माओवादी हानं छाय् कडा?
राजीनामा वःसा जक म्याद थप
येँ (सन्ध्या टाइम्स)/यदि प्रधानमन्त्री माधव नेपालं राजीनामा मबिल धाःसा जेठ १४ लिपा नं संविधानसभा जारी याये फइ कथं म्याद थपे मयाकेगु खँ माओवादीं धाःगु दु। माओवादीया म्हिगः च्वंगु पोलिटब्युरो बैठकं थ्व न्हूगु निर्णय याःगु खः। थ्व स्वयां न्ह्यः यदि थःपिंसं म्याद थपे याकेगु प्रस्तावय् समर्थन मयात धाःसा संविधानसभा भंग जूगुया दोष थःपिंत वइगु जूगुलिं राजीनामा मवःसां नं संविधानसभाया म्याद धाःसा थपे याकेगु निर्णय माओवादीं यानातःगु खः ।
तर म्हिगः वयाः आकाझाकां संविधानसभा भंग हे जूसां नं प्रमया राजीनामा मवइगु खःसा म्याद थपे याके हे मखु धइगु न्हूगु निर्णय याःगु खः। माओवादीं संविधानसभा हे भंग जूसां जुइ ब्यु धइगु तक जोखिम कयाः छाय् प्रमया राजीनामा निं माग यात धइगु खँ धाःसा रहस्यमय जूगु दु ।
विज्ञ सूत्रं बिउगु जानकारी कथं प्रधानमन्त्री माधव नेपालं थम्हं जेठ ११ गते राजीनामा बी धकाः माओवादीयात छ्वःगु प्रस्ताव आः कार्यान्वयन जुइगु अवस्था वःगुलिं माओवादीं थ्व 'कडा' अडान काःगु खः। प्रमया राजीनामा वइगु निश्चित खने दुगु अथवा उगु निश्चिततापाखें प्रम लिमचिलेमा धकाः थज्याःगु अडान काःगु नं सूत्रया अनुमान दु। माओवादी धाथें थ्व अडानय् कायम जुल धाःसा संविधानसभा भंग नं जुइफु अवस्था वयेफु। उकिं प्रम नेपालं संविधानसभा भंग हे जुइगु तकया अवस्था वःगुलिं थम्हं राजीनामा बियागु खः धकाः संविधानसभा 'बचे यानागु' श्रय समेत कायेगु ल्याखं थ्व प्रपंच जुयाच्वंगु नं सूत्रया दावी दु ।
म्हिगः च्वंगु एमालेया बैठकं देशय् दुगु फुक्कं समस्या एकमुष्ठ रुपं समाधान जुइगु खःसा जक प्रधानमन्त्रीं नं राजीनामा बी धकाः निर्णय याःगु खः। नेपाली कांग्रेसया बैठकं धाःसा समस्या समाधानया लागिं न्हापा थःपिंसं धया वयाच्वनागु खँ हे पाय्छि जूगुलिं उकियात हे निरन्तरता बीगु धकाः निर्णय याःगु दु ।
माओवादी दुने डा. बाबुराम न्ह्यःने
माओवादीं खुन्हु तक याःगु आमहडतालया विफलता लिपा आः पार्टीं मेम्ह वरिष्ठ नेता डा. बाबुराम भट्टराईयात न्ह्यःने हयाच्वंगु खनेदु। थौंकन्हय् माओवादीं यानाच्वंगु मोर्चाबन्दी आदि थेंज्याःगु ज्याय् डा. भट्टराई न्ह्यःने वयाच्वंगु दु ।
सूत्रया कथं डा. भट्टराई थ्व इलय् संघर्ष व भिडन्त यानाः सिबें नं सहमति यानाः न्ह्याः वनेमाः धइगु पक्षयाम्ह खः। अले माओवादीं यदि प्रधानमन्त्रीया जू वनेगु अवसर वल धाःसा प्रचण्ड बाहेक मेम्ह न्ह्याम्ह जूसां जिउ धकाः नं निर्णय यायेधुंकूगु दु। थज्याःगु प्रशंगय् न्ह्यःने वःम्ह डा. बाबुराम भट्टराईयात न्ह्यःने हःगुलिं हे प्रधानमन्त्री नेपालं जेठ ११ य् राजीनामा बी धाःगु प्रस्ताव नं कार्यान्वयन जुइगु सम्भावना दुगु सूत्रया दावी दु ।
