राष्ट्र संघीय निकायतय्त प्रहार

सरकारं बल्लबल्ल अनमिनया म्याद प्यला थपे यायेगु सहमति क्यंगु दु। सामान्यतया थज्याःगु म्याद खुला वा दछि थपे यायेगु चलन दइगु खः। तर सरकारं प्यला जक थपे यानाः अनमिन नेपालय् दुगु थःपिंत मयः धइगु संकेत क्यंगु दु। अनमिन नेपालय् दुबलय् हे सेना समायोजनया ज्या क्वचायेकेगु ग्वसाः खः। तर आः थपे याःगु प्यलाया दुने सेना समायोजनया ज्या क्वचाइगु खने मदु। सरकारं आः म्याद थपे याःगु स्वयेबलय् लिपा लिपा हानं म्याद थपे याइगु सम्भावना नं मदु ।

अथे हे राष्ट्र संघीय मानवाधिकार आयोगया ज्याकू नं नेपाःया थीथी थासय् मतयेकेगु पहल सरकारं न्ह्याकूगु दु। न्यागू विकास क्षेत्रय् तयातःगु थुकिया ज्याकू बन्द याकाः येँ छथाय् जक तयेकेगु लागिं कांग्रेसं सकारयात इनाप यायेधुंकूगु दु। नेपाः सरकारं राष्ट्रया निकायतलिसे छाय् थज्याःगु व्यवहार यानाच्वंगु खः, थ्व छगू थुइके थाकुगु विषय जुया वःगु दु। थ्व गनं सरकारं थःगु विरोधय् गतिविधि याइपिंत दमन शुरु यायेत्यंगुया संकेत जकं मखु ला? थःपिंसं याइगु दमनयात अन्तर्राष्ट्रिय निकायं आलोचना याइ धकाः उकियात पनेगु लागिं जकं थज्याःगु पलाः ल्ह्वनेत्यंगु मखु ला? मखुसा तानाशाह जुजु ज्ञानेन्द्रं तकं अनुमति बियातःगु राष्ट्र संघीय मानवाधिकार आयोगयात वर्तमान लोकतान्त्रिक सरकारं बन्द याकेत स्वयेगुया अर्थ छु खः? नेपाःपाखें ल्ह्वनीगु थ्व पलाखं विश्वन्यंकं हे मानव अधिकारया सवालय् नेपाःया नां धुमिल जुइगु खतरा दु। सरकारं थ्व ज्या नेपाली, भारत वा न्ह्यागु हे निकायया सल्लाह कथं याःगु जूसां थ्व बांलाःगु ज्या धाःसा मखु, अथे याये दइ मखु ।

More Stories Like this