सहमतिपाखें तापाक वनाच्वंगु सरकार

माओवादीं आमहडताल लित काःसां नं प्रधानमन्त्रीं धाःसा राजीनामा मबीगु जूगु दु। थ्व इलय् प्रधानमन्त्री सिबें नं नेपाली कांग्रेस व एमाले दुनेया अनुदारवादी नेतातय्सं प्रधानमन्त्रीं राजीनामा बीमाःगु जरूरी मदु धासें माओवादीं आम हडताल लित कयाः क्यंगु उदारतायात महत्व मबीगु कुतः याःगु खने दत। उलि जक मखु माओवादीं आम हडताल लित कायेधुंकूगुलिं आः प्रधानमन्त्रीपाखें नं सकारात्मक पहल याना बीमाल धकाः इनाप याः वंपिं व्यापारी पुचःयात प्रमं अःखतं ब्वः बियाः लित छ्वया हःगु दु। थ्वहे व्यापारीतय् पहलय् जूगु शान्ति सभा लिपा माओवादीं आमहडताल लित काःगु खः। वहे पुचःयात प्रधानमन्त्रीं थज्याःगु लिसः बियाहःगुलिं आः माओवादीं हानं मेगु आन्दोलनया घोषणा यात धाःसा उकियात कयाः न्ववायेगु नैतिकता तकं व्यापारीवर्गयाके मदया बिउगु दु। शान्तिया लागिं दथुइ च्वनाः पहल याइगु थज्याःगु समुदाय निराश जुइगु धइगु बांलाःगु संकेत मखु ।

आः जेठ १४ गते नं न्ह्यःने वयाच्वंगु दु। संविधानसभाया म्याद वकुन्हु क्वचाइ। म्याद थपे मयात धाःसा संविधानसभा स्वतः हे भंग जुइ। संविधानसभा भंग जूगु अवस्थाय् देय् न्हूगु हे कथंया संकटय् प्रवेश जुइगु निश्चित दु। उकिं अज्याःगु अवस्था वये न्ह्यः हे दलतय् दथुइ सहमति कायम जुइमाःगु आवश्यक दु। संविधानसभा मदुगु अवस्थाय् सरकार नं दइ मखु। अज्याःगु इलय् या त सेनां सत्ता कब्जाय् कायेफु, या त माओवादीं हे विद्रोह यायेफु। नितां बांलाःगु विकल्प मखु। उकिं सहमति ला झन् मदयेक हे मगाः। सहमति मजुयाः पिहां वइगु दुर्घटनाया दोषी कन्हय्
सरकार हे जुइ ।

More Stories Like this