याकनं संविधान वयेकेत नं हाकुगु न्हि

येँ महानगरपालिकाय् नेवाः भाय्यात नं बिउगु छ्यलाबुला भाय्या मान्यतायात सर्वोच्च अदालतं खारेज याना बिउगु न्हियात नेवाः लगायत देय्या सकलें आदिवासी जनजातितय्सं हाकुगु न्हिया रुपय् लुमंकेगु याना वयाच्वंगु दु। उगु हाकुगु न्हि थुगुसी नं जेष्ठ १८ गते न्ह्यःने वयाच्वंगु दुसा उगु न्हियात लुमंके कथं नेवाः स्वायत्त राज्य मंकाः संघर्ष समितिं थीथी ज्याझ्वः याइगु जूगु दु। उकिया ज्याझ्वः सार्वजनिक नं जुइधुंकल ।

थौं नेपाः न्हूगु संविधान ज्वनाः न्हूगु हे युगय् प्रवेश जुइगु तयारीइ दुसां उगु ज्याया न्ह्यःने आपालं पंगःत वयाच्वंगुलिं न्हूगु नेपाः निर्माणया प्रक्रिया दथुइ तुं थानाच्वंगु अवस्था दु। छुं जुयाः थ्व पंगःयात चीकाः न्ह्याः वने मफुत व न्हूगु संविधान निर्माण मजुल अथवा पंगःत कायम हे यानाः न्हूगु संविधान दयेकल धाःसा झीगु ल्हातय् संविधान ला वइ तर उकी हाकुगु न्हि धाःसा कायम हे जुयाच्वंगु दइ। झीत आः हाकुगु न्हि मदुगु संविधान मालाच्वंगु दु। वास्तवय् सकलें आन्दोलनकारी दलत जानाः दयेकूगु अन्तरिम संविधान तकं भाषाया दृष्टिकोणं गुलि हाकु धइगु खँ उपराष्ट्रपतिया शपथ ग्रहण प्रकरणं बांलाक हे क्यना बिल। संविधानं क्यना बिउगु जक मखु, उकियात पूर्ण रुपं समर्थन याइपिनिगु भिडं नेपाःया आदिवासी जनजातिया हाकुगु न्हि हुया वनेत अझ नं ई काइतिनि धइगु खँ नं प्रस्ट हे याना बिल। न्हूगु नेपाः अज्याःगु हाकुगु न्हि रहित जुइमाः धकाः दवाव बीगु लागिं नं झी नेवाः लगायत सकलें जनजातितय्सं थौं नं हाकुगु न्हि हने मालाच्वंगु दनि। थुकियात ताःलाकेगु हे न्हूगु संविधान बांलाक वयेके बीत लँपु चायेकेगु खः ।

More Stories Like this