कलेजया नामय् क्वथा छकू

लण्डनय् नं नेपाली विद्यार्थी ठगे जुल

लखौं दां फुकाः चीनया थीथी थासय् ब्वं वनाच्वंपिं नेपाली विद्यार्थीत अन थ्यंकाः ठगे जुइका च्वनेमाःगु खँ ला इलय् ब्यलय् र्सार्वजनिक जुया-च्वंगु हे जुल । आः वयाः युरोपया छगू प्रमुख देय् बेलायतय् नं नेपाःया आपालं विद्यार्थीत उकथं ठगे जुयाच्वंगु खँ सीदुगु दु ।बेलायतया राजधानी लण्डनय् आखः ब्वनाच्वंपिं नेपाली विद्यार्थी-तय्सं धाः कथं अन कलेजया नामय् कर्पिनि छेँय् क्वथा छकू बालं कयाः नेपालीतय्त आखः ब्वंकेगु यानाच्वंगु दु । नेपालं वनीबलय् धाःसा लण्डनया कलेजय् ब्वनेगु धकाः वनी तर अन थ्यनीबलय् धाःसा तःधंगु कलेज मखुसें छकू हे क्वथाय् विद्यार्थीत तयाः ट्यूशन ब्वंके थें आखः ब्वंकेगु यानाच्वंगु खँ पीडित विद्यार्थीतय्सं धाःगु दु ।

लण्डनय् आखः ब्वंनेगु प्रवन्ध मिले याना बीगु धकाः येँय् आपालं एडुकेशनल कन्सल्टेन्सीत चायेका तःगु दु । अन वनाः सल्लाह काः वन धाःसा उमिसं कलेजया नां, थाय्बाय् व अन ब्वनेत तूगु खर्च सम्बन्धी फुक्क विवरण कनी । लिसें अन वनेत छु छु यायेमाःगु खः व नं मिले याना बी । अज्याःपिं कन्स-ल्टेन्सीतय्सं भर्ना फी, ट्यूशन फी धकाः स्वदँया लागिं करिब प्यद्वः पाउण्ड दां नं न्हापा हे काइ । फुक्क खँ मिले यानाः लण्डन थ्यनेधुंकाः धाःसा अनया कलेज नां तयाः बालं कयातःगु क्वथा खनीबलय् विद्यार्थीया नुगः क्वतुने धुंकी । अज्याःगु कलेजय् छुं नं कथंया भौतिक सुविधा मदइगु जक मखु शिक्षाया गुणस्तर तकं मदइगु खँ नं धाःगु दु ।

थज्याःगु कलेजत खास यानाः लण्डन थ्यंकाः ब्वनेज्या त्वःताः पिने ज्या माः जुइपिं मनूतय् लागिं जक उपयुक्त जुइगु व धाथें आखः ब्वने धकाः वनीपिनि लागिं छुं हे ज्या मवःगु खँ नं पीडित विद्यार्थीतय्सं धाःगु दु । तर विदेशय् थःपिंत हानं मेगु कथंया समस्या वइ धकाः पीडित विद्यार्थी- तय्सं थःपिंत ठगे याःपिं कन्सल्टेन्सीया नां आःयात र्सार्वजनिक मयायेत इनाप याःगु दु ।

थौंकन्हय् चीनय् नं सामान्य छेँ छखा जक बालं कयाः नेपाली शिक्षकतय्सं चायेकातःगु कलेजय् आपालं नेपाली विद्यार्थीत ब्वनाच्वंगु दु । अज्याःगु कलेज चायेकातःगु चीनय् जूसां ब्वनीपिं व ब्वंकीपिं सकलें धाःसा नेपाःमि हे जुयाच्वनी । उकथं हे चायेकातःगु मेडिकल कलेजय् ब्वनीपिं नेपाःमि विद्यार्थी-तय्त चीनया गुगुं नं अस्पतालं इर्न्र्टनशीप याके बी मखु धायेवं उमित मर्का जूगु खँ थौंकन्हय् चर्चाय् वयाच्वंगु दु । थुकिं यानाः थः मस्तय् भविष्य सुरक्ष्ँित यायेत नेपाःमि विद्यार्थीतय् अभिभावकपिंसं थन छगू संगठन हे चायेकाः थुकिया विरुद्ध संर्घष यानाच्वंगु खँ थन लुमंकेबह जू ।