थसिइ मूत्र बैंक

च्व १ लिटरया छतका

बुँइ साःया रुपय् प्रयोग जुइवं गामय् मानव मूत्रया खपत नं अप्वया वंगु दु। थुकिं यानाः अन मानव मूत्रया माग अप्वया वनाच्वंगु दु ।

मनूया च्व (मानव मूत्र) या उचित व्यवस्थापन यायेत व बालीनालीइ साःया रुपय् प्रयोग यायेत यलया थसि (सिद्धिपुर) इ च्वंपिं किसानतय्सं थःगु हे गामय् नेपाःया हे न्हापांगु मूत्र बैंक (Urine Bank) चायेकूगु दु। रासायनिक साःया प्रयोगं सयेकातःगु हलंज्वलंया गुणस्तरय् कमी वइगुया नापं थुकिं चाया उर्बर क्षमता नापं ह्रास याना बीवं उगु लागाया किसानतय्सं बुँइ तयेत मनूया च्व (मानव मूत्र) प्रयोग शुरु याना हःगु खः। प्राङ्गारिक साःया रुपय् मानव मूत्र प्रयोग यानाः उत्पादन यानातःगु खाद्यवस्तु स्वास्थ्यया दृष्टिकोणं नं लाभदायक जुइगु वय्कःपिनि दावी दु ।

उगु मूत्र बैंकया उलेज्या यासें यूएन ह्याबिटाट् दक्षिण एशिया क्षेत्रया प्रमुख प्राविधिक सल्लाहकार डा. रोशनराज श्रेष्ठं मूत्र बैंकया स्थापनां बुँज्याया लागिं आवश्यक मूत्रको व्यवस्था यायेत कृषकतय्त ग्वाहालि याइगु खँ कनादिल। वय्कःया कथं थ्व ज्यां समुदाययात वातावरणीय सरसफाई सुधारया ज्याय् नं तिबः बीगु खनेदु ।

थसिया कृषकतय्सं थःगु छेँय् मुनीगु च्वयात बुँइ साःया रुपय् छ्यलाच्वंगु दु। साःया रुपय् च्व प्रयोग यायेबलय् छब्व च्वय् स्वब्व लः ल्वाकछ्यायेमाः। बुँइ साःया रुपय् प्रयोग जुइवं गामय् मानव मूत्रया खपत नं अप्वया वंगु दु। थुकिं यानाः अन मानव मूत्रया माग अप्वया वनाच्वंगु दु। उगु माग पूर्ति यायेत स्थानीयवासी जनताया पहलय् मानव पिसाव व्यवस्थापन समिति नीस्वनाः केन्द्रीकृत रुपं मूत्र संकलनया ज्या नं शुरु यानागु खँ मानव पिसाव व्यवस्थापन समितिया नायः जीवन महर्जनं कनादिल। उगु ज्याया लागि समितियात स्वीट्जरल्याण्डया सहयोगी संस्था ईवाग (EAWAG) र यूएन ह्याबिटाट (UN-HABITAT) नेपालपाखें प्राविधिक व आर्थिक ग्वाहालि बिउगु खः। समितिं मूत्र संकलनया लागि छम्ह कर्मचारी नं नियुक्त याःगु दु। जःखः च्वंगु लागांव मुंका हःगु च्व मूत्र बैंकतक हयेत समितिं छगू साइकल व ३० लिटरया निगः जर्किनया नं व्यवस्था याःगु दु। थौंकन्हय् उगु मूत्र बैंकय् कूल २००० लिटरतक मूत्र मुंकेगु लागिं १००० लिटरया निगः ट्यांकी तयातःगु दु ।

थःगु बुँया लागिं मगाःगु च्व मूत्र बैंकयाके न्याये दइगु जुसेंलि स्थानीय किसानत उत्साहित जूगु दु। बैंकं थौंकन्हय् १ लिटर च्वया १ तकां मीगु यानाच्वंगु दु। च्व मियाः वःगु दामय् छम्वह समितिया कोषय् तया बीसा मेगु छम्वह संकलन कर्मचारीयात पारिश्रमिक कथं बी ।

कृषि उत्पादन अप्वयेकेत मनूया च्व तसकं ज्या वः। मनूया च्वय् दइगु तत्वत स्वां-सिमां अःपुक हे प्राप्त याये फइ। गोबरया साः व मेमेगु कम्पोष्ट साःया तुलनाय् थुकी स्वां सिमायात माःगु नाइट्रोजन, फस्फोरस व पोटास थेंज्याःगु खाद्य तत्व अप्वः दइ। मानव मूत्रय् ०.९ भाग नाइट्रोजन, ०.१२ भाग फस्फोरस व ०.२६ भाग पोटास दइ। छम्ह ल्याय्म्हम्ह मनुखं दँय् सरदर ५५० लिटर च्व उत्पादन याइ। गुकियापाखें ४ के.जी. नाईट्रोजन, ४०० ग्राम फस्फोरस व १ के.जी.पोटास प्राप्त याये फइ। दछिया दुने छम्ह मनूयापाखें मुंकातःगु च्वपाखें छगू रोपनी जग्गाय् बुँज्या यायेफु। थुकिं उत्पादनया गुणस्तर थकायेत व चाया क्षमता अप्वयेकेत नं ग्वाहालि याइ ।

More Stories Like this