सफल वक्ता जुइगु इच्छा दु तर.....

सृजना कंसाकार

पब्लिकय् न्ववायेगु धकाः नां जक कायेवं हे ग्यानाः नुगः थुरुरु खाः ला? धन्दा कयादीम्वाः, छि याकःचा जक मखु, छि थें, जि थें अझ धाये झी थें पुचलय् न्ववाये ग्याःपिं मनूत यक्व हे दु। तर न्ववाये ग्याः धायेवं लिचिलादी चाहिं मते। छाय्धाःसां छिं न्ववायेगु जरुरी जू। छि छम्हेसियां छक्वः न्ववायेवं गुलि मनूतय्त तुंथी कुतुंवनाच्वंगु नुगः थहां वः थें जुइफु। गथः चिनाच्वंगु नुगः ब्यं थें जुइफु। थ्व ला जुल भावनात्मक फाइदा। मेगु खँ, छिं न्ववाःगु कारणं गुलि महत्वपूर्णगु सुचं प्रवाह जुइफु। अझ प्रतियोगिता, गोष्ठी, समारोह थन तक कि डान्स पार्टी, ब्यूटी कन्टेस्ट, एवार्ड, फेशन आदि इत्यादि छुं नं ज्याझ्वलय् मनूतय्गु ध्यान आकर्षण यानाः अझ अर्थपूर्ण व मनोरञ्जनात्मक वातावरण ब्वलंकेफइ ।

एमटिभि, भिटिभि वा मेमेगु छुं नं टिभि वा रेडियो च्यानल हे छाय् मजुइमा, दक्वली थ्वयाच्वनीगु म्येँ वहे खः। तर गुम्ह आरजे वा भिजें न्ह्यइपुसेच्वंगु खँ स्वानाः अनेक हाउभाउ यानाः न्ह्यब्वइ, वहे ज्याझ्वःप्रति मनूत आकर्षित जुइ। गुगु ज्याझ्वःया प्रस्तोता दमदार जू व धमाकापूर्ण प्रस्तुतीकरण यायेफइ, वहे यक्व हिट जुइ। एवार्ड फेशनयागु हे खँ ल्हायेगु खःसां उद्घोषकयागु प्रभावशाली प्रस्तुतीकरणं हे दर्शकत मोहित जुइ। ब्यूटी कन्टेस्ट, एवार्ड फेशन थेंजाःगु ज्याझ्वलय् उद्घोषण याइपिंत मास्टर अफ सेरेमोनी (एमसी) धाइगु खः। अथेहे छगू व्यावसायिक कम्पनीया हे दसु कायेगु खःसां अन उच्च शैक्षिक व प्राविधिक योग्यता दुपिं दक्ष व सक्षम कर्मचारीत यक्व दइ। तर मासय् बांलाक न्ववायेफुम्ह कर्मचारीया अभावया कारणं कम्पनीयात माःगु प्रस्तुतीकरण यायेत पिनें मनू सःते मालाच्वनी। गथेकि सुचं बीत, कर्मचारी वा उपभोक्ताया न्ह्यःने उत्पादन न्ह्यब्वयेत, रिपोर्ट, प्रोपोजल न्ह्यब्वयेत, सिरपाः इनेत, दँमुज्या यायेत आदि इत्यादि ।

छता खँ ग्यारेन्टी दुकि छिं खँल्हाये फुसा न्ववाये नं फइ। तर थुकिया नितिं पूर्व तयारी मयासे मगाः। गुकिं यानाः छिगु ९० प्रतिशत स्वयां अप्वः ग्याःचिकु मदयेके फइ ।

थःगु भाषण अथवा न्ववाये माःगु खँ गबलेनिसें तयार यायेमाः धइगु बारे छुं खास नियम वा ई मदु। उत्कृष्ट विचाः व अन्तरआत्मां पिहां वइगु सः गबलें नं प्रस्फुटित जुइफु। भाषण अबलय् च्वयेमाः गबलय् छिगु जोश व जाँगर च्वकाय् लानाच्वंगु दइ, चाहे छिगु भाषण बीगु तिथि थौं स्वयां खुला लिपा हे छाय् मजुइमा। गन तक यःगु विषयनाप सम्बन्धित खँत मुंके फइ, व ज्या याना हे छ्वयेगु ।

थः दर्शकया बारे छुं महत्वपूर्ण खँ सीकेगु गबलें ल्वःमंके मजिउ। आम दर्शकया उमेर, पेशा, शैक्षिक योग्यता, सामाजिक जीवनस्तर, उमिगु धर्म, आदर्श, विश्वास छुकी दु आदि थेंजाःगु दर्शकया पृष्ठभूमि बारे सीकेगु जरुरी दु ।

थम्हं गुगु विषयस न्ववाये त्यनागु खः, व तसकं स्पष्ट जुइमाः। छु छु प्वाइन्टयात आधार तयाः न्ववायेत्यनागु खः, उकिया आउटलाइन च्वये जिउ। थथे मुख्य प्वाइन्टयात आधार तयाः न्ववायेबलय् बनावटी खने दइमखु। तर छगू छगू खँग्वः व वाक्य च्वयाः ब्वनेबलय् वा घोके यानाः न्ववायेबलय् न्यनीपिंत मज्जा वइ मखु। तर छुं छुं औपचारिक भाषण च्वयाः हे ब्वने मालेयः। घोके यानाः न्ववायेगु खतरां खाली मजू। भतिचा नर्भस जुल धाःसा दक्व खँ ल्वःमनेफु ।

आःतक छिं भाषण गथे यानाः तयार यायेगु खः, व सिल तर पब्लिक स्पिकिङ्गया बारे ५० प्रतिशत खँ तिनि सिल। ल्यं दनिगु ५० प्रतिशत खँ अझ नं सीके बाँकी दनि। छाय्धाःसा मासय् न्ववायेबलय् दर्शकं छिगु खँ न्यनाच्वंगु दइ, स्वया नं च्वंगु दइसा छिं दर्शकनाप कम्यूनिकेसन नं यानाच्वंगु दइ।
शुरु शुरुइ दक्वं नर्भस जइ। न्हूगु चीज नं यायेत्यंगु दु, उकिं ला नर्भस जूगु खः। छक्वलं यक्व मनूत खनीबलय् नर्भस जुइगु स्वाभाविक खः। उकिं भचा न्हापां हे थ्यंकेगु, अले प्रस्तुतकर्ता ९ज्यकत० नाप हाइ, हल्लो याना छ्वयेगु नापं मेपिं म्हसिउपिं दुसा उमित नं वनाः खँ ल्हायेगु। थुलि यायेधुंकाः छिगु नर्भसनेस छुं हद तक म्हो जुइधुंकी। अप्वः यानाः पब्लिक स्पिकरपिनिगु सुझाव थ्व दुकि लगातार च्यान्हु झिन्हु मासया न्ह्यःने दनाः न्ववाये धुनकि नर्भसनेस अथें तनावनी। तर थ्व अवस्था पार यायेधुंकूपिंके थ्व 'ओभर कन्फडेन्स' अप्वयावनीगु स्वाभाविक खः कि उलिमछि मनूतय् न्ह्यःने जि याकःचा दनाः नर्भस मजुसे थथे फरर न्ववायेफु। जि सफल वक्ता जुल। दर्शकया नितिं छि महत्वपूर्ण व्यक्ति मजुइफु। तर छिगु नितिं अन उपस्थित प्रत्येक मनूत महत्वपूर्ण जू। उपस्थित छम्ह छम्ह दर्शकयात ध्यानय् तयाः न्ववाये मसलकि दर्शकं छितः महत्व बी मखु ।

पब्लिक स्पिकिङ्गया मेगू छगू महत्वपूर्ण पक्ष खः - थः स्वयाः न्ह्यःयापिं वक्तातय्सं छु छु न्ववात, व ध्यानपूर्वक न्यनेगु। थम्हं छु छु खँ न्ववायेत तयार याना वयागु खः, थःगु पाः वइबलय् तक व अर्थपूर्ण जइगु खःला वा मखुला बिचाः यायेमाः। सफल वक्ता जुइगु खःसा होशियार श्रोता नं जुइ सयेकेमाः। होशियारपूर्वक न्यनाः हे तिनि तनेमाःगु खँ तनेगु व चीकेमाःगु खँ लिकयाः चटपटे मसालेदार भाषण तयार यायेफइ। तर छिगु भाषण दकलय् लिपा लात वा तसकं लिबायेधुंकल व दर्शकतय्त त्यानुइधुंकल धाःसा थःगु भाषण चीहाकः याये नं सयेकेमाः ।

लुमंकादिसँ, थः स्वयां न्हापायापिं वक्तातय्सं न्ववाःगु खँया बारे गबलें नं मूल्यांकन वा टिकाटिप्पणी यानाः न्ववायेगु मखु। मूल्यांकन यायेगु ज्या दर्शकयागु खः, वक्तायागु मखु। थुकिं छिगु प्रभाव अप्वया वनी मखु, बरु म्हो जुइ। न्ह्याबलें सरल भाषा छ्यलेगु ताकि दक्व दर्शकतयसं काचाक्क थुइके फयेमा ।

आः पाः वल, प्रस्तुतीकरणयागु। दबुली वयाः न्ववायेत इनाप यायेसातकि तुरुन्त थः च्वनागु थासं न्ववायेगु थासय् थ्यंकेमाः। तर अन थ्यनेसातकि तुरुन्त न्ववायेगु मखु। पलख दीगु, छकः दर्शकयात स्वयेगु, अले न्ववायेगु शुरु यायेगु। थुकिं दर्शकया ध्यान थःपाखे सालेत ग्वाहालि जुइ। न्ववाये न्ह्यः माइक्रोफोन पाय्छि जू वा मजू, चेक यायेगु। दर्शकत उखे थुखे च्वनाच्वंगु दुसा सःताः न्ह्यःने ग्रुपय् फ्यतुकेगु। थःगु म्हसीका बी माःसा चीहाकय्क व चट्ट च्वंक बीगु ।
प्रत्येक दर्शकनाप आइकन्ट्याक्ट तयाः खँ ल्हायेगु ताकि प्रत्येक दर्शकं थ्व महसुस याये फयेमाः कि जिनाप हे खँल्हानाच्वंगु दु। वा जितः हे कनाच्वंगु दु। धाये कि छिगु न्ववायेगु पाः न्ह्यः नृत्य प्रस्तुत जूगु खः। अबलय् यक्व लाइट फोकस यानातःगु दइ। तर दर्शक च्वनीगु थासय् लाइट अफ यानातःगु दइ। नृत्य सिधयेकाः छि न्ववायेत दबुली थ्यनेधुंकाः नं दर्शक च्वनीगु थासय् लाइट अन मजूनिसा अन्धकारयात थःगु भाषण बियादी मते। न्हापा लाइट अन यानादीत इनाप यानादिसँ। लाइट अन जुइधुंकाः तिनि न्ववायेगु शुरु यानादिसँ। न्ववायेबलय् मूर्ति थें च्वनाः न्ववायेगु मखु। जव, देपा, दथुइ, न्ह्यःने, लिउने च्वंपिं दर्शकतय्त पालंपाः स्वस्वं न्ववायेगु। सम्भव जूसा छपलाः निपलाः न्यासि वनाः न्ववायेगु। फ्लेक्जिबल जुइ सयेकेगु। बडि ल्याङ्गग्वेजय् ध्यान बीगु।
छिं न्ववानादीगु छुं खँय् दर्शकत प्रभावित जुयाः लापा थायेत स्वल धाःसा पलख छि दिनाः दर्शकयात व ह्वःताः बियादिसँ। छिं न्हीकादिल धाःसा दर्शकयात न्हिलेगु ह्वःताः बियादिसँ। न्ववाना च्वँच्वं छुं. अप्रत्यासित घटना जुल धाःसा उकियात बेवास्ता यानादीमते। गथेकि सुं नं मनूत बेहोस जुयाः ग्वतुलेफु। दर्शकतय् दथुइ ल्वापु जुइफु। पर्दा, गमला, टेबुल ग्वःतुलेफु आदि। स्वाभाविक कथं दर्शकया ध्यान उखेपाखे वनी। बरु वहे घटनायात फोकस यानाः न्ववानादिसँ। हानं दर्शकं थःगु ध्यान छिगु भाषणय् केन्द्रित याइ।
आत्मविश्वास अप्वयेकेत ड्रेसकोडय् नं ध्यान बीमाः। मनोरञ्जनात्मक ज्याझ्वः जूसा झिलिमिलि चम्के जूगु वा ग्लेमरस वसः फी फइ। मनोरञ्जनात्मक बाहेक मेगु ज्याझ्वलय् फत्तले ड्रेसकोड भचा सिम्पल हे जुइमाः। तर फाइनल चेकअप याये ल्वःमंके मजिउ। छिगु लंया जिपर खुल्ला जुइफु। लनय् ध्याचः किनाच्वंगु जुइफु। दर्शकया ध्यान धाःसा गन मिले मजू अन हे वनी। छिगु न्ववायेगु आत्मविश्वास व एकाग्रता थ्व कारणं उखेथुखे मजुइमा कि दर्शकया ध्यान भाषणय् मवँसे जिगु लनय् जक छाय् वनाच्वन?
सफल वक्ता उज्वःम्हेसित माने यायेफइ, गुम्हेसिनं दर्शकया ध्यान शुरुंनिसें अन्त तक थःपाखे साला कायेफइ। दर्शकया मन व शरीर निगुलिं हलय् दुने कैद याना तयेफइ। दर्शकया मन भड्के जुयाः हलं पिहां वनेगु ह्वःताः बी हे मखु। छिं छु न्ववानादिल, दर्शकया सायद लिपा ल्वःमनेफु। तर छिं गथे यानाः न्ववानादिल व छिं न्ववानाः दर्शकयात गज्याःगु अनुभव जुल व गबलें ल्वःमनी मखु। भतिचा हिम्मत यानादिल, अभ्यास यानादिल धाःसा न्ह्याम्हं सफल वक्ता जुइ फइ। दर्शकनाप कम्यूनिकेसन यानाः मजा व आनन्द काये फइ। सफल व्यावसायिक वक्ता तक नं जुइ फइ।

More Stories Like this