म्याद थपे यायेत सहमत
संविधानसभां माओवादी बाम्हय् कात
येँ (सन्ध्या टाइम्स)/प्रमुख प्रतिपक्षी एनेकपा (माओवादी) नं अन्ततः संविधानसभाया म्याद थपे यायेत सहमत जूगु दु ।
थःपिंसं हे संविधानसभाया मुद्दा ल्ह्वनाः जनयुद्ध यानागु व संविधानसभायात थःपिंसं बुइकाम्ह मचा धकाः दावी याइपिं माओवादी नेतातय्तसं आः संविधानसभां संविधान दयेकीगु इलय् थ्यंकाः धाःसा संविधानसभाया म्याद थपे याये मखु धाल धाःसा माओवादीया कारणं हे संविधानसभा भंग जुल धइगु अर्थ वनीगु जुयाः अन्ततः उपिं नं 'बिना शर्त' संविधानसभाया म्याद थपे यायेत सहमत जूगु खँ सूत्रं धाःगु दु ।
संविधानसभाया म्याद थप मजुल धाःसा राजनीतिक शुन्यता वइगु अले उगु इलय् राष्ट्रपतिं थःगु ल्हातय् शासन कायेत स्वइ धइगु विश्लेषण यासें माओवादी म्याद थप यायेगु ज्याय् सही तयेत तयार जूगु खः। थ्व स्वयां न्ह्यः माओवादीं वर्तमान सरकारं राजीनामा मबीगु खःसा संविधानसभाया म्याद थप याके मखु धकाः शर्त तया वयाच्वंगु खः ।
सूत्रया कथं छुं जुयाः म्याद थपे याये मफयाः संविधानसभा भंग जुल धाःसा माओवादीं विद्रोह यानाः सत्ता कब्जा याये फइ धइगु विश्लेषण नं न्हापा जुयाच्वंगु खः। तर आः वयाः अज्याःगु विद्रोहया अवस्था नं मदुगुलिं माओवादीं संविधानसभाया म्याद थप यायेगुली हे थःपिनि कल्याण जुइ धकाः तायेकूगु खँ सूत्रं धाःगु दु ।
थ्वहे वइगु जेष्ठ १४ गते संविधानसभाया म्याद क्वचाइगु जुयाः व स्वयां न्ह्यः हे माओवादीं सत्तासिन पार्टी नेपाली कांग्रेस व नेकपा (एमाले) लिसे छगू कथंया सहमति यायेगु निंतिं दुने दुनें अनौपचारिक वार्ता नं न्ह्याकाच्वंगु दु। संविधानसभाया म्याद थपे यायेगु लागिं माओवादीया साथ मदयेकं मगाःगु जुयाः नेपाली कांग्रेस व एमालें नं माओवादीया थीथी तहया नेतात नापलानाः खँल्हाबल्हा ब्याकाच्वंगु दु ।
संविधानसभाया म्याद थपे याःसां नं प्रधानमन्त्री माधव नेपालं धाःसा राजीनामा बीगु छुं हे सम्भावना मदुगु खँ सूत्रं धाःगु दु ।
'जिं भारत विरुद्ध न्वमवाना नि !'
खुन्हु तक न्ह्याःगु आमहडताल आकाझाकां दिकाः खुलामञ्चय् सभा याः कुन्हु हे बहनी माओवादी अध्यक्ष प्रचण्डं भारतीय एजेण्ट धकाः नांजाःम्ह पुर्व सांसद अमरेशकुमार सिंहयात फोन यानाः धयादिल, 'थौंया जिगु भाषण न्यनादिया ला? थौं जिं भारतयात छुं हे मधया।' वास्तवय् आः माओवादी भारतलिसे नं स्वापू बांलाकाः हे वनेमाली धइगु निष्कर्षय् थ्यंगुया दसि थ्व जुइमाः धकाः थन टिप्पणी जूगु दु। अध्यक्ष प्रचण्डं आः सरकार परिवर्तन जुल धाःसा प्रधानमन्त्री न्ह्याम्ह नं जुइफु धकाः नं धायेगु याना हःगु दु ।
