संविधानसभा: विघटन लाकि थप?

मेगु छवाः लिपा क्वचायेत्यंगु संविधानसभाया म्याद थपे यायेगु लाकि मयायेगु धइगु खँयात कयाः विवाद जुयाच्वंगु दु। थुकी खास यानाः प्रमुख प्रतिपक्षी व संविधानसभाय दकलय् तःधंगु पार्टी एनेकपा (माओवादी) या निर्णय मवःगु कारणं थथे हे जुइ धाये मफुगु अवस्था जुयाच्वन। वास्तवय् थ्व इलय् माओवादीया लागिं धाथें हे सकसपूर्ण ई जुयाच्वंगु दु। यदि प्रधानमन्त्री माधव नेपालं राजीनामा मबिल धाःसा संविधानसभाया म्याद थपे याके मखु धइगु माओवादीया अडान खः। म्याद थपे यानाः सरकारया आयु जक बढे यायेगु ज्या थःपिंसं याये मखु धइगु माओवादीया सोच खः। तर स्थिति गज्याःगु दु धायेबलय् संविधानसभाया म्याद थपे मजूसां नं सरकार धाःसा थ्वहे कायम जुइगु अवस्था दु। छाय्धाःसां देश सरकारविहिन धइगु गबलें नं जुइ मखु। उकिं संविधानसभाया म्याद थपे जु वा जुइ मते, प्रधानमन्त्रीं थः यसें राजीनामा मबिउतले थ्व सरकार क्वःदलीगु छुं हे गुन्जायस मदु। थज्याःगु अवस्थाय् माओवादीया न्ह्यःने आः संविधानसभाया म्याद थपे मयायेगु सिबें म्याद थपे यानाः न्ह्याः वनेगु हे जक छगू बांलाःगु विकल्प दु। संविधानसभा दत्तले अन थीथी कथंया कासा म्हितेगु अवसर नं दयाच्वनी। संविधानसभा मंत धाःसा देशय् गज्याःगु अवस्था ब्वलनी व अन थःपिंसं छु भूमिका म्हितेगु धइगु तक नं अनिश्चित जुया बी। लिसें संविधानसभा मंत कि संविधान वइ धइगु नं ग्यारेन्टी दइ मखु। उकिं माओवादीं आः संविधानसभा कायम यानाः मेगु रणनीति दयेकूसा वहे पाय्छि जुइ। थःपिंसं बिचाः याना थें स्थिति अनुकुल मजुयाच्वंगु यथार्थयात उमिसं मनन यायेमाः ।

More Stories Like this