डा. शाक्यया छपुलु ब्वनेधुंकाः

शान्तरत्न शाक्य

* शाक्य समाजया न्हापांगु सम्मेलन

हनेबहःम्ह नेपाः राष्ट्रिय पार्टीया नायः लिसें बौद्धधर्म विज्ञ डा. केशवमान शाक्यजुया अनलाथ्व ४, कुन्हु 'सन्ध्या टाइम्स'य् पिदंगु च्वसु 'राष्ट्रिय शाक्य समाज अधिवेशन: छपुलु' मन तयेक ब्वनेधुंकाः जितः छुं छुं मगाःमचाः, त्रुटि भिंकेमाःगु तायाः थ्व च्वसा न्ह्याकाच्वना ।

१) पहिचानमूलक उलेज्या:
सम्मेलन उलेज्या मौलिक व गौरवमय कथं जुल। शाक्य समाजया म्हसीका न्ह्यब्वयेकथं प्यपु ध्वाँय् ब्वयेकेज्या जुल। क) शाक्य जुइत विहारय् प्रवजित जुइमाःगु मान्यता कथं प्रवजित शाक्य लु दुगु 'शाक्य ध्वाँय्'। ख) शाक्य धइपिं नेवाः खः धइगु प्रतीक कथं 'नेवाः ध्वाँय्'। ग) शाक्य धइपिं बौद्ध खः धइगु कथं 'बौद्ध ध्वाँय्'। घ) शाक्य धइपिं नेपाःमि खः धइगु ल्याखं नेपाःया 'राष्ट्रिय ध्वाँय्'। झण्डात्तोलन यानाः शाक्यतय्गु म्हसीका राष्ट्रिय रुपं अनुमोदन याःगु जुल।
च्वमि शाक्यजुया थुपिं न्ह्यथनां खँ छु सीदत धाःसा शाक्यत थ्व राष्ट्र दुने, राष्ट्र व राष्ट्रियता कय्च्यानाः न्ह्याः वयाच्वंपिं खः। थुमिगु नुगः दुने राष्ट्र व राष्ट्रियता, धर्म व राष्ट्र दुने थःगु बिस्कं म्हसीका ल्यंकाच्वंपिं खः धइगु खँय् गुलि संवेदनशीलता दु धइगु ब्वया बिउगु ताल। लिसें शाक्यतय्गु थःगु म्हसीका बीगु बिस्कं पहःया ध्वाँय् नं दु, गुगु न्हापांखुसी सार्वजनिक जूगु खः। उकिया जानकारी नं बियादीगु च्वछायेबहः ताल ।

२) नालेबहःगु उलेज्या:
मेमेगु सभा समारोह, गोष्ठी, विमोचन ज्याझ्वलय् जुइगु उलेज्या प्रयोजनय् छ्यलीगु गणेद्यः दुगु त्वाःदेवा/सुकुन्दा मच्याकुसे 'सप्ततिंस बोधिपाक्षिय धर्म'या प्रतीक स्वीन्हय्प्वाः देवा दुगु प्रकाश वृक्ष (जःया बोधिवृक्ष) थीथी जिल्लां बिज्याःपिं प्रतिनिधितय्सं प्रज्वलित याःगु जुल धकाः न्ह्यथना तःगु धाःसा पाय्छि मजुल। उकियात भिंकेमाःगु तायेकुसें च्वयाच्वना ।

क) उलेज्याय् थीथी जिल्ला प्रतिनिधिपिंपाखें च्याकूगु बोधिपाक्षिय स्वीन्हय्प्वाः मतया 'प्रकाश वृक्ष' अथवा 'जः बोधिवृक्ष' मखु। अपितु 'बोधिमत' खः। गुगु बोधिमतयात छ्यलेगु ज्या यक्व सभा समारोह, सम्मेलन, गोष्ठी आदिइ जुइधुंकूगु दु। १०क्वःगु राष्ट्रिय बौद्ध सम्मेलन, लुम्बिनी, आयोजक: धर्मोदय सभाया उलेज्या नेपाःया न्हापांम्ह राष्ट्रपति डा. रामवरण यादवं यानादीगु खः। 'बोधिमत' धइगु छपाः चिच्चापाःगु प्लेकार्ड तकं ब्वयातयागु दुसां डा. शाक्यजुया ध्यान मवंगु जुयाच्वन।

ख) बोधिमत छु खः?
नीन्याप्वाः मतया संयोजन यानाः दयेकातःगु 'बोधिमत' बुद्ध, धर्म व संघप्रति समर्पित यानातःगुया प्रतीक खः। १) दकलय् च्वय् छप्वाः मत - बुद्धयात, २) वयां क्वय्या जःखः निप्वाः मत - धर्म व संघयात, ३) वयां नं क्वय्या तँय् च्वंगु प्यप्वाः मत - चतुआर्य सत्ययात, ४) वयां नं क्वय् तँय् तयातःगु च्याप्वाः मत - आर्य अष्टाङ्गिक मार्गयात, ५) दकलय् क्वय्या तँय् तयातःगु झिप्वाः मत - दशपारिमितायात देछानागु प्रतीक कथंया नीन्याप्वाः देवा मतया संयोजन स्वरुप मतया नां 'बोधिमत' खः। गुगु मतया न्हापांगु उलेज्या थाइल्याण्डया महामहीम राजदूत डा. रानारोङजुं यानादीगु खः। डा. शाक्यया सुझाव व हःपाः कथं युवा बौद्ध समूहया ग्वसालय् नगरमण्डप श्रीकीर्ति विहार, किपुली जूगु झिंन्यागू जिल्लाया न्यय्म्ह तामाङ गुरुपिंत 'बौद्ध जागरण तथा नेतृत्व विकास प्रशिक्षण शिविर'य् जूगु खः ।

ग) जेष्ठ नागरिक सम्मान, मूपाहां मुक्त उलेज्या:
स्वनिगः दुनेया सम्भवतः दकलय् जिथिम्ह ख्वपया मय्जु छलमाया शाक्य (१०१ दँ), येँया भाजुरत्न शाक्य महास्थविर (९६ दँ) यात हनेकथं वसपोलपिनिगु ल्हातिं राष्ट्रिय शाक्य समाज अधिवेशनया ब्यानर उलेज्या जूगु जुल। थुकथं मूपाहां ब्वनेगु बन्देज मुक्त जुयाः अधिवेशनया मौलिक उलेज्या जूगुली लय्ताः प्वंकेज्या तसकं सुखदायी खँ जुल।
थुगु उलेज्या सम्बन्धि चौलागा १३ या 'सन्ध्या टाइम्स'य् पिदंगु छपु च्वसुइ 'छलमाया शाक्य'या नां द्वंकाः 'कालुमाया शाक्य', अथेहे डा. शाक्यया च्वसुइ 'छलकुमारी शाक्य' जुयाच्वंगु भचा असावधानीं थ्व च्वमिया नुगलय् स्याःगु दु। छलमाया शाक्यजुया परिवारपाखें असन्तोष प्वंकूगु खँ थन न्ह्यथनाच्वना। नेपाःया जिथि, नेवाः मात्रया निंतिं छम्ह जिथिम्ह मय्जु छलमाया शाक्यया नां शुद्धरुपं पिब्वये मफुगु पत्रकारिता ख्यःया नितिं तसकं मछालापुगु खँ थें ताः।

३) राष्ट्रिय शाक्य समाज नेपाःया न्हापांगु अधिवेशनपाखें नेपाःया सांगठनिक ख्यलय् नां, दां, इज्जत, प्रतिष्ठाया नितिं मूपाहां सःताः थःपिनि हे सम्मानित व्यक्तित्वपिंत खिउँ थासय् लाकेगु ज्याखं उन्मुक्त जुइमाःगु सन्देश प्रशारण याःगु दु।

४) अधिवेशनया उलेज्या कथं न्यासः, द्वःछि दां ल्हापं कयाः शाक्य संगठनया नामय् न्यागूतारे होटलय् पारिवारिक पिकनिक यायेगु परम्परां पिहां वयाः जा, केँ, तरकारी, अचारया तसकं सादा भोजन नयाः झितका दां जक ल्हापं पुलाः थ्व अधिवेशन सुथांलाःगु जुल। थुगु अधिवेशन सार्थक व पूवंकेत तःदँ न्ह्यःनिसें मदिक्क कुतः यानाबिज्याःम्ह प्रा. सुवर्ण शाक्यप्रति कृतज्ञता प्वंकाच्वना धासें छपुचः शाक्यतय्सं पूर्वाग्रह तयाः अधिवेशनय् ब्वति मकाःगु खँ धाःसा हीनताबोध व बडप्पन अभिब्यक्त जूगु नुगःखँ तायेकाः दुःख प्वंकेगु नं ल्वःममंम्ह डा. शाक्यजुयात म्हं मफुसां निन्हुयंकं अधिवेशनय् झायाः थःगु अवलोकन सार्वजनिक यानाः मेमेगु समाजयात तकं प्रेरणा दयेमा धकाः च्वसुया अन्तय् अभिब्यक्त भावयात जिं थःगु व्यक्तिगत कुतःया नं हःपाः तायेका। डा. केशवमान शाक्ययात दुनुगलं साधुवाद देछायाच्वना ।

More Stories Like this