प्रमया दावेदारत ग्वाःग्वाः
फुक्क नेतातय्त प्रम दयेकेगु आश्वासन
येँ (सन्ध्या टाइम्स)/माओवादी अध्यक्ष प्रचण्डं यदि माधव नेपालं राजीनामा बिल धाःसा वयां लिपा न्ह्याम्ह हे प्रधानमन्त्री जूसां थःपिंत स्वीकार्य दु धायेवं थीथी राजनीतिक पार्टी दुने आः प्रधानमन्त्रीया लागिं दावी यायेत अनेक नेतात सुरे जुया वःगु खँ सूत्रं धाःगु दु ।
माओवादी अध्यक्ष प्रचण्डं म्हीग थःत नापलाः वःम्ह एमाले अध्यक्ष झलनाथ खनालयात 'यदि माधवया राजीनामा वल धाःसा छि नं प्रधानमन्त्री जुयादीफु, भचा तयारी यानादिसँ' धकाः आश्वासन बियादीगु खँ सूत्रं धाःगु दु। प्रचण्डया थ्व आश्वासनं खनाल लय्ताःगु खँ नं सूत्रं धाःगु दु ।
अथे हे प्रचण्डं प्यन्हुजालय् कांग्रेस संसदीय दलया नेता रामचन्द्र पौडेलयात फोन यानाः 'माधव वन धाःसा छि हे प्रधानमन्त्री जुइमालेफु' धकाः बिचाः प्वंकादीगु खँ नं धाःगु दु। प्रचण्डया उगु फोन वयेधुंकाः पौडेलं विमलेन्द्र निधिपिंत प्रचण्डया थाय् छ्वयाः वार्ता याकूगु खः। अथे खःसां कांग्रेसया कार्यवाहक सभापति सुशील कोइराला नं छम्ह सभासद्यात राजीनामा याकाः संसदय् दुहां वयाः प्रधानमन्त्रीया दावेदार जुइत स्वयाच्वंगु दु ।
उखे एमाले नेता खड्ग ओलीयात सदनय् दुकयाः वय्कःया हे प्रधानमन्त्री दयेकेगु लागिं भारत लगे जुयाच्वंगु खँ नं सूत्रं धाःगु दु। ओलीया लागिं सभासद शिला कतिलां राजीनामा बीफु धाःगु दु ।
प्यलाया दुने सेना समायोजन असम्भव
समस्या समाधान यायेगु लागिं माओवादीं प्यलाया दुने सेना समायोजन याये सिधयेके धकाः पिने न्ववाःसां वास्तवय् सेना समायोजनया ज्या यायेत प्यलाया ई मगाःगु खँ जानकारतय्सं धाःगु दु ।
थ्व सम्बन्धी विज्ञ गेजा शर्मां सेना समायोजनया खँ जक क्वचायेकेत हे दछिया ई मालीगु व उमित धाथें समायोजन नं यायेगु खःसा कम से कम नं स्वदँ मालीगु खँ धयादीगु दु।
अथे हे माओवादीया पुलांम्ह सांसद एवं पूर्व सैनिक अधिकृत कुमार फुदुंगं नं सेना समायोजन यायेगु लागि प्यलाया ई मगाः धयादीगु दु। वय्कःया कथं नं थुकिया लागिं निदँ निसें स्वदँया ई माः। माओवादी सेना समायोजनया लागिं वंगु प्यदँ न्ह्यवंनिसें जुयाच्वंगु कुतः ताःलानाच्वंगु मदुसां माओवादीं थुगुसी प्यलाया दुने क्वचायेकेगु धकाः आश्वासन बिउगु खः ।
माओवादीं प्यलाया दुने सेना समायोजन याये धाःगु ई ला मगाः धइगु बिचाः वयाच्वंगु इलय् उखे एमाले व कांग्रेसं धाःसा प्यला मदु लछिया दुने हे समायोजनया ज्या क्वचायेकेमाः धकाः दवाव बियाच्वंगु दनि। थुकिया लागिं सेनाया ल्याः हे विवादास्पद जुयाच्वंगु दनि ।
