आः वा वःसा जक मत वइ

भारतं बी धाःगु मत नं मबीगु जुल

छखे देशय् कम जक मत उत्पादन जुयाच्वंगु मेखे भारतं नं न्हापा बचं बिउ कथंया मत बी फइ मखु धयाहःगु कारणं नेपालय् जुयाच्वंगु लोडशेडिङ आः र्सगतं बांलाक वा वःसा हे जक क्वपाले फइगु खँ धयाहःगु दु । नेपाल विद्युत प्राधिकरणया प्रवक्ता दण्डपाणी बस्यालं सरकारं न्हापा फागुनया मध्यपाखे लोडशेडिङ क्वपालेगु धाःगु खःसां आः वयाः थथे याये फइ मखुत धयादीगु दु । आः र्सगतं बांलाक वा वःसा हे जक लोडशेडिङ म्हो याये फइगु खँ नं वय्कलं धयादीगु दु । आः हिमाली लागाया च्वापु नायाः खुसिबाः वयेधुंकाः जक लोडशेडिङ क्वपालेत ग्वाहालि जुइगु खँ वय्कलं धयादिल । अथे धइगु वैशाख पाखे जक लोडशेडिङ म्हो याये फइगु सम्भावना दु ।

छुं जुयाः बैशाखं बांलाक खुसिबाः व वा वल धाःसा व उगु इलय् गुगुं नं विद्युत परियोजनाया मेशिन मस्यन धाःसा जक लोडशेडिङ म्हो याये फइगु खँ प्राधिकरणं धयाच्वंगु दु ।
नेपालय् जुयाच्वंगु लोडशेडिङ म्हो यायेगु लागिं भारतं न्हापा १०० मेगावाट मत बीगु धकाः बचं बिउगु खः । तर कोशी खुसिबालं चुइका यंकूगु विद्युतया थां नेपालय् दयेके सिधःसां भारतय् धाःसा बांलाक दयेके सिमधःनि धासें आःयात ३५ मेगावाट जक मत बी फइगु खँ धयाहःगु दु । उखे ३६ मेगावाटया भोटेकोशी मेशिनय् गडबडी वल धकाः आः पर्ूण्ा रुपं ठप्प जुयाच्वंगु दुसा ६० मेगावाट मत बीमाःगु कुलेखानीं नं थौंकन्हय् जेनतेन ४६ मेगावाट जक मत बियाच्वंगु दु । यदि थौं थें हे कुलेखानीं मत पिकयाच्वन धाःसा आः मेगु २० न्हुया दुने कुलेखानीं नं मत पिकाये मफइगु खँ धयाहःगु दु । आः कुलेखानीइ १० मिटर जक लः दनिगु खँ धाःगु दु । थौंकन्हय् थ्वं २४ सै घण्टा मत पिकयाच्वंगु दु ।

थौंकन्हय् न्हिं १६ घौ लोडशेडिङ धाःसां प्राविधिक गडबडीं यानाः व स्वयां अप्वः नं मत सिनाच्वंगु दु । विराटनगरय् धर्ना थ्व हे झवलय् सरकारं फागुनया मध्यनिसें लोडशेडिङ म्हो यायेगु धकाः न्हापा बचं बियातःगु खःसां आः वयाः अथे याये फइ मखु धायेवं विराटनगरया उद्योगपति ब्यापारीतय्सं म्हिगः अन जुलुस व धर्ना यानाः थुकिया विरोध यात । उमिसं भारतया कटैया जुयाः वइगु ३५ मेगावाट मत पर्ूवय् जक प्रयोग यायेमाः व मेथाय् यंके दइ मखु धकाः नं विरोध याःगु दु । उमिसं भारतपाखें म्होचा जक वःगु मत नं मेथाय् यंकाः सरकारं पर्ूवाञ्चलया उद्योग ख्यःयात धरासायी यायेत स्वःगु द्वपं बिसें उगु लागाय् उद्योग संकटग्रस्तया घोषणा याःगु दु ।