प्रधानमन्त्रीं बिया हःगु सिरपाः
मध्यान कसाः
- हापं धइगु न्ह्यालाः मखु, ब्यापारीतय्गु बाध्यता खः धइगु खँ प्रधानमन्त्रीं मथूगु खःला? प्रधानमन्त्रीया बौद्धिक स्तर मूल्यांकन यायेगु आवश्यकता जूगु दु ।
नकतिनि लितकाःगु माओवादीया आमहडताल मेगु न्ह्यागु कारणं दिउगु जूसां नेपाल उद्योग बाणिज्य महासंघ व शान्ति र्यालीइ सम्मिलित आयोजक संस्थातय्सं थःगु सफलता धकाः उत्कृष्ट जनसहभागिताया ल्याखं मूल्यांकन यायेगु थाय् यक्व दु। गथे र्यालीइ सहभागी जुइत एसएमएसपाखें सुचं व इनाप प्राप्त जूगु खः, अथेहे सफल जूगु धकाः नं एसएमएसपाखें लसता प्वंकाहःगु खनेदत ।
खः, र्याली तसकं च्वछायेबहःगु जनसहभागिता जूगु दु। शान्तिया निंतिं अल्याख जनतां सहभागिता क्यंगु दु। ब्वति मकयां नं छु याये, मकाल कि माओवादी धकाः आशंका याइगु भय। थ्व ग्याःचिकुं यानाः ब्वति कायेमाःगु जुया बिउगु खः। हानं ग्वसाः खलः नं राजनैतिक संस्था मखु। नेपाल उद्योग बाणिज्य महासंघ धइगु व्यापारीतय्गु संस्था खः। अले शान्तिया कामना यायेगु धइगु
राजनैतिक नारा नं मखु। छुं नं राजनैतिक प्रतिबद्धता वा बिचाः दुसां मदुसां सहभागी जुइत आपत्ति दुगु ला ख हे मखुत।
व्यापारिक संस्थां ग्वसाः ग्वःगु र्याली बिल्कुल निष्पक्ष अले आग्रह पूर्वाग्रहपाखें नं अलग्ग जइमाःगु खः। तर थथे मजुसे गनं पक्षपाती जुल ला धइथें छगू पक्षयात जक दबाब बीगु निंतिं ग्वसाः ग्वःगु आशंका ब्वलंका बिल। छाय्धाःसां ग्वसाः खलकं र्याली ताःलाःगु तायेकूगु दु। आमहडताल लित कायेवं ताःलाःगु खःसा आमहडताल दिकेत जक ग्वसाः ग्वःगु जुल। वास्तविक शान्ति प्राप्त यायेगु तातुना मखुला धइथें जुल। शान्ति प्राप्त यायेगु निंतिं निगू पक्षयात बरोबर दबाब बी मफुगु जुल वा दबाब बीगु तातुनां विमुख जुयाः शान्ति र्याली छगू पक्षयागु प्रायोजित जकं मखुला धकाः आशंका यायेगु थाय् ब्वलंका बिउगु दु। समस्या पूर्ण रुपं मज्यंतले र्याली गथे ताःलाइ? समस्या ज्यंगु मखुनि लिहां जक वंगु खः, समस्या थातिं दनि। याकनं उचित निकास बी मफुत धाःसा झन उग्र जुइ ।
खय्त ला फुक्क राजनैतिक पार्टी जनताया दथुइ गुलि लोकप्रिय धकाः धयाच्वनेमाःगु आवश्यक मदु। संविधानसभाया चुनावं क्यनाबिउगु हे दु। जनताया विश्वास कायेत माओवादी ताःलाःगु दु। थ्व आमहडतालयात नं सरकारी पक्षं तकं शान्तिपूर्ण जूगु दु धकाः च्वछायाहःगु बुखँत पिहांवःगु खनेदत। कार्यकर्तातय्गु अनुशासन, आचरण आदियात सकस्यां प्रशंसा हे याःगु दु ।
आः थ्व शान्ति र्यालिं राजनैतिक पार्टीतय्त आदेश बीगु ज्या नं जूगु दु। आदेश खः, ४८ घौया दुने समाधान मा, मखुसा जनतां मेगु पलाः ल्ह्वनेत बाध्य जुइ। थुकी नं माओवादीं १२ घौया दुने थःगु ल्हाती दुगु छगू उचाइलय् थ्यनाच्वंगु वा निर्णायक मोडय् थ्यनेधुंकूगु आमहडताल तुरुन्त लितकयाः जनताया आदेश पालना यानाक्यंगु दु। थःत जनताया आज्ञाकारी खः धइगु प्रमाणित यायेत पूवंक हे ताःलाःगु खनेदत। ग्वसाः खलकं सुभाय् बीत नं करं क्यन। थ्व ल्याखं छम्ह स्वतन्त्र इमान्दार बुद्धिजीवी नागरिकया मिखाय् अवश्य नं बांलाःगु लिच्वः लानाः राजनैतिक साख अप्वया वनी धइगु विश्वास यायेथाय् यक्व दु ।
र्यालीया ग्वसाः खलः व जनतां बांलाक थू हे जुइमाः, समस्याय् छगू पक्ष जक मखु निगुलिं पक्ष उलि हे जिम्मेवार खः। छपा ल्हातिं जक मरि बुइ मखु, निपा ल्हातिं जायेमाः थें निखलः जाःसा जक स्थायी शान्ति प्राप्त जुइ। उकिं ग्वसाः खलकं मेगु जिम्मेवार पक्ष धइगु सरकार पक्षयात नं पहल यायेगु ल्याखं प्रधानमन्त्री माधव कुमार नेपालयात नापलानाः राजीनामा बीत इनाप यात। तर प्रधानमन्त्री नेपालं बचं जक हिउगु जक मखु, अःखःबतं ग्वसाः खलःया ब्यापारी, उद्योगपतितय्त माओवादीयात आरक्षण बीपिं, संरक्षण बीपिं, लजगा बीपिं, हापं बीपिं आदि इत्यादि धयाः सर्पयात दुरु त्वंकूगु धइगु द्वपंया 'सिरपाः' बियाहल। देय्या उद्योगपतितय्सं लजगा मबिउसा सुनां बी? निश्चय नं माओवादी बाहेक मेगु राजनैतिक पार्टीया कार्यकर्तातय्त नं लजगाः बियाच्वंगु दयेमाः। देय्या नागरिकतय्त लजगाः बीगु धइगु गुगुं नं हालतय् बांमलाःगु ज्या मखु। हापं धइगु न्ह्यालाः मखु, ब्यापारीतय्गु बाध्यता खः धइगु खँ प्रधानमन्त्रीं मथूगु खःला? प्रधानमन्त्रीया बौद्धिक स्तरयात मूल्यांकन यायेगु आवश्यकता जूगु दु। अवश्य नं ब्वति कयादीपं उद्योगपति, ब्यापारी, शिक्षित व बौद्धिक काठमाण्डौंया जनतां मूल्यांकन याइ तिनि। अले थ्व सिरपाःया उचित लिसः भविष्यइ स्वये दइ तिनि ।
प्रधानमन्त्रीया सिरपाःया नापनापं शान्ति र्यालीया कामना शान्ति प्राप्त यायेगु लक्ष नं तसकं तापाना वंगु दु। नापं थातिं लानाच्वंगु छगू पक्षया खिपः गुगुं इलय् नं चबुइगु भय नं तच्वयावःगु दु। अले र्यालीया ग्वसाःतय्गु ब्वहलय् तःधंगु दायित्व दिउवःगु दु। न्ह्याथे यानाः नं थ्व भययात पनेमाःगु दु। फयांफछि याकनं हे आवश्यक दबाब बीत माःथाय् तक पलाः ल्ह्वनेमाःगु दु। मा हे माल धाःसा वास्तविक शान्तिया नितिं हानं मेगु र्यालीया ग्वसाः ग्वयाः न्हापा स्वयां अप्वः जनसहभागिता क्यनेगु आँट याये फयेकेमाः। मखुसा दिउगु आम हडताल मेगु ग्यानापुगु रुप ज्वनाः लिहां मवइ धकाः धाये फइगु अवस्था मदु ।
More Stories Like this
जातीय संघीयताया खँय् नेमकिपा प्राडो, पाजेरो ब्वाकेगु ख्यः मखु राष्ट्रपति प्रणाली बारे विवाद नेवाःतय्त जागृत याइगु 'नेपाःमिया नुगः सः' खँ स्वनिगःया
