वार्ता न्ह्यानाच्वंगु सकारात्मक खः

अलग अलग फस्वयाः च्वनाच्वंपिं माओवादी व सत्तारुढ दल नेपाली कांग्रेसयाया नेतातय् दथुइ अनौपचारिक खँल्हाबल्हा जूगु दु। वार्ता तक हे याये मखु धइगु तहलय् थ्यनाच्वंपिं नेतातय् दथुइ कम से कम अनौपचारिक हे जूसां वार्ता शुरु जूगु दु। उकियात सकस्यां लसकुस यायेमाः। संवाद शुरु जुइवं न्ह्यागुसां सहमति वइ धकाः आशा यायेगु स्वाभाविक खः ।

तर राजनीतिक पार्टीतय् दथुइ आः गुगु विषययात कयाः संवाद शुरु जूगु खः उकी सर्वसाधारण जनता लय्तायेमाःगु आवश्यकता धाःसा मदु। छाय्धाःसां निगू दिशाय् फस्वःपिं पार्टीतय् दथुइ आः जुयाच्वंगु संवाद संविधानसभाया म्याद थपे यायेगु बारे खः। संविधानसभाया म्याद थ्वहे जेठ १४ गते क्वचायेत्यंगु दु। छुं जुयाः संविधानसभा भंग जुल धाःसा दकलय् तःधंगु मार लाइपिं धइपिं राजनीतिक पार्टीत हे खः। संविधानसभा मदयेसातकि उमिगु वैधानिक राजनीतिक हैसियत नं दइ मखु। राज्यशक्तिइ सहज पहुँच दइ मखु। राज्य कोषं काये खनाच्वंगु भत्ता व सुविधात फुक्कं बन्द जुइ। उकिं अज्याःगु अवस्था मवयेमा धकाः राजनीतिक दलत संविधानसभाया म्याद थपे याये हे माः धइगु लाइनय् ब्वाँय् जुयाच्वंगु दु। तर सर्वसाधारण जनताया लागिं संविधानसभाया म्याद थपे याना वा मयानालिसे छुं हे सरोकार मदु। संविधानसभा धइगु संविधान दयेके धकाः वःगु खः। थ्वं संविधान दयेकल लाकि मदयेकल, जनताया मू ध्यान उकी खः। म्याद थपे यायेत चांन्हि मधासे खटे जुइगु तर संविधान दयेेकेगु सवालय् धाःसा बैठक छगू तकं मच्वँसे हठी जुयाच्वनेगु ज्यायात पाय्छि धाये फइ मखु ।

More Stories Like this