निगू पक्षीय वार्ताय् सहजकर्तातय् भूमिका

स्वंगू तःधंगु दल दथुइ जुयाच्वंगु वार्ता ताःमलायेवं आः पुलांपिं सहजकर्तातय्सं पहल यायेगु खः लाकि धइगु कुतः शुरु जूगु दु। थःथःपिनिगु पूर्वाग्रह व पूर्व अडानं यानाः स्वंगू तःधंगु दलतय्गु वार्ता ताःलानाच्वंगु मदु। थुकिं यानाः न्हूगु संविधान च्वयेगु ज्या अवरुद्ध जुइगु जक मखु कि अर्बौं दां खर्च यानाः जूगु चुनावं खडा याःगु संविधानसभा तकं भंग जुइगु अवस्था वयाच्वंगु दु। थज्याःगु संगीन अवस्थाय् देय्या प्यम्ह वरिष्ठ नागरिकं यदि पार्टी-पार्टी दथुइ जक जुयाच्वंगु संवाद ताःमलानाच्वंगु खःसा थःपिंसं सहजकर्ताया भूमिका म्हिता बी धकाः पार्टीतय्त प्रस्ताव तःगु दु। दलतय्सं यानाच्वंगु संवाद ताःमलाःगु, चिचीधंगु खँय् नं सहमति जुइ मफइगु व थौं धाःगु खँ कन्हय् मधया धाइगु वा धाःगु खँयात नं मेमेकथं थुइकेगु ज्या यानाच्वंगु कारणं यदि दथुइ सहज याइपिं मनूत दत धाःसा अःपुइ ला धइगु बिचालं वय्कःपिंसं थ्व प्रस्ताव तःगु खः। खतुं पार्टीतय् दथुइ जूगु वार्ताय् धाथें खँ छु जूगु खः धकाः स्वय्म वार्ताकारत बाहेक मेपिं सुनां नं मसिउ। वास्तवय् उमि दथुइ छु खँय् सहमति मजुयाच्वंगु धकाः नं सुनां नं मसिउ। यदि आः सहजकर्तात न्ह्यःने च्वना बिल धाःसा धाथें छु खँय् मुल खँ थानाच्वंगु दु धइगु जानकारी दइ। अले उकियात गय् यानाः निकास बी माली धकाः उपाय नं लुइकेगु जुइ। गुलिखे खँ थवंथवय् अविश्वास जुयाः, मथुयाः, पूर्वाग्रही जुयाः नं मज्यनाच्वंगु जुइफु। अज्याःगु समस्यायात सहजकर्तातय्सं समाधान याना बी। सहजकर्ता उमि दथुइ जूगु वार्ताया साक्षी नं जुइ। उकिं सहजकर्ता तयाः वार्ता न्ह्याकूसा उकिं समाधान यायेत नं अःपुइगु हे जुइ धकाः आशा कायेथाय् दु ।

More Stories Like this