फोरम छाय् अलग्ग च्वन?
* मधेशी मुद्दा नं प्याकेजय् तयेकेगु तयारी
* आपालं भारतीय नेतात नेपालय् / देउवां नं नापलात भारतीय नेतात
येँ (सन्ध्या टाइम्स)/देशय् राजनीतिक अन्यौल तच्वयाच्वंगु इलय् लाक्क हे भारतया थीथी राजनीतिक पार्टीलिसे आवद्ध थीथी तहया नेता कार्यकर्तात येँय् मुनेगु शुरु जूगु दु। तर थुपिं येँय् पशुपतिनाथया दर्शन यायेत वयाच्वंगु धाःसा मखु। नेपाःया थीथी मधेशवादी पार्टीइ च्वनाच्वंपिं 'थःथिति' नेतातय्त प्रभावित यानाः थःपिनि पक्षय् हयेत भारतं थुमित येँय् छ्वया हःगु खँ सूत्रं धाःगु दु ।
थौंकन्हय् येँय् अनुराग श्रीवास्तव, राहुल बडुवा आदि थेंज्याःपिं भारतीय नेतात वयाच्वंगु दु। येँया हायात, द्वारिकाज होटलय् थुपिं टन्न हे जुइक च्वनाच्वंगु दु। थुपिं येँय् वयाच्वंगु सी दयेक हे सरकार विरोधी मधेशवादी पार्टी मधेशी जनअधिकार फोरमं म्हीग आकाझाकां थःपिंसं माओवादी क्याम्प त्वःतागु घोषणा याःगु दु। माओवादीं प्रधानमन्त्रीया राजीनामा मवःसा संविधानसभाया म्याद थपे याये मखु धकाः अडान काःगुलिं थःपिं माओवादी क्याम्प त्वःताः पिहां वयागु खः धकाः त्वहः दयेकूगु खः ।
उपेन्द्र यादव पुचलं आकाझाकां अडान हिलाहःगुलिं आः राजनीतिइ हानं मेगु कथंया मोड वयेत्यंगु अनुमान सूत्रं याना हःगु दु। उपेन्द्र यादवं माओवादी क्याम्प त्वःताः आः हानं छक्वः मधेशवादी पार्टीत छथाय् च्वनाः थःपिनि 'बार्गेनिङ्ग पावर' बढे यायेत्यंगु खँ सूत्रं धाःगु दु ।
सूत्रया कथं प्रधानमन्त्री माधव नेपालयात राजीनामाया तःधंगु दवाव वयाच्वंगु थ्व इलय् आः मधेशवादी पार्टीतय्सं नं थःपिंसं ल्ह्वनाच्वनागु 'छगू मधेश छगू प्रदेश' नीतियात समर्थन याये माल धकाः प्रस्ताव तयेगु तयारी यानाच्वंगु दु ।
यदि थ्व प्रस्तावयात समर्थन मयायेगु खःसा मधेशवादी पार्टीत छप्पँ जुयाः मेगु हे समीकरणयात समर्थन यायेमालीगु ख्याच्वः बीफु। आः फुक्क समस्याया समाधान प्याकेजपाखें जुइगु धकाः खँ हयाच्वंगुलिं मधेशवादी पार्टीतय्सं थःपिनि मधेशी मुद्दायात नं वहे प्याकेज दुने समावेश याकेमाली धकाः प्रस्ताव तयेगु तयारी यानाच्वंगु दु ।
थ्वहे झ्वलय् मेगु छगू सूत्रं बिउगु जानकारी कथं पुलांम्ह प्रधानमन्त्री व कांग्रेसया नेता शेर बहादुर देउवां नं भारतं वयाच्वंगु थ्व पुचःयात नापलायेधुंकूगु दु। देउवां उमित थःत समर्थन याये माल धकाः इनाप याःगु खः ।
