संविधानया लागिं नेवाःतय् दवाव
जेठ १४ गते संविधान जारी यायेगु मखुत धकाः सत्तारुढ पार्टीतय्सं याःगु निर्णययात विरोध यासें नेवाःतयसं दवाव बिउगु दु। थ्व झ्वलय् म्हिगः येँनंनिसें यलय् तक छगू र्याली पिकाल। येँया रत्नपार्क शान्ति बाटिकां शुरु जूगु उगु र्याली भद्रकाली, त्रिपुरेश्वर आदि लागा जुयाः यलय् वंगु खः ।
र्यालीयात कोपुण्डोलय् यलया भाषिक कार्यकर्तातय्सं धिमे थानाः काः वःगु खः। अनंनिसें र्यालीयात लसकुस यासें यलया थीथी लागा चाःहिलेगु ज्या जूगु खः ।
यलया थीथी लागा चाःहिलाः मंगलबजारय् थ्यंकाः र्याली समापन याःगु खः। अन जूगु छगू बःचाधंगु सभाय् र्यालीया ग्वसाः खलः नेवाः स्वायत्त राज्य मंकाः संघर्षया समितिया नायः नरेशवीर शाक्यं संवोधन यानादीगु खः। अन न्ववासें वय्कलं जेठ १४ गते संविधान मबीगु निर्णयया विरोध यासें आः याकनं हे संविधान पित बीमाःगु व उकी नेवाः स्वायत्त राज्यया ग्यारेन्टी जुइमाः धकाः माग यानादिल। लिसें वय्कलं थुकिया लागिं दवाव बीत नेवाःतय्सं संघर्ष जारी याना तइगु खँ नं कनादिल ।
१४ गते संविधान बी मफुगु खँयात विरोध यासें वंगु शुक्रवाः येँया थाय्मरु त्वालय् छगू कोण सभा जुल। नेवाः स्वायत्त राज्य मंकाः संघर्ष समितिया छिगू घटक नेवाः देय् गुथि नेपालमण्डलया ग्वसालय् जूगु उगु सभाय् वाम बुद्धिजीवी श्याम श्रेष्ठं नं संवोधन यासें १४ गते संविधान बी मफुगुया दोषी राजनीतिक पार्टीत खः धयादिल। अन न्ववासें वय्कलं थौं राजनीतिक पार्टीतय्सं संविधान सिबें नं सत्तायात अप्वः महत्व बिउगु कारणं थौं संविधान दयेगु ज्या लिबाः वंगु खः धयादिल ।
सभाय् नेवाः स्वायत्त राज्य मंकाः संघर्ष समितिया नायः नरेशवीर शाक्य, ग्वसाः खलःपाखें नरेन्द्रभक्त हाडा, नेवाः देय् दबूया नायः नरेश ताम्रकार, मिसा नेतृ डा. चुन्दा वज्राचार्य आदिपिंसं संवोधन यानादीगु खः। उगु कोणसभा नेवाःतय्सं शनिवाःया र्यालीइ ब्वति कायेत इनाप यायेगु ताः तयाः याःगु खः ।
More Stories Like this
जातीय संघीयताया खँय् नेमकिपा प्राडो, पाजेरो ब्वाकेगु ख्यः मखु राष्ट्रपति प्रणाली बारे विवाद नेवाःतय्त जागृत याइगु 'नेपाःमिया नुगः सः' खँ स्वनिगःया
