समस्या झन जटिल

कृष्ण प्रजापति

- कम्युनिष्ट पार्टीया सम्बन्ध विशेष यानाः आधारभूत वर्गयापिं जनताय् थ्यनीगु स्वाभाविक खः तर नेपाःया सन्दर्भय् माओवादीं थःगु पकड आधारभूत वर्गय् अझ अप्वः न्यंकूगु खनेदत ।

थीथी कथं सिर्जना जूवःगु राजनीतिक समस्या समाधान यायेगु निंतिं थीथी कथंया कुतः लिपा आः हाकनं छक्वः राजनीतिक समस्या जटिल मोडय् थ्यंगु दु। आन्दोलनरत दल एकीकृत माओवादीयात सरकारं औपचारिक पौ छ्वयेधुंकाः नं उगु पती सेना समायोजन, कब्जा जग्गा लित बीमाःगु आदि सवालत न्ह्यब्वयाः समस्याया पहाड हे न्ह्यःने थने हःगुलिं समाधान झन जटिल जूवंगु खः। माओवादीं वार्ता याये न्ह्यः हे प्रधानमन्त्री माधव नेपालं राजीनामा निं यायेमाःगु माग याःगु दुसा उगु मागयात सरकारं थःपिनि थीथी प्रस्ताव मार्फत लिसः बीगु ज्या याःगु दु। थथे जुइवं समस्या ध्यँध्यं ताहाः छाछां तत्याः जूवनीगु स्थिति खने दयावःगु दु। थज्याःगु स्थितिइ राजनीतिक समस्याया समाधान धायेगु नं तापाःगु खँ जू वनीगु सम्भावना दु ।

माओवादीं थःपिनि आम हडताल स्थगन यानाः खुल्लामञ्चं निन्हुया अल्टिमेटम बियाः उगु अवधि दुने सरकारपाखें छु प्रतिक्रिया वइगु उकिया आधारय् हे वर्ताय् वनेगु वा आन्दोलनयात हे निरन्तरता बीगु धइगु खँ क्वःछीगु बिचाः याःगु खः। तर आः तक सरकारं राजीनामा मखु कि माओवादीयात अलमल हे याना तयेगु जक ज्या यानाच्वंगु खने दयावःगु दु। अथे धइगु सहमति झन जटिल स्थितिइ लाःवंगु दु। पौ छ्वःगु इलय् प्रधानमन्त्रीपाखें सार्थक वार्ताय् वयेत आह्वान यानातःगु दुसां तबि नं माओवादीया तत्काल च्वंगु बैठकं उगु पतिइ झन जटिल कथंया खँत उल्लेख जुइवं धाःसा वार्ताय् मच्वनेगु क्वःछिउगु दु। अथे जुयाः हे वार्ता मार्फत समस्या समाधान जुइगु आशा कयाच्वंपिं नेपाली जनतां माओवादीपाखें सिंहदरवार घेराऊ यानाः झन जक आन्दोलनयात विशेष रुपं न्ह्यज्याकूगु परिणाम स्वया च्वनेमाःगु स्थिति वःगु दु ।

शान्ति, संविधान व शक्ति बाँडफाँडया खँय् निगू पक्षया दथुइ वार्ता यायेगु तयारी जुयाच्वंसां तबि नं आः तक नं निगू पक्षया प्राथमिकता धाःसा मिले जुयाच्वंगु मदुनि। अथे जुयाः नं थुगु जटिल जूवंगु अवधि हाकनं ताःहाइगु जकं खःला धइगु सोच विकास जूवंगु दु। ताः ई न्ह्यवंनिसें सरकारय् वनेगु निंतिं लालायित जुयाच्वंगु माओवादी सरकार परिवर्तनयात हे मू एजेण्डा कथं कयातःगु दुसा उखे थःपिंसं हे जिम्मेवारीपूर्वक ज्या यानाच्वनागु तायेकाः सरकार पक्ष एमाले व कांग्रेसं धाःसा माओवादीयात प्रतिपक्षी वा सहयोगी पक्षया रुपय् हे जक कायेगु कथं विश्लेषण यानातःगु खनेदु।
अथे जुयाः नं माओवादी दकलय् जिम्मेवार व जनताया मिखाय् दकलय् लोकप्रिय पार्टी जूवंगु खँयात वर्तमान सत्तासिन दलतय्सं स्वीकार याये चाहे जुयाच्वंगु मदु। थुगु खँय् हे हाकनं आन्तरिक द्वन्द्व न्ह्यज्यायेफुगु सम्भावना दु ।

थ्व जटिल घडीइ अन्तर्राष्ट्रिय शक्तिं नं समस्याया राजनीतिक निकास मालेत धयाच्वंगु दु। न्ह्यागु नं समाधान लोकतान्त्रिक ढंगं यायेमाःगु खँय् सरकारं रुची तःसां सरकारं उकथंया व्यवहार मजूगु अनुभूति नेपाली जनतां यानाच्वंगु दु ।

हरेक समस्याया समाधान प्याकेजय् यायेगु धाधां सरकारं आः तक नं थीथी कथं सिर्जना जूगु राजनीतिक समस्या जटिल मोडय् यंकेत स्वयाच्वंगु खनेदु। म्हिगः तक सरकारं माओवादीं आन्दोलन लित कयाः वार्ताय् वयेगु खःसा समस्याया समाधान याये फइगु कथं सोच विकास यानातःगु खः। तर सरकारं धाःसा माओवादीं याःगु आन्दोलन स्थगनयात हेपे यानाः अवमूल्यन यानाः उकियात छपलाः लिचिउगु तायेकाः थःपिनि बिजय वा थःपिंसं धइथें माओवादी वःगु खः धकाः थीथी कथं स्वतुमतु स्वइगु कथंया प्रस्ताव न्ह्यब्वये हःगु दु। खँ सहज व सरल यायेमाःगु इलय् पन्जलय् झंगःपंछि क्यंके थें ज्या यायेगु पाय्छि मखु। खः,
सरकारं आन्दोलन जुइवं राजीनामा बी मजिउ। तर सहमतियात सार्थक याना वनेगु खःसा खःगु, भिंगु व जिउगु लँपु मालेत राजनीतिक दलतय्सं उचित समाधान मालेमाः। थौं माओवादीं प्रधानमन्त्रीया राजीनामा जक फ्वंगु खः, तःधंगु चीज फ्वंगु मदु। प्रधानमन्त्री न्ह्याम्ह हे जूसां फरक मदु। तर आः वइम्ह सरकारं जनजीविकाया सवालयात ध्यानय् तयाः शान्ति व मैत्रीपूर्ण वातावरण तयार यायेगु ज्या धाःसा याना वनेमाः ।

नेपाली जनतां चाहे जुल धाःसा आः सदनय् न्ह्यःने वयाच्वंगु तःधंगु दलतय्त छक्वलं क्वह्यंके नं फु। जनताया बलं हे शासन कायम यायेगु खःसा सहमति व समझदारीया खँ ल्हाना च्वनेमाःगु आवश्यकता हे मदु। कानुनी संघर्ष मयासे गैर कानुनी संघर्ष याना वनेगु इलय् १२ बुँदे समझदारी, ६ बुँदे सम्झौता आदि इत्यादि फुक्क गौण हे जुइ। आः माओवादीं थःपिं स्वंगूगु जनआन्दोलन धायेधुंकूगु व उकिं छुं उपलब्धी हे कायम यायेगु खःसा उकथं हे न्ह्यःने वनेमाःगु खः। तर उगु आन्दोलनया माग धाःसा लोकतन्त्र व सरकार परिवर्तनया लागिं जक मखुसें मुक्कं हे आमूल परिवर्तनया लागिं जुइमाःगु खः। अथे जुल धाःसा नेपाली जनतां रुची नं तइ। छुं कथं आः थें थाय्थासय् प्रतिकार नं जुइ मखु जुइ। मेमेगु कम्युनिष्ट पार्टीं नं उकियात साथ हे बीगु जुइ। तर आः न्ह्यानाच्वंगु आन्दोलनया माग समाजवाद व साम्यवाद प्राप्तिया लागिं मखुसें सत्ता वा कुर्सी प्राप्त यायेगु निंतिं खः। थ्व धइगु छगू निहित स्वार्थ खः ।

थज्याःगु जटिल मोडय् थ्यंगु इलय् तमाम वाम शक्ति न्ह्यचिलाः छगू न्हूगु संघर्ष यायेगु आवश्यकता जुयाच्वंगु दु। जनताया मूल समस्या नये त्वने सुलभ यानाः उपभोग्य चीजया भाः थिके मजुइकेत, सकसिनं नये खनीगु व्यवस्था कायम यायेत नं सोचे यायेमाःगु आवश्यकता दु। थ्व धइगु समाजवादी व साम्यवादी समाजया निर्माण खः। थुकथं हे पूँजीवादी सरकार कमजोर जुयाः साम्यवादी कल्पना तीब्र जुइगु अवस्थाय् हे जक अज्याःगु परिस्थिति तयार जुइगु खः। सोभियत रुस अथे जुयाः हे स्थापना जुइफुगु खः। उबलय् फेब्रुअरी क्रान्ति धाःसा पूँजीवादी क्रान्ति लिपा हे अक्टोबर क्रान्ति जूगु नं थज्याःगु अवस्थाय् हे खः। उकिं माओवादीं थ्व इलय् छुं छगू निगू स्थान व कुर्सीया लागिं ल्वायेगु स्वयां तमाम न्यायप्रेमि जनताया लागिं ल्वायेगु स्वयेमाः। अथे जुल धाःसा लाखौं करोडौं नेपाली जनतां थःगु जिउ ज्यान पानाः नं माओवादीयात सार्थक ग्वाहालि यायेत स्वइ। थ्व खँ नं थौं जटिल अवस्थाय् वयाः फुक्कं राजनीतिक पार्टीं ध्यान तयेमाःगु खनेदु ।

More Stories Like this