सुनां पना तल सेना समायोजनयात?

सरकार व माओवादी दथुइ जुयाच्वंगु वार्ता माओवादी लडाकु समायोजनय् वयाः थाः वःगु दु। सरकार व सरकार समर्थित पार्टीतय्सं माओवादीयात थःपिनि सेना विघटन यायेमाः धासें उमित नागरिक पार्टीइ रुपान्तरण जुइत दवाव बियाहःगु दु। वास्तवय् एमाले, कांग्रेस पार्टीं माओवादीयात सेना विघटन यानाः नागरिक पार्टी जू वा धकाः बियाच्वंगु थ्व दवाव अतिकं हास्यास्पद खः। माओवादी नागरिक पार्टी मजूतले सत्ताय् छ्वये मखु धकाः अडान कयाच्वंगु ला झन मुर्खताया पराकाष्ठा हे खः। छाय्धाःसां माओवादी थःपिनि लडाकुयात शिविरय् तयाः सत्ताय् ला थ्व स्वयां न्ह्यः च्वने हे धुंकूगु खः। माओवादीलिसे जानाः आन्दोलन यायेत लडाकु विघटन यायेम्वाःगु, चुनाव ल्वायेत विघटन याये म्वाःगु, थौं वयाः आकाझाकां लडाकु विघटन यायेमाः धकाः अडान कयाहःगु स्वयम्य् छगू अजूचायापुगु खँ खः। माओवादी सेना विघटन याये मखु धकाः पनाच्वंपिं माओवादीत मखु। उपिं नं विघटनया पक्षय् दु। तर गय् यानाः यायेगु धइगु खँय् विवाद दनि। विवाद समाधान मजूतले गय् यानाः समाधान यायेगु? माओवादीं धाःथे यायेगु खःसा कन्हय् हे समायोजन जुइ। उकिं समायोजनया पंगः जुयाच्वंपिं एमाले व कांग्रेस हे खः। देश थौंया अवस्था तक थ्यंगु थ्वहे सेनाया कारणं खः। उकिं थौंया राजनीतिक उपलब्धीयात थ्व सेनां आक्रमण मखु सुरक्षा याइगु खँय् शंका मदु। बरु एमाले व कांग्रेसं पत्याः यानाच्वंगु नेपाली सेनां 'कू' याइगु हल्ला जुयाच्वंगु दु। जनताया पक्षय् ल्वाःपिं सेनायात यदि अपमानित ढंगं विघटन यात धाःसा उकिं कन्हय् मेगु समस्या पिहां वइगु खँ ल्वःमंके मजिउ ।

More Stories Like this