वेब साइटय् नेपालभाषाया त्रिपिटक

दुण्डबहादुर वज्राचार्य

बुद्धवचन त्रिपिटक विश्वया थीथी बौद्ध देशतय्सं थथःपिनिगु भाषां आधुनिक संचार माध्यम वेब साइटपाखें बहुजन हिताय बहुजन सुखायया नितिं प्रचार यानाच्वंगु जुल। थ्वहे सन्दर्भय् बुद्ध जन्म जूगु देश धकाः गौरव तायेकाच्वंपिं नेपाःमितय्सं थुगु सम्बन्धय् छु याःगु दु धकाः न्ह्यसः दने फुगु जुल। सरकारी, गैर सरकारी अथवा जनस्तरं थुगु खँय् ध्यान बिउगु खने मदु। थःत बौद्ध धायेका जूपिंसं नेपाःया पुत्र गौतम बुद्धयागु वचन ब्वनाः, न्यनाः, बहुश्रुत जुयाः लाभान्वित जुइ फयाच्वंगु खने मदु। नेपाःया पुत्रया ज्ञानयात अन्य देशं सदुपयोग यानाच्वंगु जुलसा ठीक थुकिया अःखः नेपाःमितय्सं बुद्धं क्यंगु ज्ञान प्राप्त यायेगु अवसरं बञ्चित जुइकाच्वने माःगु जुल ।

थ्व हे खँयात वाःचायेकाः गत स्वंगू प्यंगू दशकंनिसें थुगु क्षेत्रय् थःत पानाः त्रिपिटकया झन्डै चकंछि भाग अनुवाद यानाः पिकायेगु अनुभव दुम्ह, वीर-पूर्ण पुस्तक संग्रहालयया अध्यक्ष एवं प्रस्तुत च्वमिया ग्वसालय् थ्वहे वंगु २०६६ पौष २१ गते नेपाःया वरिष्ठ विद्वानपिं भन्तेपिं व गुरुमांपिनिगु छगू बैठक जुल। उगु बैठकय् त्रिपिटकया आः तक अनूदित मजूनिगु ग्रन्थत नेपालभाषां यायेगु प्रस्ताव तःगु जुल ।

थुकियात माःगु व्यवस्थापन व आवश्यक व्ययभार वीर-पूर्ण पुस्तक संग्रहालयपाखें जिम्मा काःगु खः। ई-बुकया ल्याखं त्रिपिटकया सम्पूर्ण ग्रन्थ तयार यायेगु उगु प्रस्तावयात उपस्थित बैठकं सहर्ष अनुमोदन याःगु खः। योजना कथं छम्ह छम्हेसिनं छगू छगू ग्रन्थया ब्व अनुवाद यायेगु अभिभारा नं उगु बैठकय् उपस्थित जूपिंसं काःगु जुल ।

न्हापांगु बैठकया सभापतित्व श्रद्धेय धर्माचार्य भिक्षु ज्ञानपूर्णिक महास्थविरं यानाबिज्याःगु जुलसा निगूगु बैठक त्रिपिटकाचार्य भिक्षु कुमार काश्यप महास्थविरं यानाबिज्याःगु खः। अनुवादकपिंत संयोजन यायेगु कार्यभार भिक्षु कोण्डन्यं कयाबिज्यातसा अनुवाद मण्डलय् भिक्षु ज्ञानपूर्णिक महास्थविर, भिक्षु धर्मगुप्त महास्थविर, भिक्षु धर्ममूर्ति, भिक्षु राहुल, भिक्षु उपतिष्य, भिक्षु भद्दिय, भिक्षु पञ्ञारत्न, भिक्षु पञ्ञासार, भिक्षु प्रियदस्सी, भिक्षु सरणंकर, अनागारिका अग्गन्याणी, अनागारिका विमलन्याणी व प्रस्तुत च्वमि जुल ।

त्रिपिटक अन्तर्गत सुत्तपिटक, विनयपिटक व अभिधम्मपिटक स्वथी दुगु मध्ये नेपाल भाषां अनुवाद मजूनिगु सुत्तपिटकया निगू ग्रन्थत महानिद्देस व अपदानया छुं अंश खःसा महानिद्देस अग्गन्याणी गुरुमां नं अनुवाद यायेगु जिम्मा कया बिज्यातसा अपदानया पूमवंगु पूवंकेगु अंश अनुवादक भिक्षु धर्ममूर्तिं जिम्मा कयाबिज्यात। पूरा पूरा रूपं अनुवाद याये ल्यं दनिगु विनयपिटक व अभिधम्मपिटकयात नं निगू अलग पुचः दयेकाः हप्ता हप्ताय् बैठक च्वनेगु क्वःजित। प्रत्येक बैठकय् थथःपिंसं याना हःगु सिधःगु अनुवादया प्रारूप प्रस्तुत यायेगु ज्या जुया च्वंगु जुल। अनुवादया गति थौंतकं सन्तोषजनक कथं न्ह्यानाः प्रगती जुयाच्वंगु जुल ।

त्रिपिटकयात ई-बुकया रूपय् विकास यानाः उकियात वेब साइटय् तयाः प्रचार यायेगु उद्देश्य अनुरुप वीर-पूर्ण पुस्तक संग्रहालयं न्हापा न्हापाया प्रकाशित त्रिपिटक ग्रन्थतय्गु कम्प्यूटर डाटात हानं तयार यानाच्वंगु दु। उकिं हानं जिमिगु संग्रहालयपाखें प्रकाशित जुइ धुंकूगु अथवा जुइमानिगु अथवा अन्य प्रकाशकपिनिपाखें प्रकाशित जूगु त्रिपिटकीय ग्रन्थतय्गु डाटात खोज यानाः मुंकेगु अथवा न्हूगु हे दयेकाः उकियात एमा फाइलय् रूपान्तरित यायेगु ज्या यानाच्वंगु नं जुल ।

पुस्तक संग्रहालयया लक्ष्यकथं करिब निदँया दुने प्राथमिक अनुवाद तयार यायेगु, अनंलि उकियात संशोधन, परिमार्जन याना यंकेगु अले हानं योग्यपिं सम्पादकपिनि ल्हातं अन्तिम प्रारूप तयार यानाः, माला वन धाःसा पुस्तककार बी बहः जुइक तयार यायेगु खः। हाल जिमिसं वीर-पूर्ण पुस्तक संग्रहालयया छगू मेगु योजनाकथं नेपाःया छगू प्राचीन बौद्ध लिपि, गुगु कि उत्तरीय बौद्ध देशय् धम्म अध्ययनया निंतिं विहार, गुम्बा आदि शिक्षण संस्थानय् परम्पराकथं थौंतक थुगु लिपि सयेके माःगु अनिवार्य जुयाच्वंगु जीवन्त परम्परा दु, उगु पुलांगु रञ्जना लिपिस पालि त्रिपिटक तयार यायेगु लक्ष्य नं दुगु जुल। भविष्यय् थुकियात वेब साइट मार्फत विश्वयात पालि त्रिपिटक क्यने फइगु जुल। थ्व झी नेपाःमि सकलयात गौरवया विषय खः। थुकिया निंतिं ताइवानय् यक्व वर्ष च्वनाः छम्ह नेवाः जुयाः नं चाइनीज भाषां त्रिपिटक ग्रन्थत अनुवाद यानाः अद्वितीय योगदान यानाबिज्याःम्ह तथा थुगु परियोजनाया निर्देशक श्रद्धेय धर्मगुप्त महास्थविर चांन्हिं थुगु क्षेत्रय् लगे जुयाबिज्यानाच्वंगु जुल। वसपोलयात जिमिपाखें सदां शुभकामना सहित वन्दना दु ।

अन्तय् स्वांयाः पुन्हिया लसताय् मानव मात्रया कल्याणया भिंतुसे जिमिगु वेब साइटया ठेगाना बियागु जुल ।

More Stories Like this