्ती समारोहय् राष्ट्रपति डा. रामवरण यादव सहभागी जुयादीगु ज्याझ्वः दु। थौं अन जुइगु छगू ज्याझ्वलय् राष्ट्रपति यादवं समारोहया उलेज्या नापं बौद्ध ध्वाँय् ब्वयेकेगु व बुद्ध प्रतिमाया सार्वजनीकरण यानादी ।

बुद्ध जयन्तीया लसताय् स्वन्हुयंकं जुइगु ज्याझ्वः गुजिबहालय् म्हिगःनिसें शुरु जुइधुंकूगु दु। म्हिगः न्हापांगु हिदान, ज्ञानमाला भजन, धर्मदेशना व दछियंकं जूगु थीथी ज्याझ्वः क्वचायेकेगु ज्या जूगु खः। लिसें २१ फिट तजाःम्ह बुद्ध मूर्तिया दाता आजु पूर्णबहादुर शाक्य, लामा गुरु, मय्जु छिरिङ्ग ग्यालेकयात हनेज्या नं जूगु खः। हिदान ज्याझ्वलय् ११३ म्हेस्यां हिदान यानादीगु खःसा ज्ञानमाला भजनय् थीथी त्वाःया खलःतय्सं ब्वति काःगु खः। ज्याझ्वः बुद्ध जयन्ती समारोह समितिया नायः जगतमुनि शाक्यया सभापतित्वय् जूगु खः। ज्याझ्वः कथं थौं राष्ट्रपतिपाखें बौद्ध ध्वाँय् ब्वयेकेगु व कन्हय् बुद्ध जयन्ती कुन्हु बुद्ध मूर्ति सहित पदयात्रा यानाः देय् चाःहिलीगु ग्वसाः दु ।

आनन्दकुटीइ प्रधानमन्त्री:
उखे येँया स्वयम्भुइ च्वंगु आनन्दकुटी विहारय् जुइगु बुद्ध जयन्तीया मू ज्याझ्वलय् प्रधानमन्त्री माधव नेपालं ब्वति कयादीगु जूगु दु। बुद्ध जयन्ती समारोह समितिया ग्वसालय् जुइगु उगु ज्याझ्वलय् प्रधानमन्त्री माधव नेपाल नापं संविधानसभाया अध्यक्ष सुभाष नेम्बाङं नं संवोधन यानादीगु ग्वसाः दु ।

बुद्ध जयन्ती कुन्हु आनन्दकुटी विहारय् बुद्धया अस्थि धातु ब्वयेगु निसें कयाः क्षिर दानया ज्याझ्वः जुइ। ज्याझ्वलय् नेपाःस्थित थीथी बौद्ध देय्या राजदूततय्सं नं ब्वति कयादी ।

सिरपाः त्याकूपिंत हना:
बुद्ध जयन्तीया हे झ्वलय् लाकाः धर्मकीर्ति बौद्ध अध्ययन गोष्ठी सीघः विहारपाखें पंचवीर सिरपाः त्याकेधुंकूपिं गोष्ठीया दुजः भाजु मय्जुपिंत हनेगु ज्या यात। धम्मवती गुरुमांया निर्देशनय् प्रफुल्लकमल ताम्राकारया संयोजनय् उगु हनेज्या जूगु खः ।

उगु ज्याझ्वलय् भिक्षु अश्वघोष महास्थविरं खादागा क्वखायेकाः बुद्ध मूर्ति लःल्हासें हनाबिज्याःगु खः। ज्याझ्वलय् भिक्षु अश्वघोष नापं सिरपाःया दाता पञ्चवीर सिं तुलाधर, सिरपाः त्याकेधुंकूपिं मय्जुपिं लोचनतारा तुलाधर व रीना तुलाधरपिंसं नुगःखँ प्वंकादीगु खः ।

'सन्ध्या टाइम्स' न्हिपती पिहां वइगु बुद्ध धर्म सम्बन्धी बांलाःगु च्वसुयात दँय्दसं बीगु याना वयाच्वंगु उगु सिरपाः आः तक धर्मकीर्ति बौद्ध अध्ययन गोष्ठीया दुजःपिं लोचनतारा तुलाधर, रीना तुलाधर, राजा शाक्य, विजयलक्ष्मी शाक्य, डा. सुमनकमल तुलाधर, उत्तमराज शिलाकार व प्रेमलक्ष्मी तुलाधरपिंसं त्याकेधुंकूगु दु ।

बहुभाषी कविता गोष्ठी:
बुद्ध जयन्तीया हे लसताय् बुद्ध जयन्ती समारोह समितिया बौद्ध कवि गोष्ठी उपसमितिया ग्वसालय् आइतवाः छगू विविध भाषाभाषी बौद्ध कवि गोष्ठी नं जुल। बेटी वज्राचार्य संयोजक जुयाः न्ह्याकूगु उगु कवि गोष्ठीइ थीथी कवितय्सं बौद्ध कविता पाठ यानादीगु खः ।

छवाःयंकं ज्ञानमाला:
उखे येँया श्रीघः ज्ञानमाला भजन खलकं बुद्ध जयन्तीया लसताय् छवाः यंकं ज्ञानमाला भजन हालेगु ज्याझ्वः दयेकूगु दु। थ्व झ्वलय् ज्ञानमाला भजन शुरु हे जुयाच्वंगु दुसा आः बुद्ध जयन्ती कुन्हु ब्याच इनेगु व बुद्ध मूर्ति देय् चाःहीकेगु ज्याझ्वः यायेत्यंगु दु। वकुन्हु सनिलया ४ बजे बाजं सहित बुद्ध प्रतिमायात देय् चाःहीकेगु व बहनी दिपावली यानाः भजन हालेगु ज्याझ्वः दु ।

वेब साइटय् त्रिपिटक:
बुद्ध धर्मया महान ग्रन्थ त्रिपिटक नेवाः भासं आः वेब साइटय् स्वये ब्वने फइगु जूगु दु। बौद्ध विद्वान भाजु दुण्डबहादुर वज्राचार्यया कुतलं थ्व ज्याःगु जूगु खः। वेब साइटय् त्रिपिटक स्वयेगु खःसा उकिया ठेगाना - www.tipitakanepal.org
खः। म्हिगःया 'सन्ध्या टाइम्स' य् भाजु दुण्डबहादुर वज्राचार्यं च्वयादीगु च्वसुइ थुगु ठेगाना त्वःफिनाच्वंगुलिं उकियात नं भिंकादीत इनाप याना ।

पिने पिने ज्याझ्वः:
बुद्ध जयन्तीया लसताय् बुद्ध बूगु थाय् लुम्बिनीइ धाःसा लुम्बिनी दिवस धकाः ज्याझ्वः याइ। लिसें स्वनिगलं पिने काभ्रे, पाल्पा, कास्की, झापा, धनकुटा, सुनसरी आदि जिल्लाय् नं बुद्ध जयन्ती तःजिक न्यायेकेगु तयारी जुयाच्वंगु दु। अथे हे नेपालं पिने अमेरिका, बेलायत आदि देशय् च्वंपिं नेपाःमितय्सं नं बुद्ध जयन्ती न्यायेकेगु कुतः यानाच्वंगु दु। संसारया थीथी बौद्ध देशय् सरकारीस्तरं हे अतिकं भव्यनक्सां बुद्ध जयन्ती हनीगु ला स्वाभाविक हे जुल ।

More Stories Like this