सतकं संविधान हयेगु तयारी

माओवादीया थःगु हे संविधान तयार

येँ (सन्ध्या टाइम्स)/एकीकृत नेकपा (माओवादीं) संविधानसभाया म्याद थप याये हे मालीगु अवस्था ब्वलन धाःसा सतकं हे संविधान जारी यायेगु निंतिं धकाः थःगु हे कथंया छगू संविधान तयार हे याना तयेधुंकूगु खँ सीदुगु दु।
माओवादी पार्टीं तयार याःगु संविधानय् संविधानसभाया विषयगत समितितपाखें तयार याःगु बुँदात दुथ्याकातःगु दु। उगु संविधानया खाका सार्वजनिक याःगु मदुनिसां पार्टीया नेतातय्सं उकी अध्ययन धाःसा यानाच्वंगु दु ।

थौंया दिनय् तकं वर्तमान सरकारं राजीनामा मबीकं गुगु नं हालतय् संविधानसभाया म्याद थप यायेगु जुइ मखु धया वयाच्वंगु माओवादीं छुं जुयाः अन्तिम इलय् संविधानया म्याद थप हे याये मालीगु अवस्था ब्वलन धाःसा राजनीतिक पहलकदमी न्ह्यःने लाकेगु कथं सतकं संविधान जारी यायेत्यंगु खः ।

माओवादीया वरिष्ठ नेता डा. बाबुराम भट्टराईया नेतृत्वय् दयेकूगु समितिं संविधानया थ्व खाका तयार याःगु खः। समितिइ संविधानसभाया विषयगत समितिइ माओवादीपाखें प्रतिनिधित्व यानाच्वंपिं सभाद्त नं दुथ्याः। माओवादीं न्हापा सतकं हे संघीय गणतन्त्र नेपाःया राज्यत धकाः नेवाः नापं थीथी जातीय राज्यया गुगु कथं घोषणा यात उकथं हे संविधान नं घोषणाया यायेगु तयारी याःगु खः।
माओवादीं सतकं घोषणा यायेत तयार याःगु उगु संविधानया नां 'जनताया संघीय लोकतान्त्रिक गणतन्त्रया संविधान' तयातःगु दुसा उकी जातीय आधारय् नेवाः नापं थीथी राज्यत दइगु व फुक्कं भाषायात समान अधिकार दइगु खँ उल्लेख जुयाच्वंगु दु ।

वंगु वैशाख १८ गते लिपा माओवादीं न्ह्याकूगु अनिश्चितकालीन आन्दोलनया दथुइ हे सतकं संविधान घोषणा यायेगु तयारी याःगु जूसां संविधानया खाका माःगु कथं तयार मजूनिगु व आन्तरिक कमजोरीं यानाः सतकं संविधान घोषणा यायेगु ज्या अबलय् मयाःगु खः ।

शिविरय् नं समायोजनया तयारी

संविधानसभाया म्याद थपे याये न्ह्यः सेना समायोजनया ज्या क्वचायेकेगु व समायोजन यायेबलय् उकिया संख्या गुलि जुइमाः धकाः सीकेगु लागिं सरकारं सभासद्तय् छगू पुचः नीस्वंगु दु। सेना समायोजनया ज्याय् सभासदया पुचः नीस्वनाः ज्या न्ह्याकूगुयात माओवादीं गम्भीर रुपं काःगु दु ।

उखे माओवादीं प्यलाया दुने सेना समायोजनया ज्या क्वचायेके धकाः धाःगु खँयात पूरा यायेत थीथी शिविरय् च्वनाच्वंपिं माओवादी लडाकुतय्सं पलाः न्ह्याकीगु खँ धाःगु दु। प्यलां सेना समायोजन याये फइगु खँ ला मखु तर नं थ्व मयायेकं देशय् शान्ति व संविधान वइगु सम्भावना मदुगुलिं प्यलाया दुने क्वचायेकेगु कथं शिविरय् ज्या न्ह्याकेगु खँ धाःगु दु ।