चीधंगु दलपाखें संसद बहिस्कार

येँ (सन्ध्या टाइम्स)/संविधानसभाय् दुथ्याःगु चिचीधंगु झिंप्यंगू दलतय्सं थौं व्यवस्थापिका संसदया मुँज्या बहिष्कार याइगु जूगु दु। प्रधानमन्त्री माधव नेपालं माओवादीयात लय्तायेकेत जक थम्हं संविधानसभा स्वीकार यानागु धकाः न्ववानादीगु खँयात कयाः आपत्ति प्वंकुसें चिचीधंगु दलया सांसदतय्सं थौं संसद बहिस्कार यायेत्यंगु खः। थौं ३ बजे न्हूबानेश्वरया संविधानसभाया भवनय् संसदया मुँज्या सःताःतःगु खः। अथे हे चिचीधंगु दलतय्सं संविधानसभाया मूमू राजनीतिक पार्टी एकीकृत माओवादी, नेपाली कांग्रेस व एमालेयात संविधानसभाया म्याद थप यायेत नापं राष्ट्रिय सहमति ब्वलंकेत इनाप यानाः थौं हे ज्ञापन पौ लःल्हाइगु धकाः म्हिगःया मुँज्यां क्वःछ्यूगु खः। उगु ज्ञापन पौ लःल्हायेगु निंतिं चिचीधंगु दलया नेतात दुथ्याकाः छगू समिति तकं दयेकूगु दु ।

थौं सुथय् उगु समितिपाखें नेपाली कांग्रेसया उप सभापति नापं संसदीय दलया नेता रामचन्द्र पौडेल व नेकपा (एमाले)या नायः झलनाथ खनालयात नापलानाः ज्ञापन पौ लःल्हाःगु दु। संविधानसभाया म्याद थप यानाः संविधानसभाया माध्यमं हे न्हूगु संविधान दयेकेमाःगु माग याना उगु कथं ज्ञापन पौ लःल्हाःगु खः। ज्ञापन पौ लःल्हानाः कयादिसें संविधानसभा भंग याके मबीगु निंतिं माःगु कथं भूमिका थःपिंसं म्हितेगु जुइ धकाः बचं बियादिसें चिचीधंगु दलं गुगु कथं कुतः यात उकिया निंतिं सुभाय् तकं बियाहःगु खः। अथे हे थौं सनिलय् एकीकृत नेकपा (माओवादी)या नायः पुष्पकमल दाहाल प्रचण्डयात नापलानाः उगु हे कथं ज्ञापनपौ लःल्हाइगु जूगु दु ।