न्हापां जनताया सम्पत्ति लित कायेमाः

नेपालय् थीथी व्यक्ति व संस्थां चले यानाच्वंगु चेन बिजनेसयात निरुत्साहित यायेगु झ्वलय् थौंकन्हय् युनिटी लाइफ इन्टरनेशन नांगु संस्था चर्चाय् वयाच्वंगु दु। सरकारया गुगुं नं सम्बन्धित निकायलिसे स्वापू मतसे सर्वसाधारणयाके ध्यबा उठे यानाः व्यवसाय यानाच्वंगु धइगु द्वपं बिसें प्रशासनं उकिया पदाधिकारीतय्त ज्वंग दुसा उकिया गुलिखे ज्याकुथी तालं ग्वयेगु ज्या तकं जूगु दु। थ्व संस्थां थन ज्या यानाच्वंगु तःदँमछि दयेधुंकूगु दुसा आः वयाः आकाझाकां हे थुकियात धरासायी यायेत्यंगुया लिउने छु गुज्वःगु स्वार्थ सुलाच्वंगु दु, व रहस्यया विषय जूगु दु ।

आः तकया दुने देय्या गांगामय् समेत वनाः लखौं मनूतय्पाखें थ्व संस्था अर्बौं तका दां म्हयेधुंकूगु दु। लिसें थ्वं जनतायात गुगु स्वास्थ्य सेवा, जीवन बीमा व बैंकिंग सेवाया लोभ क्यनातःगु खः, व नं चायेका तयेधुंकूगु दु। तर थ्व इलय् तक सरकार छु स्वयाच्वन? थौं थ्व संस्थापाखें ठगे जूपिं मनूतपाखें वःगु उजुरी व पत्रपत्रिकां याःगु भण्डाफोरया लिधंसाय् सरकारं उमित कारवाही यायेत स्वयाच्वंगु दु। तर उमित कारवाही यानाः ठगे जूपिं जनताया सम्पत्ति लित वइ ला? उगु संस्थाया बैंक खाता सिज याःसां अन ध्यबा मदुगु खँ पिहां वयाच्वन? सर्वसाधारण जनताया ध्यबा पुलेत गनं वइ दां? थुकिया दायित्व सरकारं पूरा याइगु खः लाकि मखु? यदि सरकार जनताप्रति उत्तरदायी नं खःसा दकलय् न्हापां ठगे जूपिं जनताया ध्यबा लित बीगु प्रक्रिया निं न्ह्याकेमाःगु दु। अथें कारवाही धकाः उमिगु निगू प्यंगू करोड सम्पत्ति जफत यायेवं तुं जनताय सम्पत्ति लित वइ मखु। थुकी सचेत जुइमाः ।

More Stories Like this