सतकं संविधान वयेके मबीगु

येँ (सन्ध्या टाइम्स)/माओवादीं याःगु आम हडताल वास्तवय् सरकारया कडा सुरक्षा रणनीतिं यानाः हे असफल जूगु विश्लेषण सरकारं याःगु दु। देय्या लिपांगु राजनीतिक अवस्था व सुरक्षाया विषयय् सहलह यायेत थौं सुथय् च्वंगु सुरक्षा परिषदया बैठकं थ्व निष्कर्ष पिकाःगु खः ।

थ्वहे दथुइ गृहमन्त्री भीम रावलं माओवादीं सतकं संविधान जारी यायेगु धकाः हयाच्वंगु ज्याझ्वःयात गुगुं नं हालतय् सफल याके मबीगु खँ धयादीगु दु। माओवादीं वइगु जेष्ठ १५ गते सतकं हे संविधान घोषणा यायेगु ज्याझ्वः तयातःगु दुसा माओवादीया उगु पलाःयात सरकारं कानून कथं पनेगु रणनीति दयेकूगु दु। थौं सुथय् सुरक्षा परिषद्या बैठक लिपा संचारकर्मीतलिसे खँल्हासें मन्त्री रावलं थ्व खँ धयादीगु खः ।

माओवादीं सतकं हे संविधान घोषणा याइगु अन्तरिम संविधान व शान्ति सम्झौताया अःखः जुइ धासें वय्कलं माओवादीं आन्दोलनया इलय् नालीगु रणनीतिया आधारय् हे जनसंविधान घोषणा ज्याझ्वःयात नं पनेगु जुइ धयादिल ।

माओवादी संविधानय् गज्याःगु प्रदेश?
माओवादीं थःपिनि आन्दोलनया हे झ्वलय् जेष्ठ १५ गते सतकं जारी यायेत्यंगु संविधानया पूर्ण खाका तयार याःगु दु। संविधानया उगु खाकायात कयाः कन्हसंनिसें जुइत्यंगु पार्टीया केन्द्रीय बैठकय् सहलह जुइगु खँ धाःगु दु। माओवादी सूत्रं बिउगु जानकारी कथं उगु संविधानय् राज्य पुनर्संरचना सम्बन्धी मुद्दाया लागिं स्वंगू विकल्प प्रस्तावित यानातःगु दु। थौंकन्हय् संविधानसभाय् तयातःगु १४ प्रदेश (भतिचा परिमार्जित) या अतिरिक्त मेगु निगू विकल्प उकी दुथ्याः ।

माओवादीं न्ह्यब्वःगु न्हापांगु विकल्पय् जाति, भाषा, संस्कृति व क्षेत्रया आधारय् प्रदेशत दयेकातःगु दु। उकी १५ गू प्रदेश दुथ्याः। उपिं खः - १) लिम्बुवान, २) किराँत, ३) कोचिला, ४) मिथिला, ५) भोजपुरा, ६) अवध, ७) ताम्सालिङ, ८) नेवाः, ९) तमुवान, १०) मगरात, ११) भेरी कर्णाली, १२) सेती महाकाली, १३) थारुवान, १४) भोटे शेर्पा व १५) भोटे लामा प्रदेश ।

अथेहे निगू विकल्पय् तराई, पहाड व हिमालया भौगालिक समावेशीया लिधंसाय् दयेकातःगु स्वंगू जक मिश्रित प्रदेशत दु। उपिं खः -
१) कोचिला, मिथिला, लिम्बुवान, किरात व भोटे शेर्पाया मिश्रित प्रदेश, २) भोजपुरा, नेवाः, ताम्सालिङ व अवधया मिश्रित प्रदेश व ३) मगरात, भेरी-कर्णाली, सेती-महाकाली, थारुवान व भोटे लामाया मिश्रित प्रदेश ।

स्वंगूगु विकल्पय् गैर भौगोलिक समावेशीकरणया लिधंसाय् दयेकातःगु खुगू मिश्रित प्रदेशत दुथ्याः। उपिं खः - १) कोचिला, लिम्बुवान, भोटे शेर्पा व किरातया मिश्रित प्रदेश, २) तराई मधेश (मिथिला, भोजपुरा व अवध) या मिश्रित प्रदेश, ३) नेवाः व ताम्सालिङया मिश्रित प्रदेश, ४) तमुवान व मगरातया मिश्रित प्रदेश, ५) भेरी-कर्णाली, सेती-महाकाली व भोटे लामाया मिश्रित प्रदेश व ६) थारुवान प्रदेश ।