म्याद मतनेत ११ दल सहमत
माओवादीपाखें अन्तिम इनाप अस्वीकार
येँ (सन्ध्या टाइम्स)/संविधानसभाया दकलय् तःधंगु दल माओवादी लगायत झिंछगू राजनीतिक दलं यथास्थितिइ संविधानसभाया म्याद थप याये फइ मखु धकाः निर्णय याःगु दु। गबलय् तक प्रधानमन्त्री माधव नेपालं राजीनामा बियाः राष्ट्रिय सहमतिया सरकार दयेकेत लँपु चायेकी मखु अबलय् तक संविधानसभाया म्याद थप यायेगुया छुं अर्थ मदु धकाः नं क्वःछिउगु दु। थौं सुथय् च्वंगु झिगू दलया बैठकं थ्व निर्णय याःगु खः ।
माओवादीया केन्द्रीय ज्याकुथी च्वंगु उगु बैठकं राष्ट्रिय सहमतिया नितिं न्हापां प्रधानमन्त्रीं राजीनामा बीमाः धकाः निर्णय याःगु खँ बैठकय् दुथ्याःम्ह छम्ह नेतां 'सन्ध्या टाइम्स' यात कनादिल। बैठकय् सरकारपाखें संविधानसभाया च्याक्वःगु संशोधन धकाः संविधानसभाया म्याद दछि थप यायेगु गुगु विधयेक प्रस्तुत याःगु खःसा उकियात नं असफल यायेगु बारे सहलह याःगु खः ।
संविधानसभाया म्याद मेगु दछि थपे यायेगु धकाः दर्ता याःगु विधेयक विरुद्ध माओवादीं मेगु प्रस्ताव दर्ता यायेधुंकूगु दु।
यदि राष्ट्रिय सहमतिया सरकार दयेकेगु ग्यारेन्टी जूसा जक म्याद थपया प्रस्तावय् थःपिं वनेगु धकाः उगु बैठकं निर्णय याःगु खः। सूत्रं धाः कथं माओवादीं तयाच्वंगु थ्व प्रस्तावया विरोधय् दकलय् कडा रुपं नेपाली कांग्रेस प्रस्तुत जुयाच्वंगु दुसा कांग्रेस यदि थुकी तयार जुल धाःसा एमाले नं तयार जुइफु धाःगु दु ।
उखे सत्तारुढ नेपाली कांग्रेस व नेकपा (एमालें) धाःसांविधानसभाया म्याद थप यायेगु नितिं थौं माओवादीयात अन्तिम इनाप याइगु जूगु दु। माओवादीं प्रधानमन्त्रीं राजीनामा मबीकं संविधानसभाया म्याद थपे यायेगु जुइ मखु धइगु शर्त तया वयाच्वंगु खःसा कांग्रेस व एमालेया शीर्ष नेतातय् दथुइ थौं सुथय् जूगु बैठकं माओवादीयात अन्तिम इनाप यायेगु निर्णय याःगु खः। नेकां व एमालेया थ्व प्रस्ताव लिपा स्वंगू तःधंगु पार्टीया बैठक नं थौं न्हिनय् च्वंगु दु। उगु बैठकय् एमाले व कांग्रेसं याःगु 'अन्तिम इनाप' यात माओवादीं अस्वीकार याःगु दु।
प्रधानमन्त्री निवास वालुवाटारय् जूगु सहलहया झ्वलय् निगुलिं पार्टीं मंकाः कथं इनाप यायेगु सहमति जूगु खः। सहलहय् सरकारं पेश याःगु संविधानया च्याक्वःगु संशोधन विधयेक विरुद्ध माओवादीं दर्ता याःगु विरोधया सूचनायात विफल यायेगु खँ जूगु दु ।
