म्याद थपे मजूसा फुक्कं भंग

जेठ १४ न्हिनय् १२ बजे तकया ई

येँ (सन्ध्या टाइम्स)/संविधानसभाया सभामुख सुभाष नेम्बाङं यदि आः वइगु जेठ १४ गते तकया दुने नं संविधानसभाया म्याद थपे मजुल धाःसा संविधानसभा, संसद व सरकार स्वंगुलिं निकाय भंग जुइगु खँ कनादीगु दु।
थौं सुथय् जूगु नेपाल आदिवासी जनजाति महासंघया अन्तर्क्रिया ज्याझ्वलय् न्ववासें वय्कलं थ्व खँ धयादीगु खः।
वय्कलं धयादिल, 'जेठ १४ गते न्हिनय् १२ बजे तक ई दु। अबलय् तकया दुने नं यदि संविधानसभाया ई थपे मजुल धाःसा संसद व संविधानसभा स्वतः भंग जुइ ।' वय्कलं तनादिल, 'वयांलि सभासद् व प्रधानमन्त्री नं पदमुक्त जुइ ।
'
संविधानसभा भंग लिपा देशय् कामचलाउ सरकारं ज्या याइगु खँ नं वय्कलं धयादिल । देशय् कामचलाउ सरकार वयेधुंकाः उगु सरकारं विघटन जुइधुंकूगु निकायतय्त पुनर्वहाली नं याये मफइगु खँ नं वय्कलं स्पष्ट यानादिल।
देशय् थज्याःगु अवस्था मवयेकेगु खःसा आः फुक्कं दलत जानाः संविधानसभाया म्याद थपे यायेगु धकाः सहमति यायेगु बाहेक मेगु छुं हे उपाय मदुगु खँ नं सभामुख नेम्वाङं धयादीगु दु ।

हानं छक्वः अन्तिम कुतः
अन्तिम इलय् वयाः जूसां सहमति कायम यायेगु धकाः स्वंगू पार्टी दथुइ थौं सुथय् च्वनेमाःगु बैठक न्हिनय् १ बजे तकं मच्वंनि। बैठकया लागिं सःता हइ धकाः एमाले पियाच्वंगु दुसा कांग्रेस व माओवादीं छुं लिसः बिया महःगुलिं बैठक च्वने फयाच्वंगु मदुनि। माओवादीपाखें यदि सहमति जुइवं प्रधानमन्त्रीं राजीनामा बीगु ग्यारेन्टी दुसा संविधानसभाया म्याद थपे याकेगु सन्देश छ्वयाहःगु दुसा प्रधानमन्त्रीं सहमति जुइवं हे राजीनामा बिया बी धकाः बचं बियाछ्वःगु खँ सूत्रं धाःगु दु ।