ओवामाया फिड दि नेशन ज्याझ्वलय् नेपाः नं ल्यल

अमेरिकी सरकारं हिलंया अल्पविकसित विकासन्मुख नापं म्हो विकसित देय्या निंतिं तयार याःगु फिड द पुयुचर इनिसिएटिभ ज्याझ्वलय् नेपाः नं ल्यःगु दु । थुगु ज्याझ्वःया नितिं ल्यःगु प्रमुख नीगू देय्म मध्ये एशियां नेपाः, बङ्गलादेश, क्याम्बोडिया व ताजिकिस्तान लाःगु दु । इनिसिएटिभ सम्बन्धित देय्या स्वामित्व व कृषि केन्द्रित बृहत ज्याझ्वः खः ।

अमेरिकी राष्ट्रपति वराक ओवामां थुगु ज्याझ्वलं विकासोन्मुख देय्या ताःई न्ह्यःनिसेंया भोक व गरिबी न्यूनिकरणय् ग्वाहालि जुइगु विश्वास प्वंकूगु दु । ओवामां अमेरिकी सरकारं खाद्य सुरक्षायात मुख्य प्राथमिकताय् तःगु हुनिं थुगु ज्याझ्वः तयार जूगु धाःगु दु । नेपाःया चय्गु प्रतिशत स्वयां अप्वः जनता कृषि क्षेत्रय् निर्भर जूसां मुख्य बालीया उत्पादनय् गिरावट वःगु व खुइन्हय्गु प्रतिशत नेपाली खाद्यान्नया म्हो खनेदुगु लिपांगु प्रतिवेदनया लिधंसाय् नेपाः नं दुथ्याकूगु खः ।

अध्यन कथं नेपालय् न्यादँ क्वय्या थ्यंमथ्यं बच्छि मस्त कुपोषित जुयाच्वंगु दु । थुगु ज्याझ्वलं खाद्यान्नया माग पूरा यायेत कृषि उत्पादन अप्वयेकेत रोजगारीया ह्वताः चूलाकेत व आय आर्जन अप्वयेकेत ग्वाहालि याइगु बिश्वास अमेरिका सरकारं काःगु दु । थुकिया नितिं स्वंगू अर्ब न्यय्गु कोटि डलर बराबरया कोषं अमेरिकां नेपालय् दिर्घकालीन भोकमारीया समस्या ज्यंकेगु क्षेत्रय् लगानी याइ ।

More Stories Like this