मेघालयं नेपाली मूलयापिंत पितिने मते

नेपालय् संविधानसभा दयेकेगु ज्याय् अन्यौल पिहां वयाच्वंगु इलय् लाक्क भारतया मेघालयय् हानं छक्वः नेपाली मूलया निवासीतय्त अनं पितिना हयेगु ज्या जूगु दु। मेघालयया स्थानीय खासी आदिवासीतय्सं अन वयाः च्वनाच्वंपिं नेपाली मूलया मनूतय्त थःगु लागाय् च्वने मते धकाः पितिनेगु शुरु याःगु खः। थुकिं यानाः आतंकित द्वःलंद्वः नेपाली मूलया नागरिकत थःपिनि निवास त्वःताः जंगलय् बाय् च्वनाच्वंगु दु। उकी मध्ये गुलिखे आः नेपालय् हे बिसिउँ वयेगु तयारी नं जुयाच्वंगु दु ।

मेघालयय् च्वनीपिं नेपाली मूलया नागरिकतय्त पितिना हःगु थ्व न्हापांखुसी मखु। थ्व स्वयां न्ह्यः न्हापा पंचायतकालय् नं पितिना हःगु खः। पितिना हःपिं मनूत नेपाली मूलयापिं जूगु कारणं उमिसं थज्याःगु संकटया इलय् नेपाः लुमंकीगु स्वाभाविक खः। तर थ्व इलय् उमित नेपालं नं छुं याये फइगु अवस्था मदु। नेपालं थुलि हे जक चिउताः क्यनेफु कि आः अनया हे नागरिक जुइधुंकूपिं नेपाली मूलया मनूतय्त पितिने मते। मेघालयया स्थानीय खासी जातिया अधिकारयात झीसं नं स्वीकार यायेमाः। अन च्वनाच्वंपिं नेपाःमितय्सं नं उकियात स्वीकार यायेमाः यदि थवंथवय्या अस्तित्वयात हे अस्वीकार यायेगु खःसा उकिं समाधान पिहां वइ मखु। नेपालय् भारत विरोधी राष्ट्रवाद तच्वयाच्वंगु इलय् मेघालयय् थज्याःगु गतिविधि याकूगु नं जुइफु। उकी नं ध्यान बीमाः। तर यथार्थय् ला छु धायेबलय् नेपाली मूल जक मखु भारतया हे फरक मूलयापिं जूसां नं सुयातं पितिने मजिउ। मेघालय थेंज्याःगु जातीय अतिवादपाखें नेपाःयात नं बचे यायेमाःगु दु। थुकिया लागिं सकलें पक्ष सहमत जुइमाः ।

More Stories Like this