गुलि बन्द - गुलि हडताल

नागरिक

- नेता जुइत राजनीति शास्त्र मब्वँसें मगाः। खालि माइक ज्वनाः न्ववाये फुगु भरय् नेता धाये मजिउ ।

बन्द हडताल: बन्द हडताल। थ्व ला स्वये हे मयल, न्यने हे मयल। गुलि बन्द गुलि हडताल? ज्या पूवंगु ग्व? गल गल जक। सुनानं तेरे याःगु मखु, सुना नं सुयातं मतलब तःगु मखु। झीगु थज्याःगु गरीब देशय् बन्द हडताल धइगु याये हे मजिउ। यानां नं छुं हे फाइदा मदु। अथे ला गरीबतय् नये त्वनेया अभाव, झन झन भाः थिके जुयाः झीगु आम्दानीं थी हे मफु। उकिं नेतातय्सं बांलाक बिचाः मयासें मगाः। झीगु देश झीत झनझन स्यंकेत स्वयेगु खःसा दक्वं नेतातय्सं पालंपाः बन्द हडताल यानाच्वन धाःसा थ्व पक्का खः कि संसारय् दक्व मध्ये गरीब देय् नेपाः हे जुइ ।

मे दिवस मजदूर दिवस धकाः नेतातय्सं भाषण यानाः धाल। नेपालय् एक करोड १७ लाख मजदूर दु हँ। अले छन्हु आम हडताल जूबलय् १ करोड १७ लाख मजदूर जनता द्यांलात। १० जोड २ लय् ३ लाख २० हजार विद्यार्थीतय् जाँच बी मखन धाःसा विद्यार्थीतय् जाँच हडतालय् लात धाःसा वा आखः ब्वनेबलय् लात धाःसा अन्दाजी कक्षा केजीनिसें एमए तकया ५० लाख स्वयां अप्वः विद्यार्थी दयेफु। उलिमछि विद्यार्थीतय् ब्वनेगु बन्द, जाँच बन्द। ब्यापारय् १ अरब २५ करोड न्हिंन्हिं आर्थिक घाटा उकुन्हु जूगु हडतालबलय्। अझ न्हिं २ अरब २५ करोड घाटा जूगु धाःगु न्यना। उकिं झी नेतातय्त छु फाइदा जुइ? इमिगु माग पूवंसां नं लिपा देय् गथे यानाः सञ्चालन याना यनी?

जिं स्वयेबलय् नेतातय्के शिक्षा मगाः थें ताया। माइक ज्वनाः न्ववाये सयेवं तुं, ततःसलं हाले सयेवं तुं, राज्य विरुद्ध वा थः मयःगु पार्टी विरुद्ध न्ववाये फयेवं तुं उपिं बुजु्रक नेता जुइ धकाः जिं मताया। छाय्धाःसा हडताल घोषणा याइ १५ गतेनिसें अनिश्चितकालीन आम हडताल धकाः। गबलें गबलें हडताल लित नं कायेफु। तर सुं नं पत्याः हे जुइ मखु ।

हडताल धकाः माइक पुयाः हाला जुइपिं नेतायत्सं हडताल लिकाइबलय् बहनीसिया १०/११ बजे जानकारी बी। मत मवयाः उगु बुखँ नं इलय् न्यने खनी मखु। बन्द हडताल लित हे काःसा नं ५० लाख विद्यार्थीतय् कलेज चाली मखु ।

छाय्धाःसां सुथंनिसें यातायात बांलाक चाली हे मखु। हडताल लित काःगु ड्राइभरतय्सं सी मखु। ५० लाखसिया आखः ब्वने मखनाः नोक्सान जुइ। १४ गते सुथय् माइक पुयाः हडताल लित कया धाये मफुगु हे नेताय्के शिक्षा मगाःगु खः। उकिं बन्द आम हडताल यानाः सुयात फाइदा व सुयात बेफाइदा थ्व सकतां सीकेत झी नेतात शिक्षित मजुसें मगाः। नेतात आखः ब्वनातःपिं जुइमाः। अथे धइगु म्होति नं बीए, बीएल वा राजनीति शास्त्रय् बीए पास हे जुइमाः। अले देशय् खः कथं सुयातं नोक्सान मजुइक राजनीति याये फइ। नत्र झीगु देय् झन झन स्यना जक वनी। जितः ला धायेमास्ते वः कि आः दयेकेत्यंगु संविधानय् थ्व छगू बुँदा मतसें मगात कि दक्वं पार्टीतय्सं थःथःगु पार्टीया नेतातय्त नेता धायेगु खःसा बीए, बीएल वा राजनीति शास्त्र विषयय् बीए पास यानातःम्ह जुइमाः। अज्याःपिंत हे जक नेता धकाः प्रमाणपत्र बिया तयेमाः। नेता जुइत कानून व राजनीति शास्त्र मब्वँसें मगाः। खालि माइक ज्वनाः न्ववाये फुगु भरय् नेता धाये मजिउ। जुलुस याये फयेवं, हडताल याये फयेवं नेता जुइगु खःसा झन झन जक देय् स्यनावनी। शिक्षित नेतात थः थः खँ ल्हानाः न्ह्यागु समस्या वःसां समाधान याये फतकि हे जक सकल नेतातय्त सकल जनतां माने याइ। उकिं खनाच्वना कि झीथाय् नेता धकाः खडा जुयाच्वंपिं नेतातय्त नेता धकाः शैक्षिक प्रमाणपत्र सकसिकें गबलय् दइ, अबलय्निसें बन्द हडताल धइगु खँग्वः नं न्यने हे माली मखु। उकिं देश व जनताया लागिं जनताया नेतां अध्ययन मयासें मगाः, शिक्षित मजुसें मगाः ।

More Stories Like this