माओवादीया प्रस्ताव अस्वीकार
थौं सुथय् कांग्रेसया पदाधिकारी बैठक
येँ (सन्ध्या टाइम्स)/राजनीतिक सहमतिया नितिं महत्वपूर्ण विषय जुयाच्वंगु माओवादी लडाकुया समायोजन सम्बन्धी सवालय् माओवादीं लिपांगु इलय् तःगु प्रस्तावयात कांग्रेसं अस्वीकार याःगु दु। माओवादीं नेपाली सेना, प्रहरी व लडाकुयात दुथ्याकाः छगू बिस्कं हे फोर्स दयेकेगु धकाः तःगु प्रस्तावयात कांग्रेसया थौं सुथय् च्वंगु पदाधिकारीतय् मुँज्यां अस्वीकार याःगु खः ।
पार्टीया कार्यवाहक सभापति सुशिल कोइरालायाथाय् च्वंगु उगु मुँज्याय् माओवादीपाखें म्हिगः तःगु उगु प्रस्तावयात कयाः सहलह जूगु खःसा सहलहं माओवादी प्रस्तावयात अस्वीकार यायेगु निर्णय याःगु खः ।
कांग्रेसं शान्ति सम्झौता कथं अनमिनया रोहबरय् माओवादी लडाकुयात समायोजन यायेमाःगु खँय् बः बिउगु खँ कांग्रेस प्रवक्ता अर्जुननरसिंह केसीं धयादीगु दु। प्रमाणीकरण जुइधुंकूपिं जनसेना गुलि दु उकिया ल्याः क्वःछीत तकं कांग्रेसं माग याःगु दु। अथे हे माओवादी शान्ति व संविधानप्रति प्रतिवद्ध जुयाः आःया अवस्थाय् वार्ताया माध्यमं समस्या ज्यंकेत जिम्मेवार जुयाः वयेमाः धकाः नं बैठकं निर्णय याःगु दु ।
कांग्रेसया थौंया बैठकं माओवादीं सहमतीय राजनीतिइ वनेगु धकाः तःगु प्रस्तावयात नं अस्वीकार याःगु दु। तःधंगु दलया हैसियतं कन्हय् माओवादीं नं सरकारले चले याइगु अवस्था वयेफु तर अज्याःगु सरकार चीकेत दुई तिहाई मत मालीगु जुयाः कन्हय् झन् हे मेगु कथंया विकृति ब्वलनीगु विश्लेषण नं याःगु खः ।
उखे माओवादी अध्यक्ष प्रचण्ड धाःसा थौं सुथय् आकाझाकां धौख्यःपाखे झाःगु दु। वर्तमान राजनीतिक माहौलं तसकं तनावग्रस्त जुयाः वय्कः उखे वंगु खँ धाःगु दु ।
माओवादीया पोलिटब्यूरो दुजः अग्नी सापकोटायात ज्वनाः वय्कः धौख्यःया द्वारिका होटलय् च्वं झाःगु खः। कंस शुक्रवाःनिसें पार्टी केन्द्रीय कमिटीया बैठक जुइगु नापं उगु बैठकय् छु छु एजेण्डात यंकेगु धकाः योजना दयेकेत वय्कः धौख्यःया एकान्त थासय् झाःगु खँ माओवादी सूत्रं धाःगु दु। आःया अवस्थाय् संविधानसभाया म्याद थप यायेगु ला कि मयायेगु, घोषित ज्याझ्वः कथं १५ गते सतकं जनताया संघीय लोकतान्त्रिक गणतन्त्रया संविधान गुकथं घोषणा यायेगु धइगु बारे सहलह यायेत नं वय्कः उखे झाःगु खः धाःगु दु ।
नेता प्रचण्ड धौख्यः थ्यंकाः वय्कःयात पत्रकारतय्सं घेरे याःगु खःसां वय्कलं सुं नं संचारकर्मीया न्ह्यसःया लिसः धाःसा बिया मदी। अध्यक्ष प्रचण्डया ग्वाहालिमि समीर दाहालं संचारकर्मीलिसे खँल्हासें येँया नयाँबजारय् यक्व भीडभाड जुइगु जुयाः धौख्यःया होटलय् झाःगु जानकारी बियादिल ।
अध्यक्ष प्रचण्ड न्हापा न्हापा नं छुं कथंया महत्वपूर्ण मुँज्याया तयारी याये माल कि स्वनिगः त्वःताः एकान्त थासय् च्वं वनेगु यानादी।
