नेवाःत हाकनं आन्दोलनय्

शुक्रवाः आन्दोलनया ज्याझ्वः पित बीगु

येँ (सन्ध्या टाइम्स)/न्हूगु संविधानय् नेवाः स्वायत्त राज्य सुनिश्चित जुइमाःगु माग यासें नेवाः स्वायत्त राज्य मंकाः संघर्ष समितिं आन्दोलन यायेगु निर्णय याःगु दु ।

न्हूगु संविधान जारी यायेगु तिथि कथं क्वःछिनातःगु जेठ १४ गते न्ह्यःने थ्यनेधुंकाः नं संविधान पिहां वइगु सम्भावना खने मदयेवं संघर्ष समितिं आः आन्दोलन बाहेक मेगु विकल्प मदु धासें संघर्षया घोषणा याःगु खः। संघर्ष समितिं आः वइगु जेठ १४ गते दुने हे आन्दोलनया ज्याझ्वः पित बीगु खँ नं धाःगु दु ।

संघर्ष समितिया म्हिगः च्वंगु मुँज्यां नेवाः स्वायत्त प्रदेश, धर्म निरपेक्षता व संघीयतायात सुनिश्चित यायेगु निंतिं संघर्षय् कुहां वनेगु निर्णय याःगु खः ।

संविधानसभायात रक्षा यायेगु नितिं नापं संघीय लोकतान्त्रिक गणतन्त्रया स्थायित्वया निंतिं नं नेवाः आन्दोलन न्ह्याकेमाःगु खँ संघर्ष समितिया नायः सुजिव बज्राचार्यं कनादीगु दु ।

वर्तमान राजनीतिक अवस्थायात ध्यानय् तया नेवाःतय्गु हक अधिकार सुनिश्चित यायेगु निंतिं आन्दोलन याये हे माःगु तायेकाः थःपिं न्ह्याः वनेत्यनागु खँ नं वय्कलं कनादीगु दु ।

आः न्ह्याकेगु आन्दोलनया स्वरुपया बारे सहलह यायेत वइगु शुक्रवाः नेवाः स्वायत्त राज्य मंकाः संघर्ष समितिया समन्वय समिति नापं नेवाः ख्यःया न्ह्यलुवातय् छगू तःधंगु भेला नं याइगु जूगु दु। वहे भेलां आन्दोलनया ज्याझ्वः अनुमोदन याकीगु ग्वसाः दु ।

संघर्ष समितिं आः दयेकीगु आन्दोलनया ज्याझ्वः खास यानाः राजनीतिक दलत व संविधानसभाया सभासदतय्त दवाव बीगु कथंया जुइ धाःगु दु। आन्दोलनया कार्यक्रम अप्वः यानाः सतकय् कुहां वयाः यायेगु हे प्रकृतिया जुइ धकाः नं धाःगु दु। अथे खःसां गज्याःगज्याःगु आन्दोलन जुइ धइगु खँ संघर्ष समितिं शनिवाः जक सार्वजनिक याइगु जूगु दु ।

वंगु बैशाख १४ गते नेवाः स्वायत्त राज्य मंकाः संघर्ष समितिं नेवाः स्वायत्त राज्य सुनिश्चित जुइमाःगु नापं क्वःछिनातःगु इलय् हे न्हूगु संविधान जारी यायेमाःगु माग यासें संविधानसभा घेरे यानाः संविधानसभा अध्यक्ष सुवास नेम्वाङयात ज्ञापनपौ लःल्हाःगु खः ।

संविधान जारी यायेगु ई लिबाना वंलिसे न्हूगु संविधानय् जातीय स्वरुप दुमथ्याकेगु षडयन्त्र नं शुरु याना हःगुलिं नेवाः लगायतया आदिवासी जनजातित हानं संघर्षय् हे कुहां वनेमाःगु महसुस याना हःगु दु ।